ມີບັນຄະນະພັກ-ຄະນະນໍາ ພ້ອມດ້ວຍສະມາຊິກພັກ-ພະນັກງານ ພາຍໃນ ຫສພ ເຂົ້າຮ່ວມຢ່າງພ້ອມພຽງ.
ສະຫາຍ ທອງສະລິດ ມັງໜໍ່ເມກ ໄດ້ເຜີຍແຜ່ມະຕິຂອງຄະນະບໍລິຫານງານສູນກາງພັກ ສະບັບເລກທີ 03/ຄບສພ, ລົງວັນທີ 12 ມີນາ 2025 ວ່າດ້ວຍການປັບປຸງກົງຈັກການຈັດຕັ້ງ, ມະຕິ ກອງປະຊຸມຄົບຄະນະສະໄໝວິສາມັນ ຂອງຄະນະບໍລິຫານງານສູນກາງພັກ ສະໄໝທີ XI ສະບັບເລກທີ 02/ຄບສພ, ລົງວັນທີ 7 ມີນາ 2025; ນອກຈາກນີ້, ກອງປະຊຸມ ຍັງໄດ້ຟັງຄໍາແນະນໍາຂອງຄະນະຈັດຕັ້ງສູນກາງພັກ ກ່ຽວກັບການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ, ແຈ້ງການຂອງຄະນະຈັດຕັ້ງສູນກາງພັກ ສະບັບເລກທີ 426/ຄຈສພ, ລົງວັນທີ 4 ເມສາ 2025 ເລື່ອງ ການໂຈະການຄົ້ນຄວ້າຍົກຍ້າຍ ແລະ ແຕ່ງຕັ້ງພະນັກງານດໍາລົງຕຳແໜ່ງບໍລິຫານ.
ກອງປະຊຸມ ໄດ້ຈັດພິທີປະກາດການສ້າງຕັ້ງກົງຈັກການຈັດຕັ້ງ ແລະ ຕໍາແໜ່ງບໍລິຫານ ພາຍໃນ ຫສພ ທີ່ໄດ້ມີມະຕິຕົກລົງອອກມາແລ້ວ ແຕ່ຕົ້ນເດືອນເມສາຜ່ານມານັ້ນ, ໂດຍຄະນະເລຂາທິການສູນກາງພັກ ຕົກລົງເຫັນດີສ້າງຕັ້ງ ຫ້ອງການປະຕິຮູບລັດວິສາຫະກິດ ເປັນກົງຈັກໜຶ່ງທຽບເທົ່າກົມຂຶ້ນກັບ ຫສພ.ປະກາດຂໍ້ຕົກລົງຂອງຫົວໜ້າຫ້ອງວ່າການສູນກາງພັກ ຕົກລົງຮັບເອົາລັດຖະກອນທີ່ຍົກຍ້າຍມາຈາກກະຊວງການເງິນ ມາປະຈໍາການຢູ່ຫ້ອງການຄະນະປະຕິຮູບລັດວິສາຫະກິດ ຈໍານວນ 7 ສະຫາຍ, ໃນນີ້ກໍໄດ້ມີຂໍ້ຕົກລົງຂອງຫົວໜ້າ ຫສພ ຕົກລົງເຫັນດີມອບໃຫ້ ສະຫາຍ ສົມພາວັນ ສີຫາປັນຍາ ຮອງຫົວໜ້າກົມປະຕິຮູບລັດວິສາຫະກິດ ແລະ ການປະກັນໄພ ກະຊວງການເງິນ ທີ່ຍົກຍ້າຍມານັ້ນ ເປັນຮອງຫົວໜ້າຫ້ອງການປະຕິຮູບລັດວິສາຫະກິດ ຮັບຜິດຊອບຊີ້ນໍາ-ນໍາພາບໍລິຫານວຽກງານຢູ່ພາຍໃນຫ້ອງການຄະນະປະຕິຮູບລັດວິສາຫະກິດ ຈົນກວ່າຈະມີການປັບປຸງຕໍາແໜ່ງດັ່ງກ່າວ.
ນອກຈາກນີ້, ກໍໄດ້ປະກາດມະຕິຕົກລົງແຕ່ງຕັ້ງຂອງຄະນະເລຂາທິການສູນກາງພັກ ແຕ່ງຕັ້ງ ສະຫາຍນາງ ເກສອນ ວໍລະເພັດ ເປັນຫົວໜ້າກົມບໍລິຫານ ຫສພ; ຄະນະປະຈໍາພັກ ຫສພ ກໍໄດ້ມີມະຕິຕົກລົງ ບົ່ງຕົວແຕ່ງຕັ້ງຄະນະໜ່ວຍພັກ ກົມບໍລິຫານ ຫສພ ຄື: ສະຫາຍ ນາງ ເກສອນ ວໍລະເພັດ ເປັນເລຂາໜ່ວຍພັກ, ສະຫາຍ ຄໍາເຟືອງ ພິມມະເສນ ເປັນຮອງເລຂາໜ່ວຍພັກທັງເປັນປະທານກວດກາ. ພ້ອມນີ້, ກໍມີໄດ້ປະກາດຂໍ້ຕົກລົງແຕ່ງຕັ້ງ ສະຫາຍ ຈັນທະທົງລິດ ສຸລິຍະສັກ ຫົວໜ້າພະແນກເລຂາ 2 ຂຶ້ນເປັນຮອງຫົວໜ້າກົມ ຂອງ ຫສພ ແລະ ຂໍ້ຕົກລົງຂອງຫົວໜ້າ ຫສພ ເຫັນດີເລື່ອນ ສະຫາຍ ວຽງສະຫວັນ ຜາງວິລະດອນ ຮອງຫົວໜ້າພະແນກບັນທຶກ ຂຶ້ນເປັນຫົວໜ້າພະແນກບັນທຶກ ກົມເລຂານຸການ-ການນໍາ, ສະຫາຍນາງ ສາຍສະໝອນ ສຸບັນ ລັດຖະກອນພະແນກນິຕິໄນ ຂຶ້ນເປັນຮອງຫົວໜ້າພະແນກນິຕິໄນກົມເລຂານຸການ-ການນໍາ, ສະຫາຍ ວົງສະຫວັນ ໄຊຍະວົງສາ ລັດຖະກອນ ພະແນກປະສານງານ ຂຶ້ນເປັນຮອງຫົວໜ້າພະແນກປະສານງານ ກົມເລຂານຸການ-ການນໍາ.
ກອງປະຊຸມຍັງໄດີມີພິທີ ມອບບັດສະມາຊິກພັກສົມບູນ ໃຫ້ສະມາຊິກພັກ ທີ່ຂຶ້ນກັບ ອົງຄະນະພັກ ຫສພ ຊຸດທີ IX ຈໍານວນ 12 ສະຫາຍອີກດ້ວຍ.
(ຂ່າວ-ພາບ: ແສງຈັນ)
ຄໍາເຫັນ