ທ່ານ ພົຈວ ສຸລິໄຊ ພິຈິດ ສສຊປະຈຳເຂດເລືອກຕັ້ງທີ 17 ແຂວງອັດຕະປື ໄດ້ສະແດງຄວາມເຫັນດີຕໍ່ຫຼັກການ ແລະ ເຫດຜົນຄວາມຈຳເປັນໃນການປັບປຸງກົດໝາຍສະບັບນີ້ ພ້ອມທັງຊົມເຊີຍກະຊວງປ້ອງກັນປະເທດ ແລະ ພາກສ່ວນກ່ຽວຂ້ອງ ໂດຍສະເພາະກຳມາທິການກົດໝາຍ ແລະ ຍຸຕິທຳສະພາແຫ່ງຊາດທີ່ໄດ້ຄົ້ນຄວ້າ, ປຶກສາຫາລື ແລະ ກວດກາເນື້ອໃນຮ່າງກົດໝາຍຢ່າງຮອບດ້ານຜ່ານຫຼາຍຂັ້ນຕອນ.
ເຖິງຢ່າງໃດກໍຕາມ, ຈາກການພິຈາລະນາລາຍລະອຽດ ຍັງເຫັນວ່າບາງມາດຕາມີເນື້ອໃນທີ່ຄວນປັບປຸງໃຫ້ຄົບຖ້ວນ ແລະ ຊັດເຈນຍິ່ງຂຶ້ນ ເພື່ອໃຫ້ສາມາດນຳໄປປະຕິບັດໄດ້ຢ່າງເໝາະສົມກັບສະພາບ ແລະ ເງື່ອນໄຂໃນປັດຈຸບັນ.ສຳລັບມາດຕາ 26 ວ່າດ້ວຍການເລື່ອນຊັ້ນ ແລະ ທຽບຊັ້ນນາຍທະຫານສະເໜີໃຫ້ພິຈາລະນາທົບທວນເງື່ອນໄຂມາດຕະຖານການເລື່ອນຊັ້ນ ແລະ ທຽບຊັ້ນຂອງນາຍທະຫານຊ່ວຍວຽກໃຫ້ສອດຄ່ອງກັບມາດຕາ 22 ຂອງກົດໝາຍສະບັບດຽວກັນເພື່ອຫຼີກລ່ຽງຄວາມຊໍ້າຊ້ອນ ແລະ ໃຫ້ຫຼັກເກນມີຄວາມຈະແຈ້ງ.ສ່ວນມາດຕາ 27 ວ່າດ້ວຍຕຳແໜ່ງບັນຊາຂອງນາຍທະຫານ ສະເໜີໃຫ້ພິຈາລະນາເພີ່ມຕຳແໜ່ງຂອງບັນດາວິທະຍາຄານ ແລະ ໂຮງຮຽນ,ໂຮງໝໍເຂົ້າໃນຂໍ້ກຳນົດຂອງມາດຕານີ້ຕາມຄວາມເໝາະສົມ ເພື່ອໃຫ້ການກຳນົດຕຳແໜ່ງບັນຊາມີຄວາມຄົບຖ້ວນ.ສຳລັບມາດຕາ 28 ວ່າດ້ວຍການກຳນົດຊັ້ນໃສ່ຕຳແໜ່ງຂອງນາຍທະຫານ ທ່ານໄດ້ຍົກປະເດັນຄວາມແຕກຕ່າງລະຫວ່າງການກຳນົດຊັ້ນຂອງຕຳແໜ່ງປະທານ ແລະ ຮອງປະທານກຳມາທິການປ້ອງກັນຊາດ ປ້ອງກັນຄວາມສະຫງົບສະພາແຫ່ງຊາດກັບການກຳນົດຊັ້ນຂອງຕຳແໜ່ງທຽບເທົ່າໃນກົດໝາຍວ່າດ້ວຍກຳລັງຕຳຫຼວດປະຊາຊົນເຫັນວ່າຄວນມີການປະສານງານລະຫວ່າງສອງກຳລັງ ເພື່ອກຳນົດຫຼັກການໃຫ້ສອດຄ່ອງ ແລະ ເອກະພາບກັນ ໂດຍຄຳນຶງເຖິງບົດບາດ, ຄວາມຮັບຜິດຊອບ ແລະ ສະຖານະທຽບເທົ່າຂອງຕຳແໜ່ງໃນສະພາແຫ່ງຊາດ. ສຳລັບມາດຕາ 34 ວ່າດ້ວຍການຮັບອຸດໜູນບຳນານ ສະເໜີໃຫ້ຄົ້ນຄວ້າກຳນົດເງື່ອນໄຂພິເສດສຳລັບນາຍທະຫານທີ່ມີອາຍຸການຮັບໃຊ້ 25 ປີຂຶ້ນໄປ ແຕ່ຍັງບໍ່ຮອດອາຍຸກະສຽນ ແລະ ມີບັນຫາດ້ານສຸຂະພາບ ຫຼື ຮ່າງກາຍບໍ່ແຂງແຮງ ໂດຍໃຫ້ພິຈາລະນາເປັນກໍລະນີພິເສດຕາມຄວາມເໝາະສົມ,ສຳລັບມາດຕາ 47 ວ່າດ້ວຍສິດ ແລະ ໜ້າທີ່ຂອງກອງບັນຊາການອາວຸດ ສະເໜີໃຫ້ທົບທວນເນື້ອໃນຂໍ້ 3 ແລະ ຂໍ້ 7 ທີ່ເຫັນວ່າມີຄວາມໝາຍຄ້າຍຄືກັນ ໂດຍສະເໜີໃຫ້ປັບລວມເນື້ອໃນທີ່ຊ້ຳຊ້ອນເຂົ້າເປັນຂໍ້ດຽວກັນ ເພື່ອໃຫ້ກົດໝາຍມີຄວາມຊັດເຈນຍິ່ງຂຶ້ນ ແລະ ເພື່ອປັບປຸງຮ່າງກົດໝາຍໃຫ້ມີເນື້ອໃນຄົບຖ້ວນ, ມີຫຼັກການສອດຄ່ອງກັນ ແລະ ສາມາດນຳໄປຈັດຕັ້ງປະຕິບັດໄດ້ຢ່າງມີປະສິດທິຜົນ ພ້ອມທັງຮັບປະກັນສິດ ແລະ ຜົນປະໂຫຍດອັນເໝາະສົມຂອງນາຍທະຫານ ແລະ ກອງທັບປະຊາຊົນລາວ.ຂ່າວ-ພາບ: ບຸນຕອມ
ຄໍາເຫັນ