ອີງຕາມຂໍ້ມູນຈາກ FAO, ວິກິດການຄວາມອຶດຫີວ ແລະ ການຂາດສານອາຫານທົ່ວໂລກຍັງເປັນສິ່ງທ້າທາຍອັນໜັກໜ່ວງ ໂດຍມີປະຊາກອນປະມານ 7.8% ປະສົບກັບຄວາມອຶດຫີວ ແລະ 25.8% ປະສົບກັບຄວາມບໍ່ໝັ້ນຄົງດ້ານສະບຽງອາຫານໃນລະດັບປານກາງ ຫຼື ຮຸນແຮງ ຈາກຜົນກະທົບຂອງຄວາມຜັນຜວນທາງເສດຖະກິດ, ສົງຄາມ ແລະ ໄພພິບັດ.
ສຳລັບ ສປປ ລາວ, ບັນຫາຄວາມທຸກຍາກຍັງຄົງເປັນສິ່ງທ້າທາຍ ຊຶ່ງປັດຈຸບັນຍັງມີຄອບຄົວທຸກຍາກກວມ 14.7% ຂອງຄອບຄົວທັງໝົດ ແລະ ອັດຕາການຂາດສານອາຫານຂອງເດັກນ້ອຍອາຍຸຕໍ່າກວ່າ 5 ປີ ຍັງຢູ່ໃນລະດັບສູງ. ພັກ ແລະ ລັດຖະບານ ຈຶ່ງໄດ້ບັນຈຸວຽກງານນີ້ ເຂົ້າໃນແຜນພັດທະນາເສດຖະກິດ-ສັງຄົມ ແຫ່ງຊາດ ແລະ ວາລະແຫ່ງຊາດວ່າດ້ວຍການພັດທະນາຊົນນະບົດ ແລະ ແກ້ໄຂຄວາມທຸກຍາກ.
ງານມະຫະກຳຄັ້ງໃຫຍ່ ຈະຈັດຂຶ້ນ ວັນທີ 6-7 ພະຈິກ 2026 ນີ້ ເພື່ອສ້າງຈິດສຳນຶກ ແລະ ລະດົມທຸກພາກສ່ວນເຂົ້າຮ່ວມຢ່າງເປັນຂະບວນຟົດຟື້ນ, ກະຊວງກະສິກໍາ ແລະ ສິ່ງແວດລ້ອມ ສົມທົບກັບ ສູນກາງຊາວໜຸ່ມ ປະຊາຊົນປະຕິວັດລາວ, ສະຫະພັນແມ່ຍິງ ແລະ ບັນດາຄູ່ຮ່ວມພັດທະນາ ຈະໄດ້ຈັດງານສະເຫຼີມສະຫຼອງວັນອາຫານໂລກ ຄົບຮອບ 46 ປີ ຂຶ້ນໃນວັນທີ 6-7 ພະຈິກ 2026 ທີ່ສວນອາຊຽນ ປະຕູໄຊ ນະຄອນຫຼວງວຽງຈັນ. ງານດັ່ງກ່າວຈັດຂຶ້ນພາຍໃຕ້ຄຳຂວັນ: “ພັດທະນາໃນມື້ນີ້ ເພື່ອຄວາມອຸດົມສົມບູນໃນອະນາຄົດ” (Innovate today. Nourish tomorrow)
ພາຍໃນງານມີກິດຈະກຳທີ່ໜ້າສົນໃຈ ເປັນຕົ້ນແມ່ນເວທີສໍາມະນາແຫ່ງຊາດ ວ່າດ້ວຍເລື່ອງສະບຽງອາຫານ ແລະ ການພັດທະນາ, ເວທີຊາວໜຸ່ມລາວ ເລົ່າປະສົບການ ແລະ ສົນທະນາກ່ຽວກັບລະບົບສະບຽງອາຫານແບບຍືນຍົງ, ງານວາງສະແດງ ຈັດສະແດງບັນດານະວັດຕະກໍາ, ຜະລິດຕະພັນກະສິກໍາທີ່ໂດດເດັ່ນ ແລະ ກິດຈະກຳອື່ນໆອີກຫຼາຍລາຍການ. ກະຊວງກະສິກຳ ແລະ ສິ່ງແວດລ້ອມ ຕາງໜ້າໃຫ້ຄະນະຮັບຜິດຊອບ ໄດ້ຮຽກຮ້ອງມາຍັງພາກລັດ, ເອກະຊົນ, ປວງຊົນລາວທຸກຖ້ວນໜ້າ ຕະຫຼອດຮອດຄູ່ຮ່ວມພັດທະນາ ໃຫ້ມາຮ່ວມມືກັນເປັນເຈົ້າການ ເພື່ອຂັບເຄື່ອນວຽກງານການຜະລິດກະສິກຳ ຄໍ້າປະກັນດ້ານສະບຽງອາຫານ ແລະ ນຳພາ ປະຊາຊົນ ຫຼຸດພົ້ນອອກຈາກຄວາມທຸກຍາກຢ່າງຖາວອນ. ພິທີຖະແຫຼງຂ່າວດັ່ງກ່າວ ຈັດຂຶ້ນໃນວັນທີ 15 ຕຸລານີ້, ທີ່ກະຊວງກະສິກໍາ ແລະ ສິ່ງແວດລ້ອມ ໂດຍ ທ່ານ ລິນຄໍາ ດວງສະຫວັນ ລັດຖະມົນຕີ ກະຊວງ ກະສິກໍາ ແລະ ສິ່ງແວດລ້ອມ.
(ຂ່າວ: ແສງຈັນ)
ຄໍາເຫັນ