ໃນວັນທີ 26-29ສິງຫາຜ່ານມາ ເພື່ອເສີມຂະຫຍາຍສາຍພົວພັນການທູດດ້ານພັກ ແລະ ການທູດປະຊາຊົນລະຫວ່າງ ສປປລາວ ກັບ ຍີ່ປຸ່ນ.
ໃນການຢ້ຽມຢາມຄັ້ງນີ້, ທ່ານ ທອງສະຫວັນ ພົມວິຫານ ໄດ້ພົບປະ ແລະ ເຮັດວຽກກັບການນຳຂັ້ນສູງຂອງຍີ່ປຸ່ນຫຼາຍພາກສ່ວນ ເປັນຕົ້ນແມ່ນ ທ່ານນາງຄາມີຄາວາ ໂຍໂກ້ (Kamikawa Yoko)ລັດຖະມົນຕີກະຊວງຕ່າງປະເທດຍີ່ປຸ່ນ, ທ່ານຟູນາໂກຊີ ທາເກຮີໂຣ(FunakoshiTakehiro)ຮອງລັດຖະມົນຕີອາວຸໂສກະຊວງຕ່າງປະເທດຍີ່ປຸ່ນ, ທ່ານຊືເງະ ໂຍຊີຟູມີ (Tsuge Yoshifumi)ຮອງລັດຖະມົນຕີກະຊວງຕ່າງປະເທດຍີ່ປຸ່ນ,ທ່ານ ໂຄບາຢາຊິ ເຄັນອິຈິ (Kobayashi Kenichi)ອະດີດເອກອັກຄະຣາຖະທູດຍີ່ປຸ່ນປະຈໍາ ສປປລາວ, ການນໍາຂັ້ນສູງຈາກພັກເສລີປະຊາທິປະໄຕ(LDP), ພັກໂຄເມະໂຕ (Komeito), ສະມາຄົມມິດຕະພາບໄຊຕະມະ-ລາວ, ສະມາຄົມມິດຕະພາບ ຍີ່ປຸ່ນ-ລາວ ລັດຖະສະພາ. ນອກນັ້ນ, ຍັງໄດ້ພົບປະບາງພາກສ່ວນທຸລະກິດຍີ່ປຸນທີ່ມາລົງທຶນຢູ່ລາວ ເຊັ່ນ:Ana Food Co.,Ltd,Ussio Lab Co., Ltd.
ໃນການພົບປະ, ທັງສອງຝ່າຍໄດ້ຕີລາສູງຕໍ່ສາຍພົວພັນມິດຕະພາບ ແລະ ການຮ່ວມມືອັນເປັນມູນເຊື້ອຍາວນານລະຫວ່າງ ລາວ ແລະ ຍີ່ປຸ່ນຕະຫຼອດໄລຍະເວລາເກືອບ 70 ປີ ແຫ່ງການສ້າງຕັ້ງສາຍພົວພັນທາງການທູດ ແລະ ເກືອບ 10 ປີພາຍໃຕ້ການເປັນຄູ່ຮ່ວມມືຍຸດທະສາດ ຊຶ່ງໄດ້ປະກອບສ່ວນຢ່າງສໍາຄັນເຂົ້າໃນການສ້າງສາພັດທະນາຂອງສອງປະເທດ; ທັງສອງຝ່າຍໄດ້ແລກປ່ຽນສະພາບການພັດທະນາເສດຖະກິດ-ສັງຄົມໃຫ້ກັນຊາບ; ເຫັນດີເປັນເອກະພາບກັນໃນການສືບຕໍ່ເສີມຂະຫຍາຍສາຍພົວພັນການທູດດ້ານພັກ ແລະ ການທູດປະຊາຊົນ ເພື່ອຊຸກຍູ້ການຮ່ວມມືລະຫວ່າງສອງລັດຖະບານ, ສົ່ງເສີມຄວາມເຂົ້າໃຈລະຫວ່າງປະຊາຊົນສອງຊາດ, ຊຸກຍູ້ການຮ່ວມມືທາງດ້ານເສດຖະກິດ, ການຄ້າ, ການລົງທຶນ, ພະລັງງານສະອາດ,ການທ່ອງທ່ຽວ, ພ້ອມທັງຊອກຫາທ່າແຮງບົ່ມຊ້ອນຕ່າງໆໃຫ້ຫຼາຍຂຶ້ນຕື່ມ ໃນການຮ່ວມມືທີ່ສອງຝ່າຍມີຄວາມສົນໃຈ ແລະ ທ່າແຮງ ເພື່ອນໍາເອົາຜົນປະໂຫຍດຕົວຈິງມາສູ່ປະຊາຊົນສອງຊາດລາວ-ຍີ່ປຸ່ນ. ໃນການພົບປະຄັ້ງນີ້, ຝ່າຍລາວໄດ້ສະແດງຄວາມຂອບໃຈຢ່າງຈິງໃຈມາຍັງພັກ, ລັດແລະປະຊາຊົນຍີ່ປຸ່ນຕໍ່ການຮ່ວມມືແລະຊ່ວຍເຫຼືອສປປລາວ ໂດຍຜ່ານບັນດາໂຄງການຮ່ວມມື ແລະ ຊ່ວຍເຫຼືອຕ່າງໆ ໃນໄລຍະຜ່ານມາ ເປັນຕົ້ນແມ່ນການພັດທະນາຊັບພະຍາກອນມະນຸດ, ການເກັບກູ້ລະເບີດບໍ່ທັນແຕກ (UXO),ການກໍ່ສ້າງພື້ນຖານໂຄງລ່າງ, ກະສິກໍາ-ປ່າໄມ້, ການຫຼຸດຜ່ອນຄວາມທຸກຍາກ, ດ້ານມະນຸດສະທໍາ, ການສົ່ງຊ່ຽວຊານແລະອາສາສະໝັກຍີ່ປຸ່ນມາຊ່ວຍເຫຼືອລາວແລະອື່ນໆ ຊຶ່ງໄດ້ປະກອບສ່ວນອັນສໍາຄັນເຂົ້າໃນການການພັດທະນາເສດຖະກິດ-ສັງຄົມຂອງສປປລາວ ແລະ ຂອບໃຈຕໍ່ຝ່າຍຍີ່ປຸນທີ່ໄດ້ໃຫ້ການສະໜັບສະໜູນ ແລະ ຊ່ວຍເຫຼືອຕ່າງໆ ໃນການເປັນປະທານອາຊຽນໃນປີນີ້, ຝ່າຍຍີ່ປຸ່ນ ກໍໄດ້ໃຫ້ຄຳໝາຍໝັ້ນຈະສືບຕໍ່ສະໜັບສະໜູນ ສປປ ລາວ ໃນການເປັນປະທານອາຊຽນໃຫ້ຮັບຜົນສໍາເລັດຢ່າງຈົບງາມ.
ໃນໂອກາດຢ້ຽມຢາມຄັ້ງນີ້, ທີ່ສະຖານເອກອັກຄະລັດຖະທູດແຫ່ງ ສປປ ລາວ ປະຈຳ ຍີ່ປຸ່ນ,ຄະນະຜູ້ແທນລາວຍັງໄດ້ພົບປະໂອ້ລົມກັບພີ່ນ້ອງຄົນເຊື້ອຊາດລາວທີ່ດໍາລົງຊີວິດຢູ່ປະເທດຍີ່ປຸ່ນດ້ວຍບັນຍາກາດອັນສະໜິດສະໜົມ ແລະ ຮັກແພງໂດຍຖືວ່າ ພີ່ນ້ອງຄົນເຊື້ອຊາດລາວແມ່ນວົງຄະນາຍາດແຫ່ງຊາດທີ່ບໍ່ສາມາດຕັດແຍກອອກຈາກກັນໄດ້, ພ້ອມທັງຮຽກຮ້ອງໃຫ້ພີ່ນ້ອງເຊື້ອຊາດລາວເພີ່ມທະວີຄວາມສາມັກຄີຊ່ວຍເຫຼືອຊຶ່ງກັນແລະກັນ, ປົກປັກຮັກສາຄຸນຄ່າຂອງວັດທະນະທໍາລາວ, ພັດທະນາຕົນເອງໃຫ້ເຂັ້ມແຂງ, ສ້າງເປັນຄອບຄົວທີ່ມີຄວາມຜາສຸກ ແລະ ພ້ອມກັນປະກອບສ່ວນເຂົ້າໃນສາຍພົວພັນລະຫວ່າງ ຍິ່ປຸ່ນ ກັບ ສປປ ລາວໃຫ້ຈະເລີນຮຸ່ງເຮືອງ. ນອກນັ້ນ, ຄະນະຍັງໄດ້ທັດສະນະສຶກສາ ແລະ ຢ້ຽມຊົມສະຖານທີ່ທ່ອງທ່ຽວທາງປະຫວັດສາດ, ວັດທະນະທໍາຈໍານວນໜຶ່ງ ທີ່ນະຄອນຫຼວງໂຕກຽວ.
ການຢ້ຽມຢາມຍີ່ປຸ່ນຂອງຫົວໜ້າຄະນະພົວພັນຕ່າງປະເທດສູນກາງພັກໃນຄັ້ງນີ້ໄດ້ປະສົບຜົນສໍາເລັດຕາມຄາດໝາຍຖືເປັນບາດກ້າວທີ່ສຳຄັນໃນການເສີມຂະຫຍາຍສາຍພົວພັນມິດຕະພາບທີ່ມີມູນເຊື້ອອັນດີງາມຂອງສອງຊາດ ແລະ ກະກຽມໃຫ້ແກ່ສະ ເຫຼີມສະຫຼອງ 70 ປີ ແຫ່ງການສ້າງຕັ້ງສາຍພົວພັນການທູດລະຫວ່າງ ສປປລາວ ແລະ ຍີ່ປຸ່ນ, 10 ປີ ແຫ່ງການຍົກລະດັບ ການພົວພັນເປັນຄູ່ຮ່ວມຍຸດທະສາດໃນປີ 2025.
ຂ່າວ: ຄະນະພົວພັນຕ່າງປະເທດສູນກາງພັກ
ຄໍາເຫັນ