ທ່ານຄຳໃບດຳລັດຮອງປະທານສະພາແຫ່ງຊາດໄດ້ຕ້ອນຮັບການຢ້ຽມຂ່ຳນັບຂອງທ່ານຕວງອັນທະໄຊສະມາຊິກວຸດທິສະພາປະທານຄະນະມິດຕະພາບລັດຖະສະພາໄທ-ລາວພ້ອມດ້ວຍຄະນະເມື່ອວັນທີ15ກຸມພາ ຜ່ານມາທີ່ຫໍສະພາແຫ່ງຊາດໃນໂອກາດມາຢ້ຽມຢາມແລະເຮັດວຽກຢູ່ສປປລາວ.
ທ່ານຮອງປະທານສະພາແຫ່ງຊາດໄດ້ສະເເດງຄວາມຍິນດີຕ້ອນຮັບຢ່າງອົບອຸ່ນພ້ອມທັງຕີລາຄາສູງຕໍ່ການຢ້ຽມຢາມຂອງຄະນະດັ່ງກ່າວຊຶ່ງເປັນການເສີມຂະຫຍາຍສາຍພົວພັນມິດຕະພາບແລະການຮ່ວມມືຖານບ້ານໃກ້ເຮືອນຄຽງທີ່ດີທີ່ມີມາແຕ່ດົນນານບົນພື້ນຖານການເປັນຄູ່ຮ່ວມຍຸດທະສາດລະຫວ່າງສອງປະເທດລາວ-ໄທກໍຄືສອງອົງການນິຕິບັນຍັດໃຫ້ໄດ້ຮັບການເສີມຂະຫຍາຍຍິ່ງໆຂຶ້ນ; ຕີລາຄາສູງແລະສະແດງຄວາມຊົມເຊີຍຕໍ່ຜົນການພົບປະເຮັດວຽກລະຫວ່າງສອງຄະນະມິດຕະພາບລາວ-ໄທ, ໄທ-ລາວຊຶ່ງສອງຝ່າຍໄດ້ທົບທວນຕີລາຄາຄືນການພົວພັນຮ່ວມມືໃນໄລຍະຜ່ານມາແລະກໍານົດທິດທາງແຜນການຮ່ວມມືໃນຕໍ່ໜ້າພ້ອມທັງໄດ້ຮ່ວມກັນແລກປ່ຽນບົດຮຽນທີ່ດີແລະປະສົບການການປະຕິບັດໜ້າທີ່ວຽກງານຂອງຕົນແລະຫົວຂໍ້ອື່ນໆທີ່ສອງຝ່າຍມີຄວາມສົນໃຈນໍາກັນ. ສຳລັບການພົວພັນຮ່ວມມືລະຫວ່າງສອງອົງການນິຕິບັນຍັດລາວ-ໄທໃນໄລຍະຜ່ານມາໄດ້ຮັບການພັດທະນາຢ່າງຕໍ່ເນື່ອງ, ສອງຝ່າຍມີການແລກປ່ຽນຢ້ຽມຢາມຂອງຄະນະຜູ້ແທນຂັ້ນສູງແລະຂັ້ນຕ່າງໆນຳກັນເປັນປົກກະຕິ, ອັນພົ້ນເດັ່ນແມ່ນການຢ້ຽມຢາມຢ່າງເປັນທາງການຢູ່ຣາຊະອານາຈັກໄທຂອງທ່ານໄຊສົມພອນພົມວິຫານປະທານສະພາແຫ່ງຊາດເມື່ອເດືອນຕຸລາ2022ແລະໄດ້ລົງນາມບົດບັນທຶກຄວາມເຂົ້າໃຈວ່າດ້ວຍການຮ່ວມມືກັນເປັນສະບັບທຳອິດຂອງສອງອົງການນິຕິບັນຍັດລາວ-ໄທ.
