ເອກອັກຄະລັດຖະທູດ ວິສາມັນຜູ້ມີອຳນາດເຕັມ ແຫ່ງ ສປ ຈີນ ປະຈໍາ ສປປ ລາວ ຄົນໃໝ່ ໃນວັນທີ 21 ສິງຫາ ນີ້ ທີ່ຫ້ອງຮັບແຂກ ຄອສພ ເນື່ອງໃນໂອກາດທີ່ທ່ານ ນາງ ຟາງ ຫົງ ມາດຳລົງຕໍາແໜ່ງເຮັດໜ້າທີ່ການທູດປະຈໍາຢູ່ ສປປ ລາວ.
ໂອກາດນີ້, ທ່ານ ຄໍາພັນ ເຜີຍຍະວົງ ໄດ້ກ່າວສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ ທ່ານ ນາງ ຟາງ ຫົງທີ່ມາດຳລົງຕໍາແໜ່ງເຮັດໜ້າທີ່ການທູດຢູ່ ສປປ ລາວ ຄັ້ງນີ້; ພ້ອມທັງກ່າວວ່າ: ຕະຫຼອດໄລຍະທີ່ຜ່ານມາ ກໍຄືຫຼາຍປີຜ່ານມາ ໂດຍລວມການພົວພັນຂອງສອງປະເທດເຮົາ ຍາມໃດກໍສະໜິດສະໜົມ ແລະ ມີການຊ່ວຍເຫຼືອຊຶ່ງກັນ ແລະ ກັນ; ພັກ-ລັດ, ປະຊາຊົນລາວ ກໍສຸດທີ່ພາກພູມໃຈ ແລະ ສະແດງຄວາມຂອບໃຈຢ່າງສູງ ທີ່ພັກ-ລັດ, ປະຊາຊົນຈີນ ໄດ້ໃຫ້ການສະໜັບສະໜູນຊ່ວຍເຫຼືອຕະຫຼອດມາ ແລະ ໃນໄລຍະປ່ຽນແປງໃໝ່ມານີ້ ເຫັນວ່າພັກ-ລັດ ສປ ຈີນ ກໍໄດ້ຊຸກຍູ້ນັກທຸລະກິດຈີນ ມາລົງທຶນຢູ່ລາວເປັນອັນດັບໜຶ່ງ ຊຶ່ງອັນພົ້ນເດັ່ນກໍແມ່ນ ການຮ່ວມມືລົງທຶນໃສ່ໃນການສ້າງທາງລົດໄຟລາວ-ຈີນ ທີ່ໄດ້ປະກອບສ່ວນສຳຄັນເຂົ້າໃນການພັດທະນາເສດຖະກິດ-ສັງຄົມຂອງລາວຢ່າງໄວວາ. ເມື່ອຕົ້ນປີນີ້, ຄອສພ ແລະ ຄະນະໂຄສະນາສູນກາງພັກກອມມູນິດຈີນ ກໍໄດ້ມີການພົບປະກັນ ໂດຍປຶກສາຫາລື ແລກປ່ຽນຄໍາຄິດຄໍາເຫັນ ແລະ ໄດ້ຕົກລົງທີ່ຈະສືບຕໍ່ການຮ່ວມມືວຽກງານໂຄສະນາອົບຮົມໃຫ້ນັບມື້ນັບຫຼາຍຂຶ້ນ ຊຶ່ງມີກິດຈະກຳຕ່າງໆ ເປັນຕົ້ນການສ້າງສາລະຄະດີ ໂຄສະນາເຜີຍແຜ່ຊີວິດການເປັນຢູ່ຂອງປະຊາຊົນ ລຽບຕາມເລວທາງລົດໄຟ ລາວ-ຈີນ, ການຈັດສຳມະນາ, ແລກປ່ຽນຂໍ້ມູນຂ່າວສານ, ຝຶກອົບຮົມວິຊາການວຽກງານໂຄສະນາອົບຮົບ.... ເປັນສ່ວນສຳຄັນໃນການສືບຕໍ່ຮັດແໜ້ນສາຍພົວພັນອັນເປັນມູນເຊື້ອ ລະຫວ່າງ ສອງພັກ-ສອງລັດ, ປະຊາຊົນສອງຊາດ ລາວ-ຈີນ ໂດຍສະເພາະລະຫວ່າງ ສອງຄະນະໂຄສະນາອົບຮົມ ລາວ-ຈີນ. ສະນັ້ນ, ໃນໂອກາດທີ່ທ່ານທູດໄດ້ມາປະຈໍາຢູ່ ສປປ ລາວ ກໍຄິດວ່າຈະໄດ້ສືບຕໍ່ແຜນການຮ່ວມມືລະຫວ່າງ ສອງພັກ-ສອງລັດ ໃຫ້ນັບມື້ນັບໜັກແໜ້ນຂຶ້ນເລື້ອຍໆ.
ທ່ານ ນາງ ຟາງ ຫົງ ກໍໄດ້ສະແດງຄວາມຂອບໃຈ ທີ່ທ່ານຫົວໜ້າ ຄອສພ ໄດ້ໃຫ້ການຕ້ອນຮັບໃນຄັ້ງນີ້; ພ້ອມດຽວກັນ, ກໍໄດ້ກ່າວວ່າ: ສອງພັກ-ສອງລັດ ພວກເຮົາມີການແລກປ່ຽນມາແຕ່ດຶກດຳບັນ ແລະ ມີມິດຕະພາບພິເສດ, ອຸດົມການຮ່ວມກັນຂອງສອງຝ່າຍພວກເຮົາ ມີສາຍພົວພັນສະໜິດສະໜົມ ແລະ ເຮັດໃຫ້ເຮົາມີຄໍາຄິດຄໍາເຫັນທີ່ຄ້າຍຄື ກັນທາງດ້ານວຽກງານແນວຄິດ, ວັດທະນະທໍາ ແລະ ໂຄສະນາ; ສະນັ້ນ, ການເພີ່ມທະວີການແລກປ່ຽນບັນດາດ້ານດັ່ງກ່າວ ແມ່ນພາກສ່ວນທີ່ສຳຄັນຂອງການສ້າງຄູ່ຮ່ວມຊາຕາກຳ ຈີນ - ລາວ. ທ່ານທູດ ກໍໄດ້ກ່າວວ່າ: ຍິນດີທີ່ຈະສືບຕໍ່ເພີ່ມທະວີການຮ່ວມມືໃນດ້ານຕ່າງໆ ແລະ ຫວັງວ່າຈະໄດ້ຮັບການສະໜັບສະໜູນ ຊຶ່ງສະຖານເອກອັກຄະລັດຖະທູດ ແຫ່ງ ສປ ຈີນຍິນດີຮ່ວມກັນກັບຝ່າຍລາວ ຊຸກຍູ້ສາຍພົວພັນມິດຕະພາບລະຫວ່າງ ຈີນ - ລາວ.
ຕອນທ້າຍ, ທ່ານຫົວໜ້າ ຄອສພ ກໍໄດ້ອວຍພອນໃຫ້ການປະຕິບັດໜ້າທີ່ຂອງ ທ່ານ ທູດ ຢູ່ ສປປ ລາວ ປະສົບຜົນເລັດ; ຄອສພ ມີຄວາມຍິນດີຕ້ອນຮັບ ໃນການມາຕິດຕໍ່ພົວພັນວຽກງານ, ແລກປ່ຽນ ປຶກສາຫາລືກັນໄດ້ຕະຫຼອດ.
(ຂ່າວ-ພາບ: ສຸກສະຫວັນ)
ຄໍາເຫັນ