ທ່ານ ພົນໂທ ວັນທອງ ກອງມະນີ ໄດ້ຍົກໃຫ້ເຫັນຄວາມຈໍາເປັນ ແລະ ເຫດຜົນໃນການປັບປຸງຮ່າງກົດໝາຍໃນຄັ້ງນີ້. ພ້ອມນັ້ນ, ຍົກໃຫ້ເຫັນການກໍານົດເນື້ອໃນບາງບັນຫາຂອງກົດໝາຍຍັງບໍ່ຈະແຈ້ງ, ຮັດກຸມ, ຄົບຖ້ວນ,ມີບາງບັນຫາທີ່ຍັງບໍ່ທັນໄດ້ກໍານົດໄວ້ໃນກົດໝາຍ ແລະ ຍ້ອນການກໍານົດເນື້ອໃນບາງດ້ານບໍ່ທັນມີລັກສະນະຊຸກຍູ້, ສົ່ງເສີມໃຫ້ນາຍ ແລະ ພົນຕຳຫຼວດມີຄວາມຫ້າວຫັນໃນການປະຕິບັດໜ້າທີ່ ເປັນຕົ້ນອາຍຸກະສຽນປະດັບຊັ້ນ, ເລື່ອນຊັ້ນ, ປະດັບທຽບຊັ້ນ, ເລື່ອນທຽບຊັ້ນໃຫ້ນາຍ ແລະ ພົນຕຳຫຼວດແຕ່ລະຂັ້ນ; ການປະດັບຊັ້ນ ແລະ ປະດັບທຽບຊັ້ນ; ເງື່ອນໄຂການເລື່ອນຊັ້ນ; ການກໍານົດຊັ້ນໃສ່ຕຳແໜ່ງບັນຊາ; ອາຍຸກະສຽນຮັບບຳນານ; ການຍົກຂັ້ນເງິນເດືອນ; ການເສຍອົງຄະ; ລະບົບການນໍາພາບັນຊາ ແລະ ອື່ນໆ ເຫັນວ່າຍັງບໍ່ທັນສອດຄ່ອງກັບສະພາບການເຕີບໃຫຍ່ຂະຫຍາຍຕົວຂອງກໍາລັງປ້ອງກັນຄວາມສະຫງົບໃນປັດຈຸບັນ, ຍ້ອນລັດຖະທຳມະນູນ ແລະບັນດາກົດໝາຍທີ່ກ່ຽວຂ້ອງຈໍານວນໜຶ່ງທີ່ຕິດພັນກັບກໍາລັງປ້ອງກັນຄວາມສະຫງົບ ໄດ້ມີການປັບປຸງທາງດ້ານການຈັດຕັ້ງ, ວຽກງານວິຊາສະເພາະລວມທັງການຈັດຕັ້ງຂອງຂະແໜງການມີການປັບປຸງ ເປັນຕົ້ນມີການໂຮມບາງວຽກງານຂອງຂະແໜງການ ແລະ ໄດ້ມີການສ້າງຕັ້ງເພີ່ມມີຂັ້ນຕາແສງຕື່ມບວກກັບສະພາບເສດຖະກິດ-ສັງຄົມ, ມີການເຕີບໃຫຍ່ຂະຫຍາຍຕົວ.ສະນັ້ນ, ເພື່ອໃຫ້ມີຄວາມຖືກຕ້ອງ, ສອດຄ່ອງກັບສະພາບຄວາມເປັນຈິງໃນປັດຈຸບັນ, ສະເພາະໜ້າ ແລະ ຍາວນານ.ຜ່ານການປະເມີນຜົນການຈັດຕັ້ງປະຕິບັດກົດໝາຍດັ່ງກ່າວ ກະຊວງປ້ອງກັນຄວາມສະຫງົບຈຶ່ງມີຄວາມຈໍາເປັນ ແລະ ສໍາຄັນຫຼາຍຕ້ອງໄດ້ປັບປຸງໃນບາງພາກ, ໝວດ ແລະ ມາດຕາຂອງກົດໝາຍສະບັບດັ່ງກ່າວ ໃຫ້ມີຄວາມສອດຄ່ອງກັບພາລະບົດບາດໜ້າທີ່ການເມືອງຂອງກໍາລັງປ້ອງກັນຄວາມສະຫງົບໃນການປັບປຸງ, ກໍ່ສ້າງກໍາລັງໃຫ້ມີຄວາມໜັກແໜ້ນ, ເຂັ້ມແຂງ ແລະ ທັນສະໄໝ. ສໍາລັບໂຄງປະກອບ ແລະ ເນື້ອໃນຂອງຮ່າງກົດໝາຍວ່າດ້ວຍກຳລັງປ້ອງກັນຄວາມສະຫງົບປະຊາຊົນລາວສະບັບປີ 2017 ປະກອບມີ IX ພາກ, 6 ໝວດ ແລະ 55 ມາດຕາ, ພາຍຫຼັງປັບປຸງລ່າສຸດນີ້ປະກອບມີ X ພາກ, 8 ໝວດ ແລະ 75 ມາດຕາ. ໃນນັ້ນ, ເພີ່ມເຂົ້າໃໝ່ I ພາກ, 2 ໝວດ, 25 ມາດຕາ ແລະ ຕັດອອກ 4 ມາດຕາ, ປັບປຸງ 45 ມາດຕາ, ຮັກສາເດີມ 5 ມາດຕາ.