ໃນນາມຄະນະປະຈຳສະພາແຫ່ງຊາດ, ທ່ານຄຳໃບດຳລັດໄດ້ສະເໜີໃຫ້ສອງຄະນະມິດຕະພາບລັດຖະສະພາສືບຕໍ່ຍົກລະດັບການພົວພັນຮ່ວມມືກັນເພື່ອເສີມຂະຫຍາຍສາຍພົວພັນແລະການຮ່ວມມືຂອງສອງອົງການນິຕິບັນຍັດໃຫ້ນັບມື້ນັບເຂົ້າສູ່ລວງເລິກແລະເປັນຮູບປະທຳຍິ່ງໆຂຶ້ນໂດຍສະເພາະການແລກປ່ຽນຄະນະຜູ້ແທນຮ່ວມກັນຢ່າງປົກກະຕິແລະຕໍ່ເນື່ອງ, ແລກປ່ຽນບົດຮຽນໃນຫົວຂໍ້ວິທະຍາສາດຕ່າງໆທີ່ສອງຝ່າຍມີຄວາມສົນໃຈຮ່ວມກັນ; ໃນປີນີ້ສປປລາວຈະເປັນປະທານອາຊຽນແລະສະພາແຫ່ງຊາດກໍຈະເປັນປະທານກອງປະຊຸມໃຫຍ່ສະມັດຊາລັດຖະສະພາລະຫວ່າງຊາດອາຊຽນ (ໄອປາ) ຫວັງຢ່າງຍິ່ງວ່າຈະໄດ້ຮັບການສະໜັບສະໜູນຈາກລັດຖະບານກໍຄືລັດຖະສະພາໄທເພື່ອໃຫ້ສປປລາວສຳເລັດໜ້າທີ່ຢ່າງຈົບງາມ.
ທ່ານຕວງອັນທະໄຊໄດ້ກ່າວສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນພ້ອມທັງແຈ້ງໃຫ້ຊາບຈຸດປະສົງການມາຢ້ຽມຢາມ, ເຮັດວຽກຢູ່ສປປລາວຊຶ່ງເປັນການຢ້ຽມຢາມເທື່ອທໍາອິດພາຍຫຼັງໄດ້ຮັບການແຕ່ງຕັ້ງເປັນປະທານຄະນະມິດຕະພາບລັດຖະສະພາໄທ-ລາວແລະຜົນສຳເລັດໃນການພົບປະເຮັດວຽກກັບຄະນະມິດຕະພາບລັດຖະສະພາລາວ-ໄທ; ໃຫ້ຄຳໝັ້ນວ່າຈະສືບຕໍ່ປະກອບສ່ວນເສີມຂະຫຍາຍສາຍພົວພັນມິດຕະພາບແລະການຮ່ວມມືຖານບ້ານໃກ້ເຮືອນຄຽງທີ່ດີທີ່ມີມາແຕ່ດົນນານລະຫວ່າງສອງປະເທດກໍຄືສອງອົງການນິຕິບັນຍັດໃຫ້ໄດ້ຮັບການເສີມຂະຫຍາຍແລະເປັນຮູບປະທຳຍິ່ງໆຂຶ້ນໄປລວມທັງຈະສະໜັບສະໜູນສະພາແຫ່ງຊາດລາວໃນການເປັນປະທານໄອປາ.
ກ່ອນໜ້ານີ້ ໃນວັນດຽວກັນທີ່ສະພາແຫ່ງຊາດ, ທ່ານສຸບັນສະວະບຸດປະທານກໍາມາທິການວຽກງານສະມາຊິກສະພາແຫ່ງຊາດປະທານຄະນະມິດຕະພາບລັດຖະສະພາລາວ-ໄທພ້ອມດ້ວຍຄະນະໄດ້ພົບປະສອງຝ່າຍກັບທ່ານຕວງອັນທະໄຊສະມາຊິກວຸດທິສະພາປະທານຄະນະມິດຕະພາບລັດຖະສະພາໄທ-ລາວພ້ອມດ້ວຍຄະນະ; ທັງສອງຝ່າຍໄດ້ສະແດງຄວາມປິຕິຍິນດີແລະຕີລາຄາສູງຕໍ່ການພົບປະໃນຄັ້ງນີ້ຊຶ່ງເປັນການນໍາເອົາໄມຕີຈິດມິດຕະພາບອັນອົບອຸ່ນແລະຄວາມສາມັກຄີຮັກແພງຂອງລັດຖະສະພາແລະປະຊາຊົນໄທມາຍັງສະພາແຫ່ງຊາດແລະປະຊາຊົນລາວບັນດາເຜົ່າ ຊຶ່ງເປັນການປະກອບສ່ວນເສີມຂະຫຍາຍສາຍພົວພັນມິດຕະພາບແລະການຮ່ວມມືຖານບ້ານໃກ້ເຮືອນຄຽງທີ່ດີທີ່ມີແຕ່ດົນນານບົນພື້ນຖານການເປັນຄູ່ຮ່ວມຍຸດທະສາດລະຫວ່າງສອງປະເທດລາວ-ໄທ, ໄທ-ລາວກໍຄືສອງອົງການນິຕິບັນຍັດພ້ອມທັງເປັນການຈັດຕັ້ງຜັນຂະຫຍາຍບົດບັນທຶກວ່າດ້ວຍການຮ່ວມມືລະຫວ່າງສະພາແຫ່ງຊາດແຫ່ງສປປລາວແລະສະພາຜູ້ແທນລາສະດອນແຫ່ງຣາຊະອານາຈັກໄທໃຫ້ປາກົດຜົນເປັນຈິງແລະນໍາເອົາຜົນປະໂຫຍດມາສູ່ປະຊາຊົນສອງຊາດ.
