ຮອງນາຍົກລັດຖະມົນຕີ ລັດຖະມົນຕີກະຊວງການຕ່າງປະເທດ ແຫ່ງ ສສ ຫວຽດນາມ ພ້ອມພັນລະຍາ ແລະ ຄະນະ ໄດ້ເດີນທາງມາຢ້ຽມຢາມແຂວງຈຳປາສັກ, ໂດຍໄດ້ຕ້ອນຮັບອັນອົບອຸ່ນ ຂອງທ່ານ ອາລຸນໄຊ ສູນນະລາດ ເຈົ້າແຂວງຈໍາປາສັກ ພ້ອມດ້ວຍຄະນະ.
ໂອກາດນີ້, ທ່ານ ເຈົ້າແຂວງຈໍາປາສັກ ໄດ້ສະແດງຄວາມຍິນດີຕ້ອນຮັບອັນອົບອຸ່ນ ແລະ ຕີລາຄາສູງຕໍ່ ທ່ານ ຮອງນາຍົກລັດຖະມົນຕີ ທີ່ເຄື່ອນໄຫວຢ້ຽມຢາມ ສປປ ລາວ, ໂດຍສະເພາະແມ່ນແຂວງຈຳປາສັກ, ເພື່ອສືບຕໍ່ເສີມຂະຫຍາຍການພົວພັນຮ່ວມມືສອງປະເທດ ໃຫ້ໄດ້ຮັບການເພີ່ມພູນຄູນສ້າງຂຶ້ນໄປເລື້ອຍໆ; ເພີ່ມທະວີການຮ່ວມມືທາງດ້ານເສດຖະກິດ ຢ່າງສົມຄູ່ກັບການເມືອງ ດຶງດູດການລົງທຶນຂອງນັກລົງທຶນຫວຽດນາມ ໂດຍສະເພາະດ້ານກະສິກໍາ ແລະ ການທ່ອງທ່ຽວ. ພ້ອມນີ້, ກໍໄດ້ຕີລາຄາສູງຕໍ່ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ. ພ້ອມນັ້ນ, ທ່ານເຈົ້າແຂວງຈຳປາສັກ ກໍ່ໄດ້ກ່າວລາຍງານສະພາບລວມ ຂອງແຂວງ ໂດຍສັງເຂບ, ວຽກງານຈຸດສຸມ, ການປະຕິບັດບັນດາຄາດໝາຍ ແຜນເສດຖະກິດ-ສັງຄົມ, ການຫັນໄປສູ່ທັນສະໄໝ, ການກະກຽມດຳເນີນກອງປະຊຸມໃຫ່ຍສາມຂັ້ນ ຂອງແຂວງ ແລະ ວຽກງານກະກຽມໃຫ້ແກ່ສະເຫຼີມສະຫຼອງວັນສໍາຄັນຂອງພັກ-ຊາດ ໃນປີຕໍ່ໜ້າ.
ໂອກາດດຽວກັນນີ້, ທ່ານ ບຸຍແທັງເຊີນ ໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ, ພ້ອມທັງຊົມເຊີຍບັນດາໝາກຜົນ, ການເຕີບໃຫ່ຍຂະຫຍາຍຕົວຂອງເສດຖະກິດມະຫາພາກ ປະກອບສ່ວນເຂົ້າໃນການພັດທະນາເສດຖະກິດຂອງປະເທດ, ໂດຍສະເພາະ ແມ່ນການບໍລິການ, ການທ່ອງທ່ຽວຂອງແຂວງ ທີ່ມີລັກສະນະອັນໂດດເດັ່ນ ຄ້າຍຄືກັບບັນດາແຂວງພາກໃຕ້ຫວຽດນາມ, ພ້ອມນັ້ນ, ທ່ານ ຍັງໄດ້ແຈ້ງໃຫ້ຊາບ ກ່ຽວກັບຈຸດປະສົງ ຂອງການມາຢ້ຽມຢາມ ແລະ ເຮັດວຽກ ຢູ່ ສປປ ລາວ ແລະ ແຂວງຈຳປາສັກ ໃນຄັ້ງນີ້.
(ແຫຼ່ງຂ່າວ: ແຂວງຈໍາປາສັກ)
ຄໍາເຫັນ