 |
ກອງປະຊຸມຄັ້ງນີ້ ໄດ້ເນັ້ນໃສ່ການປຶກສາຫາລື ແລະ ແລກປ່ຽນຄຳຄິດເຫັນ ລະຫວ່າງພາກສ່ວນທີ່ກ່ຽວຂ້ອງ ກັບບັນດາສື່ມວນຊົນ ໃນການກຳນົດແນວທາງ ແລະ ຮູບແບບການສື່ສານທີ່ເໝາະສົມ ເພື່ອເຜີຍແຜ່ຄວາມຮູ້ກ່ຽວກັບຄວາມສຳຄັນຂອງການບໍລິຈາກເລືອດ ພ້ອມທັງສ້າງຄວາມເຂົ້າໃຈທີ່ຖືກຕ້ອງກ່ຽວກັບປະໂຫຍດ ແລະ ຄວາມປອດໄພໃນການບໍລິຈາກເລືອດ.
ສື່ມວນຊົນຖືເປັນກຳລັງສຳຄັນໃນການນຳສົ່ງຂໍ້ມູນຂ່າວສານໄປສູ່ສັງຄົມ ຜ່ານການລາຍງານຂ່າວ ລາຍການວິທະຍຸ-ໂທລະພາບ ແລະ ສື່ອອນລາຍ ເພື່ອຊ່ວຍກະຕຸ້ນໃຫ້ປະຊາຊົນຕະໜັກເຖິງຄຸນຄ່າຂອງການໃຫ້ເລືອດ ຊຶ່ງເປັນການໃຫ້ທີ່ສາມາດຊ່ວຍຕໍ່ຊີວິດຜູ້ອື່ນໄດ້.
ການປະສານສົມທົບລະຫວ່າງໜ່ວຍງານທີ່ຮັບຜິດຊອບ ແລະ ສື່ມວນຊົນ ຈຶ່ງມີບົດບາດສຳຄັນໃນການສ້າງກະແສສັງຄົມໃຫ້ເຫັນຄຸນຄ່າຂອງການໃຫ້ ແລະ ສົ່ງເສີມໃຫ້ມີຜູ້ບໍລິຈາກເລືອດໂດຍສະໝັກໃຈຢ່າງຕໍ່ເນື່ອງ ເພື່ອຮັບ ປະກັນວ່າມີເລືອດພຽງພໍ ແລະ ປອດໄພ ສຳລັບການປິ່ນປົວຜູ້ປ່ວຍທີ່ຈຳເປັນ.
ກອງປະຊຸມຄັ້ງນີ້ ຄາດວ່າຈະເປັນກົນໄກສຳຄັນໃນການຍົກສູງປະສິດທິພາບການໂຄສະນາປຸກລະດົມບໍລິ ຈາກເລືອດ ໂດຍອາໄສການຮ່ວມມືຂອງທຸກພາກສ່ວນ ແນໃສ່ສ້າງສັງຄົມແຫ່ງການແບ່ງປັນ ແລະ ຊ່ວຍເຫຼືອຊີວິດເພື່ອນມະນຸດ.
(ຂ່າວ: ແສງຈັນ)
ຄໍາເຫັນ