ທ່ານລັດຖະມົນຕີກະຊວງປກສ ກ່າວຕື່ມວ່າ: ເມື່ອກົດໝາຍສະບັບນີ້ຖືກຮັບຮອງ ແລະ ປະກາດໃຊ້ຢ່າງເປັນທາງການແລ້ວ ຜົນໄດ້ຮັບຈະເປັນການປັບປຸງແບບແຜນວິທີເຮັດວຽກຂອງກົມກອງເຫຼົ່າວິຊາສະເພາະ, ນາຍ ແລະ ພົນຕຳຫຼວດໃຫ້ມີຄວາມໜັກແໜ້ນ, ເຂັ້ມແຂງ, ມີວິໄນເຂັ້ມງວດ, ມີຈັນຍາບັນ-ຈັນຍາທຳ, ມີແບບແຜນໃນການຊີ້ນໍາ, ບັນຊາ,ຄຸ້ມຄອງ, ຕິດຕາມ ກວດກາ ການເຄື່ອນໄຫວຕາມພາລະບົດບາດ, ສິດ ແລະ ໜ້າທີ່ວຽກງານວິຊາສະເພາະຂອງກໍາລັງປ້ອງກັນຄວາມສະຫງົບ ໃຫ້ຫັນເຂົ້າສູ່ກົດໝາຍ ແລະ ລະບຽບການ; ຈະເປັນບ່ອນອີງໃຫ້ບັນດາກະຊວງ, ອົງການຈັດຕັ້ງຕ່າງໆ ແລະ ອົງການປົກຄອງທ້ອງຖິ່ນ ສ້າງເງື່ອນໄຂອຳນວຍຄວາມສະດວກໃຫ້ນາຍ ແລະ ພົນຕຳຫຼວດເຮັດໜ້າທີ່ຊ່ວຍເຫຼືອເບິ່ງແຍງທາງດ້ານວັດຖຸຈິດໃຈ ແລະ ຊີວິດການເປັນຢູ່ຂອງນາຍ ແລະ ພົນຕຳຫຼວດ ແລະ ຄອບຄົວໃຫ້ດີຂຶ້ນກວ່າເກົ່າ;ຈະເປັນບ່ອນອີງໃຫ້ການຈັດຕັ້ງປະຕິບັດໜ້າທີ່ວຽກງານວິຊາສະເພາະຂອງກໍາລັງປ້ອງກັນຄວາມສະຫງົບ ເພື່ອຮັບປະກັນການປົກປັກຮັກສະຖຽນລະພາບທາງດ້ານການເມືອງ, ຄວາມສະຫງົບ ແລະ ຄວາມເປັນລະບຽບຮຽບຮ້ອຍຂອງສັງຄົມ ເຮັດໃຫ້ປະເທດຊາດມີສະຖຽນລະພາບຄວາມໝັ້ນຄົງ;ຈະເປັນການຮັບປະກັນໃນການເຄື່ອນໄຫວ, ປົກປ້ອງ, ຄຸ້ມຄອງກໍາລັງໃນຂະແໜງການປ້ອງກັນຄວາມສະຫງົບປະຊາຊົນລາວໃນຂອບເຂດທົ່ວປະເທດໃຫ້ໄປຕາມທິດປົກຄອງລັດດ້ວຍກົດໝາຍ.
(ຂ່າວ: ວັນເພັງ, ພາບ: ບຸນຕອມ)
ຄໍາເຫັນ