 |
ໃນລະຫວ່າງວັນທີ 29 ຫາ 30 ສິງຫາ 2026 ໄດ້ເກີດໄພພິບັດນໍ້າຖ້ວມຢ່າງໄວ ແລະ ຮຸນແຮງໃນຫຼາຍເຂດລຸ່ມແມ່ນ້ຳຂອງທາງພາກເໜືອຂອງ ສປປ ລາວ, ໂດຍສະເພາະແມ່ນຢູ່ແຂວງຫຼວງນ້ຳທາ ແລະ ແຂວງອຸດົມໄຊ. ເຫດການນ້ຳຖ້ວມດັ່ງກ່າວ ໄດ້ສົ່ງຜົນກະທົບຕໍ່ສະຖານການສຶກສາ, ເຮັດໃຫ້ບໍລິເວນໂຮງຮຽນມີດິນເຊາະເຈື່ອນ ແລະ ສ້າງຄວາມເສຍຫາຍໃຫ້ແກ່ປຶ້ມແບບຮຽນ, ຄູ່ມືຄູ ແລະ ອຸປະກອນຮັບໃຊ້ການຮຽນການສອນທີ່ຄູ ແລະ ນັກຮຽນຈຳເປັນຕ້ອງໄດ້ນໍາໃຊ້ໃນການຮຽນການສອນ. ມີສະຖານການສຶກສາທັງໝົດ 40 ກວ່າແຫ່ງໃນສອງແຂວງໄດ້ຮັບຜົນກະທົບ, ໂດຍໂຮງຮຽນປະຖົມກວມຈໍານວນຫຼາຍກວ່າເຄິ່ງໜຶ່ງຂອງຈຳນວນສະຖານການສຶກສາທີ່ເສຍຫາຍ ປະກອບມີ ປຶ້ມແບບຮຽນ, ຄູ່ມືຄູ ແລະ ອຸປະກອນການຮຽນການສອນ ທີ່ຕ້ອງໄດ້ນໍາໃຊ້ເພື່ອໃຫ້ນັກຮຽນໄດ້ສືບຕໍ່ຮຽນ. ນອກຈາກນີ້ ຍັງມີອາຄານຮຽນ, ໂຕະຕັ່ງນັກຮຽນ, ຄູ ແລະ ລະບົບໄຟຟ້າ ກໍໄດ້ຮັບຄວາມເສຍຫາຍເຊັ່ນດຽວກັນ.
ກະຊວງສຶກສາທິການ ແລະ ກິລາ ໄດ້ຈັດກອງປະຊຸມປຶກສາຫາລື ຮ່ວມກັນໃນການຕອບໂຕ້ຕໍ່ສະຖານະການສຸກເສີນ ເພື່ອຊ່ວຍເຫຼືອໂຮງຮຽນທີ່ໄດ້ຮັບຜົນກະທົບດັ່ງກ່າວ ໂດຍຜ່ານການລາຍງານຜົນເສຍຫາຍຈາກ 2 ແຂວງ. ສໍາລັບລັດຖະບານ ອົສຕຣາລີ ໂດຍຜ່ານແຜນງານບີຄວາ ແລະ ລັດຖະບານຍີ່ປຸ່ນ ໂດຍຜ່ານອົງການຮ່ວມມືສາກົນຍີ່ປຸ່ນ (ອົງການ JICA), ໄດ້ຕອບສະໜອງຕໍ່ຄວາມຕ້ອງການຢ່າງຮີບດ່ວນຂອງກະຊວງ ໃນການຈັດຫາປຶ້ມແບບຮຽນຊັ້ນປະຖົມ ແລະ ອຸປະກອນການຮຽນການສອນທີ່ເສຍຫາຍ ເພື່ອມາທົດແທນຄືນໃໝ່ ເພື່ອໃຫ້ໂຮງຮຽນທີ່ໄດ້ຮັບຜົນເສຍຫາຍສືບຕໍ່ການຮຽນການສອນ.