ທ່ານສຸບັນສະວະບຸດແຈ້ງໃຫ້ຊາບວ່າ: ການພົວພັນຮ່ວມມືລະຫວ່າງສະພາແຫ່ງຊາດລາວກັບລັດຖະສະພາໄທໃນໄລຍະຜ່ານມາໄດ້ຮັບການເສີມຂະຫຍາຍຢ່າງຕັ້ງໜ້າຊຶ່ງສະແດງອອກມີການແລກປ່ຽນຢ້ຽມຢາມຂອງຄະນະຜູ້ແທນລະດັບສູງ, ກຳມາທິການ, ຄະນະເລຂາທິການ, ຄະນະມິດຕະພາບລັດຖະສະພາ;ມີການແລກປ່ຽນຂໍ້ມູນຂ່າວສານກ່ຽວກັບການຈັດຕັ້ງປະຕິບັດພາລະບົດບາດນິຕິບັນຍັດ, ການຮ່ວມມືແລະສະໜັບສະໜູນເຊິ່ງກັນແລະກັນໃນເວທີລັດຖະສະພາພາກພື້ນແລະສາກົນ. ພິເສດ, ໄດ້ຮ່ວມກັນລົງນາມບົດບັນທຶກຄວາມເຂົ້າໃຈວ່າດ້ວຍການຮ່ວມມືລະຫວ່າງສະພາແຫ່ງຊາດລາວກັບລັດຖະສະພາໄທໃນເດືອນທັນວາ2022ຊຶ່ງເປັນນິມິດໝາຍອັນສໍາຄັນທາງປະຫວັດສາດແຫ່ງການພົວພັນຮ່ວມມືລະຫວ່າງສອງອົງການນິຕິບັນຍັດ, ເປັນການປະກອບສ່ວນຢ່າງຕັ້ງໜ້າໃນການຈັດຕັ້ງປະຕິບັດແຜນປະຕິບັດງານການເປັນຄູ່ຮ່ວມຍຸດທະສາດເພື່ອການຈະເລີນເຕີບໂຕແລະການພັດທະນາແບບຍືນຍົງລະຫວ່າງສອງປະເທດລາວ-ໄທ.
