ໃນໂອກາດທີ່ເດີນທາງເຂົ້າຮ່ວມກອງປະຊຸມເຄືອຂ່າຍບັນດານະຄອນອາຊີຕາເວັນອອກສ່ຽງໃຕ້ຂອງ ສະມາຄົມ AIMF, ກອງປະຊຸມບັນດາເຈົ້າຄອງນະຄອນຫຼວງອາຊຽນ ແລະ ກອງປະຊຸມເວທີເຈົ້ານະຄອນອາຊຽນ ທີ່ ນວ ເປັນເຈົ້າພາບ ຈັດຂຶ້ນໃນລະຫວ່າງວັນທີ 17-19 ກັນຍາ 2024 ນີ້.
ທ່ານ ອາດສະພັງທອງ ສີພັນດອນ ໄດ້ສະແດງການຕ້ອນຮັບ, ຕີລາຄາສູງ ແລະ ລາຍງານວ່າ: ສຳລັບການພັດທະນາເສດຖະກິດ ຂອງນະຄອນຫຼວງວຽງຈັນ ໃນ 6 ເດືອນຕົ້ນປີ 2024 ຂະແໜງກະສິກໍາ ຂະຫຍາຍຕົວ ເພີ່ມຂຶ້ນ 4,2% ກວມເອົາ 13% ຂອງ GDP; ຂະແໜງອຸດສາຫະກຳຂະຫຍາຍຕົວ ເພີ່ມຂຶ້ນ 7,05% ກວມເອົາ 48% ຂອງ GDP ແລະ ຂະແໜງການບໍລິການຂະຫຍາຍຕົວ ເພີ່ມຂຶ້ນ 3,8% ກວມເອົາ 39% ຂອງ GDP. ໃນນັ້ນ, ດ້ານການພັດທະນາຕົວເມືອງ: ໄດ້ຈັດຕັ້ງປະຕິບັດວຽກງານຮັກສາຄວາມສະອາດຕົວເມືອງ, ອະນາໄມເສັ້ນທາງສາຍຫຼັກ ແລະ ບັນດາແຜນງານຕ່າງໆ ກ່ຽວກັບການຄຸ້ມຄອງຂີ້ເຫຍື້ອ ໃນນະຄອນຫຼວງວຽງຈັນ ຕາມຍຸດທະສາດ ແລະ ແຜນດຳເນີນງານການຄຸ້ມຄອງຂີ້ເຫຍື້ອແບບຢືນຍົງ ປີ 2021-2030; ໄດ້ສ້ອມແປງ, ປະດັບປະດາຕາມເສັ້ນທາງ, ຖະໜົນສາຍຫຼັກ, ບັນດາໂຮງແຮມ, ຮ້ານອາຫານ, ສວນສາທາລະນະຕ່າງໆ ເພື່ອກະກຽມຕ້ອນຮັບກອງປະຊຸມອາຊຽນ ຄັ້ງທີ 44-45 ທີ່ ສປປ ລາວ ຈະເປັນເຈົ້າພາບໃນເດືອນຕຸລາ ປີ 2024 ທີ່ຈະມາເຖິງນີ້.
ຜ່ານມາ ລາວ ແລະ ສິງກະໂປ ໄດ້ມີການພົວພັນຮ່ວມມືກັນດ້ວຍດີຕະຫຼອດມາ, ລັດຖະບານສິງກະໂປໄດ້ໃຫ້ການຊ່ວຍເຫຼືອ ສປປ ລາວ ກໍຄື ນະຄອນຫຼວງວຽງຈັນ ຫຼາຍດ້ານໂດຍສະເພາະດ້ານການສຶກສາ ແລະ ພັດທະນາຊັບມະກອນມະນຸດ. ໃນແຕ່ລະປີສະຖານທູດສິງກະໂປ ໄດ້ໃຫ້ທຶນແກ່ພະນັກງານລັດຖະກອນ ຂອງ ສປປ ລາວ ໃນການຝຶກອົບຮົບ ແລະ ຍົກລະດັບພາສາອັງກິດ ແລະ ຫົວຂໍ້ຕ່າງໆ ຢູ່ ສູນການຮ່ວມມືລາວ-ສິງກະໂປ.
ການພົບປະຢ້ຽມຢາມໃນຄັ້ງນີ້, ເປັນຂີດໝາຍອັນສຳຄັນໜຶ່ງຂອງການພົວພັນຮ່ວມມື ລະຫວ່າງ ນະຄອນຫຼວງວຽງຈັນ ແລະ ນະຄອນຕາເວັນອອກສ່ຽງໃຕ້ຂອງສິງກະໂປ ແລະ ເພື່ອເປັນການເສີມຂະຫຍາຍການພົວພັນຮ່ວມມື ຂອງສອງນະຄອນໃຫ້ກ້າວເຂົ້າສູ່ລວງເລິກ ແລະ ເປັນຮູບປະທຳຕົວຈິງ ແລະ ສະເໜີໃຫ້ມີການແລກປ່ຽນບົດຮຽນການບໍລິຫານຈັດການຕົວເມືອງ ໂດຍສະເພາະການກໍາຈັດສິ່ງເສດເຫຼືອ, ວຽກງານການສຶກສາ ແລະ ສາທາລະນະສຸກ ຊຶ່ງທາງສິງກະໂປ ມີບົດຮຽນ ແລະ ປະສົບການຫຼາຍ.
ທ່ານໂມດ ຟາມມີ ບິນ ອາລິມານ ໄດ້ສະແດງຄວາມຂອບໃຈທີ່ໃຫ້ການຕ້ອນຮັບຢ່າງອົບອຸຸ່ນ ແລະ ສະແດງຄວາມຍິນດີທີ່ ສປປ ລາວ ເປັນເຈົ້າພາບຈັດກອງປະຊຸມໃນຄັ້ງນີ້, ທັງຢືນຢັນຈະສືບຕໍ່ໃຫ້ໃຫ້ການຊ່ວຍເຫຼືອ ນະຄອນຫຼວງວຽງຈັນ ກໍຄື ສປປ ລາວໃນຂົງເຂດວຽກງານຕ່າງໆໃນອະນາຄົດ.(ຂ່າວ: ວັນເພັງ-ພາບ: ສຸກສະຫວັນ)
ຄໍາເຫັນ