ການຊ່ວຍເຫຼືອຈາກລັດຖະບານອົສຕຣາລີ ລວມມີປຶ້ມແບບຮຽນຈຳນວນ 3,651 ຫົວ ສຳລັບນັກຮຽນຕັ້ງແຕ່ຂັ້ນ ປ.1 ຫາ ປ.5. ປຶ້ມແບບຮຽນເຫຼົ່ານີ້ ລວມມີວິຊາຫຼັກເຊັ່ນ: ພາສາລາວ, ວິທະຍາສາດ ແລະ ສິ່ງແວດລ້ອມ ແລະ ພາສາອັງກິດ. ນອກຈາກນີ້, ລັດຖະບານອົສຕຣາລີ ຍັງໄດ້ສະໜອງອຸປະກອນການສຶກສາ ແລະ ອຸປະກອນກິລາຫຼາກຫຼາຍຊະນິດ ເຊັ່ນ: ປຶ້ມຂຽນຈຳນວນ 6,550 ຫົວ ສຳລັບນັກຮຽນ ແລະ ຄູ, ສໍດຳ 6,330 ກ້ານ, ປຶ້ມນິທານ ແລະ ປຶ້ມແບບຝຶກຫັດເກືອບ 900 ຫົວ, ໂປສເຕີເພື່ອການສຶກສາຫຼາຍກວ່າ 500 ແຜ່ນ ແລະ ອຸປະກອນກິລາຫຼາຍຊະນິດເຊັ່ນ: ກະຕໍ້, ບານເຕະ, ບານສົ່ງ ແລະ ຊຸດອຸປະກອນກິລາດອກປີກໄກ່. ທາງດ້ານ ອົງການຮ່ວມມືສາກົນຍີ່ປຸ່ນ (JICA) ກໍໄດ້ເຂົ້າຮ່ວມໃນການສະໜັບສະໜູນຄັ້ງນີ້ ໂດຍການມອບປຶ້ມແບບຮຽນວິຊາຄະນິດສາດຊັ້ນປະຖົມສຶກສາ ຈຳນວນທັງໝົດ 2,692 ຫົວ ສຳລັບນັກຮຽນປະຖົມທຸກຄົນ ຕັ້ງແຕ່ຂັ້ນ ປ.1 ຫາ ປ.5.
ພິທີມອບ - ຮັບ ໄດ້ຈັດຂຶ້ນໃນວັນທີ 13 ຕຸລາ ນີ້ ທີ່ນະຄອນຫຼວງວຽງຈັນ, ກ່າວມອບໂດຍ ທ່ານ ໄມໂຄຄາຣີ ເລຂາເອກສະຖານທູດອົສຕຣາລີ ປະຈຳລາວ ແລະ ທ່ານ ໂຄເບ ໂນບູຢູກິ ຮອງຫົວໜ້າອົງການຮ່ວມມືສາກົນຍີ່ປຸ່ນ (JICA) ປະຈໍາລາວ ແລະ ໃຫ້ກຽດຮັບໂດຍ ທ່ານ ວິໄລພອນ ພົມມະຫາໄຊ ຫົວໜ້າຫ້ອງການ ກະຊວງສຶກສາທິການ ແລະ ກິລາ ຊຶ່ງມີຜູ້ຕາງໜ້າຈາກຫ້ອງການກະຊວງສຶກສາທິການ ແລະ ກິລາ, ກົມການສຶກສາກ່ອນໄວຮຽນ, ກົມສາມັນສຶກສາ, ພະນັກງານສະຖານທູດອົສຕຣາລີ, ອົງການຮ່ວມມືສາກົນຍີ່ປຸ່ນ JICA ເຂົ້າຮ່ວມ.
ທ່ານ ວິໄລພອນ ພົມມະຫາໄຊ ໄດ້ກ່າວວ່າ: ຂ້າພະເຈົ້າໄດ້ຮັບການມອບໝາຍຈາກຄະນະນໍາກະຊວງ, ຮູ້ສຶກເປັນກຽດຢ່າງຍິ່ງ ທີ່ໄດ້ຕາງໜ້າກະຊວງສຶກສາທິການ ແລະ ກິລາ ພ້ອມທັງຕາງໜ້າໃຫ້ແກ່ພະແນກສຶກສາທິການ ແລະ ກິລາແຂວງຫຼວງນໍ້າທາ ແລະ ແຂວງອຸດົມໄຊ ທີ່ມາຮັບເຄື່ອງຊ່ວຍເຫຼືອແກ່ 2 ແຂວງ ແລະ ລາຍງານສະພາບລວມໂດຍຫຍໍ້ ພາຍຫຼັງ ນໍ້າບົກແຫ້ງ ບັນດາສະຖານການສຶກສາ ທີ່ໄດ້ຮັບຜົນກະທົບກໍໄດ້ມີການອະນາໄມ, ສ້ອມແປງ ໃຫ້ນັກຮຽນສາມາດກັບມາຮຽນໄດ້ ແຕ່ປາສະຈາກບໍ່ໄດ້ ອາຄານຮຽນບາງຫຼັງທີ່ໄດ້ຖືກນໍ້າເຊາະເຈື່ອນຕ້ອງໄດ້ໃຊ້ເວລາໃນການສ້ອມແປງ ແລະ ກໍ່ສ້າງຄືນໃໝ່ ຊຶ່ງພະແນກສຶກສາທິການ ແລະ ກິລາແຂວງ ທັງສອງແຂວງກໍໄດ້ສົມທົບກັບຄະນະກໍາມະການຄຸ້ມຄອງ ໄພພິບັດຂັ້ນແຂວງ ປະເມີນຜົນເສຍຫາຍທີ່ກະທົບ ແລະ ສ້າງແຜນຟື້ນຟູຫຼັງໄພພິບັດໄດ້ສະເໜີອົງການປົກຄອງຂັ້ນແຂວງ ບັນຈຸເຂົ້າໃນແຜນຟື້ນຟູ ຂອງອົງການປົກຄອງທ້ອງຖິ່ນ ແລະ ເບື້ອງກະຊວງສຶກສາທິການ ແລະ ກິລາ ກໍໄດ້ມີການອ່ວຍທຶນ ການປຸກສ້າງ ໃນບ້ວງສຸກເສີນ ກອງທຶນຮ່ວມສາກົນເພື່ອການສຶກສາ ໄລຍະ 3 (GPE3) ມາກໍ່ສ້າງອາຄານຮຽນປະຖົມນາເຕີຍ ເມືອງນໍ້າທາ ແຂວງຫຼວງນໍ້າທາ. ໃນນາມຕາງໜ້າໃຫ້ແກ່ການນໍາ, ໃນນາມສ່ວນຕົວ ສະແດງຄວາມຂອບໃຈມາຍັງລັດຖະບານອົສຕຣາລີ ແລະ ອົງການຮ່ວມມືສາກົນຍີ່ປຸ່ນ JICA ສໍາລັບການສະໜັບສະໜູນວຽກງານການສຶກສາຢ່າງຕໍ່ເນື່ອງ, ລວມທັງໃນໄລຍະເວລາທີ່ພວກເຮົາປະເຊີນກັບຄວາມຫຍຸ້ງຍາກນີ້. ເຖິງແມ່ນວ່າຈະມີຄວາມຫຍຸ້ງຍາກທີ່ເກີດຈາກໄພພິບັດທາງທຳມະຊາດກໍ່ຕາມ ແຕ່ການສຶກສາຈະຕ້ອງສືບຕໍ່ດຳເນີນຕໍ່ໄປ.
 |
ທ່ານ ໄມໂຄ ຄາຣີ ໄດ້ກ່າວວ່າ: “ລັດຖະບານອົສຕຣາລີ ມີຄວາມຍິນດີທີ່ຈະສະໜັບສະໜູນວຽກງານການຕອບສະໜອງຕໍ່ສະຖານະການສຸກເສີນ ຂອງກະຊວງສຶກສາທິການ ແລະ ກິລາ ໂດຍການສະ ໜອງອຸປະກອນການຮຽນທີ່ຈຳເປັນໃຫ້ແກ່ໂຮງຮຽນທີ່ໄດ້ຮັບຜົນກະທົບຈາກໄພນໍ້າຖ້ວມ. ການຊ່ວຍເຫຼືອນີ້ ສະທ້ອນໃຫ້ເຫັນເຖິງການຮ່ວມມືອັນແໜ້ນແຟ້ນລະຫວ່າງ ລັດຖະບານອົສຕຣາລີ ແລະ ສປປ ລາວ ແລະ ເປັນສ່ວນໜຶ່ງຂອງການຮ່ວມມືໃນວົງກວ້າງຂອງພວກເຮົາ ເພື່ອເສີມສ້າງການເຂົ້າເຖິງການສຶກສາຂັ້ນພື້ນຖານທີ່ມີຄຸນນະພາບ. ໂດຍການຊ່ວຍເຫຼືອໂຮງຮຽນໃນການຈັດຫາອຸປະກອນການຮຽນທີ່ຈຳເປັນມາທົດແທນອຸປະກອນທີ່ເສຍຫາຍຈາກໄພນໍ້າຖ້ວມ, ພວກເຮົາຕັ້ງເປົ້າໝາຍທີ່ຈະຫຼຸດຜ່ອນຜົນກະທົບຕໍ່ການຮຽນການສອນ, ສະໜັບສະໜູນຄູ ແລະ ສ້າງເງື່ອນໄຂທີ່ດີຂຶ້ນໃຫ້ແກ່ນັກຮຽນ ເພື່ອໃຫ້ເຂົາເຈົ້າສາມາດສືບຕໍ່ການຮຽນໄດ້ໃນໄລຍະການຟື້ນຟູ.”
ທ່ານ ໂຄເບ ໂນບູຢູກິ ໄດ້ກ່າວວ່າ: "ມີຄວາມຍິນດີທີ່ຈະສະໜັບສະໜູນຂະແໜງການສຶກສາ, ວິທະຍາສາດ ແລະ ກິລາ ໃນການຮັບມືກັບໄພນໍ້າຖ້ວມ ໂດຍໄດ້ສະໜອງປຶ້ມແບບຮຽນວິຊາຄະນິດສາດຊັ້ນປະຖົມສຶກສາ ໃນທຸກຂັ້ນຮຽນ ໃຫ້ແກ່ໂຮງຮຽນທີ່ໄດ້ຮັບຜົນກະທົບ ເພື່ອນຳມາທົດແທນປຶ້ມທີ່ເສຍຫາຍຈາກໄພນໍ້າຖ້ວມ, ຊ່ວຍໃຫ້ຄູສາມາດຈັດການຮຽນການສອນໄດ້.
(ຂ່າວ: ຕຸໄລເພັດ)
ຄໍາເຫັນ