ເພື່ອເຮັດໃຫ້ສອງອົງການນິຕິບັນຍັດລາວ-ໄທ, ໄທ-ລາວສືບຕໍ່ຮ່ວມມືກັນຢ່າງເປັນຮູບປະທໍາຍິ່ງຂຶ້ນທັງສອງຝ່າຍໄດ້ປຶກສາຫາລືກ່ຽວກັບແຜນການຮ່ວມມືໃນຕໍ່ໜ້າໂດຍສະເພາະແມ່ນການສືບຕໍ່ແລກປ່ຽນຄະນະຜູ້ແທນຄະນະມິດຕະພາບລັດຖະສະພາໃນນາມເປັນກົນໄກການພົວພັນຮ່ວມມືລະຫວ່າງສອງອົງການນິຕິບັນຍັດຂອງສອງປະເທດພ້ອມທັງແລກປ່ຽນຂໍ້ມູນຂ່າວສານໃນການປະຕິບັດພາລະບົດບາດຂອງອົງການນິຕິບັນຍັດແລະໃນຫົວຂໍ້ອື່ນໆທີ່ສອງຝ່າຍມີຄວາມສົນໃຈເປັນຕົ້ນແມ່ນການສ້າງກິດຈະກຳຫຼືໂຄງການໃດໜຶ່ງທີ່ເປັນສັນຍະລັກມິດຕະພາບການຮ່ວມມືລະຫວ່າງສອງຄະນະລັດຖະສະພາລາວ-ໄທ, ໄທ-ລາວ; ການສ້າງຊັບພະຍາກອນມະນຸດເພື່ອຍົກສູງຂີດຄວາມສາມາດໃຫ້ແກ່ພະນັກງານຂອງສະພາແຫ່ງຊາດລາວ; ການຊຸກຍູ້ສົ່ງເສີມໃຫ້ນັກທຸລະກິດແລະບັນດາບໍລິສັດຂອງໄທມາລົງທຶນ, ການຮ່ວມມືດ້ານຕ່າງໆຢູ່ສປປລາວແລະລະຫວ່າງປະຊາຊົນກັບປະຊາຊົນຂອງສອງປະເທດໃຫ້ນັບມື້ເພີ່ມຂຶ້ນ; ຊຸກຍູ້ແລະສົ່ງເສີມການຈັດຕັ້ງປະຕິບັດບັນດາສັນຍາ, ສົນທິສັນຍາແລະຂໍ້ຕົກລົງຕ່າງໆທີ່ສອງລັດຖະບານຂອງສອງປະເທດລົງນາມຮ່ວມກັນໃຫ້ປາກົດເປັນຈິງ; ສືບຕໍ່ຮ່ວມມືແລະສະໜັບສະໜູນເຊິ່ງກັນແລະກັນໃນການເຄື່ອນໄຫວຢູ່ເວທີລັດຖະສະພາພາກພື້ນແລະສາກົນ.
ໃນໂອກາດມາຢ້ຽມຢາມແລະເຮັດວຽກຢູ່ສປປລາວຂອງຄະນະມິດຕະພາບລັດຖະສະພາໄທ-ລາວຄັ້ງນີ້ຍັງໄດ້ນຳເອົາອຸປະກອນການສຶກສາແລະຄອມພິວເຕີລວມມູນຄ່າທັງໝົດ472.000ບາດມາມອບໃຫ້ແກ່ໂຮງຮຽນສາມັນກິນນອນຊົນເຜົ່າວັງວຽງຊຶ່ງເປັນການຊ່ວຍເຫຼືອອັນລ້ຳຄ່າທາງດ້ານການສຶກສາໃຫ້ແກ່ສປປລາວ. ພິທີມອບ-ຮັບເຄື່ອງຊ່ວຍເຫຼືອໄດ້ຈັດຂຶ້ນໃນວັນທີ16ກຸມພາ2024ທີ່ໂຮງຮຽນດັ່ງກ່າວ, ມອບໂດຍທ່ານຕວງອັນທະໄຊແລະຕາງໜ້າຮັບໂດຍທ່ານລຳໄມກູດລາວົງຮອງປະທານສະພາປະຊາຊົນແຂວງວຽງຈັນ; ເຂົ້າຮ່ວມມີທ່ານສຸບັນສະວະບຸດ, ມີເອກອັກຄະລັດຖະທູດແຫ່ງສປປລາວປະຈຳຣາຊະອານາຈັກກໄທ, ເຈົ້າເມືອງວັງວຽງພ້ອມດ້ວຍຄະນະຜູ້ອຳນວຍການ, ຄູ-ອາຈານແລະນັກຮຽນໂຮງຮຽນສາມັນກິນນອນຊົນເຜົ່າວັງວຽງ; ຄະນະມິດຕະພາບລັດຖະສະພາໄທ-ລາວຍັງໄດ້ຢ້ຽມຢາມພື້ນຖານທາງດ້ານວັດທະນະທຳແລະທ່ອງທ່ຽວຈຳນວນໜຶ່ງຢູ່ນະຄອນຫຼວງວຽງຈັນ, ແຂວງວຽງຈັນແລະແຂວງຫຼວງພະບາງອີກດ້ວຍ.
(ຂ່າວ-ພາບ: ສພຊ)
ຄໍາເຫັນ