 |
ພາຍຫຼັງທີ່ ສະໂມສອນ ດັບເບິນຢູໄອຈີ ປ້ອງກັນແຊັມສະໄໝທີ 2 ຕິດຕໍ່ກັນ ລາຍການ ໄອເບີ ຄັບ 2026 ທີ່ປະເທດປອກຕຸຍການ ກໍໄດ້ເດີນທາງມາເຖິງນະຄອນຫຼວງວຽງຈັນ ສປປ ລາວ ໃນຕອນເຊົ້າວັນທີ 8 ກໍລະກົດ 2026 ທີ່ສະໜາມບິນສາກົນວັດໄຕ ນຳພາໂດຍທ່ານ ວຽງໄຊ ວິໄລກຸນ ປະທານສະໂມສອນ ດັບເບິນຢູໄອຈີ ນາຄາ ກໍໄດ້ມີຄະນະນຳຈາກກະຊວງສຶກສາທິການ ແລະ ກິລາ ພ້ອມຂະບວນລົດຈັກ ຮາເລ້ ຈຳນວນ 50 ຄັນ ນຳພາແຫ່ຂະບວນ ຕາມທ້ອງຖະໜົນຢ່າງເປັນຂະບວນຄຶກຄື້ນ ກ່ອນໄດ້ຮັບການຕ້ອນຮັບຢ່າງສົມກຽດທີ່ປະຕູໄຊ ໂດຍທ່ານ ນາງ ວິໄລວອນ ຈັນທະລາຕີ ຮອງປະທານຄະນະກຳມະການປົກຄອງ ນະຄອນຫຼວງວຽງຈັນ ພ້ອມດ້ວຍບັນດາຄະນະພະແນກອ້ອມຂ້າງ ແລະ ມວນຊົນທັງຊາວລາວ ແລະ ຊາວຕ່າງຊາດ ຕະຫຼອດຮອດຜູ້ປົກຄອງ ຮ່ວມສະແດງຄວາມຍິນດີ.
ທ່ານ ຕົ້ນຈັກກິດ ນ້ອຍສົມສີ ຫົວໜ້າຄູຝຶກສະໂມສອນ ດັບເບິນຢູໄອຈີ ນາຄາ ໃຫ້ສຳພາດວ່າ: ກ່ອນຈະປ້ອງກັນແຊັມໃນການແຂ່ງຂັນລາຍການດັ່ງກ່າວ ພວກເຮົາໄດ້ເດີນທາງໄປເກັບຕົວຝຶກຊ້ອມເປັນເດືອນ ຕອນນີ້ ຄິດຮອດເຂົ້າໜ້ຽວ ແລະ ຕຳໝາກຮຸ່ງແຮງ ນັກກິລາທຸກຄົນຊຸດນີ້ ພ້ອມພຽງກັນສູ້ໄດ້ເຕັມທີ່ ເຮັດຜົນງານອອກມາດີຫຼາຍ ສາມາດເອົາຊະນະຄູແຂ່ງຂັນ ຂາດຮອຍ ແລະ ປ້ອງກັນແຊັມໄດ້ສຳເລັດ ງານຕໍ່ໄປພວກເຮົາຈະໄດ້ກຽມໄປແຂ່ງຂັນທີ່ນະຄອນຊຽງໄຮ ສປ ຈີນ ຊຶ່ງເປັນລາຍການທີ່ລັດຖະບານຈີນຈັດຂຶ້ນ ໂດຍໄດ້ມີການເຊີນເອົາ 8 ສະໂມສອນລະດັບຊັ້ນນຳ ມາຮ່ວມຊີງໄຊ, ໃນນັ້ນ ກໍມີສະໂມສອນບາເຊໂລນາ ແລະ ທີມດັງໃນປະເທດຍີ່ປຸ່ນ ມາຮ່ວມແຂ່ງຂັນ ຂໍຝາກເປັນກຳລັງໃຈໃຫ້ນັກເຕະທຸກຄົນຕື່ມ ແລ້ວພວກເຮົາຈະພະຍາຍາມຍາດແຊັມມາຝາກ ເພື່ອຄວາມພາກພູມໃຈຂອງຊາວລາວທຸກຄົນ.
ຂ່າວ: ສົງການ ພັນແພງດີ
ຄໍາເຫັນ