ສະຫາຍ ສີ ຈິ້ນຜິງ ເລຂາທິການໃຫຍ່ ຄະນະກໍາມະການສູນກາງພັກກອມມູນິດຈີນ ປະທານປະເທດແຫ່ງ ສາທາລະນະລັດ ປະຊາຊົນຈີນ ໄດ້ສົ່ງໂທລະເລກອວຍພອນ ເຖິງ ສະຫາຍ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນ ປະຕິວັດລາວ ປະທານປະເທດແຫ່ງສາທາລະນະລັດ ປະຊາທິປະໄຕ ປະຊາຊົນລາວ ທີ່ນະຄອນຫຼວງວຽງຈັນ ຊຶ່ງມີເນື້ອໃນດັ່ງນີ້.
ສະຫາຍທີ່ນັບຖື:
ເນື່ອງໃນໂອກາດ ສາທາລະນະລັດ ປະຊາທິປະໄຕ ປະຊາຊົນລາວ ໄດ້ສະຖາປະນາຂຶ້ນຄົບຮອບ48 ປີ, ຂ້າພະເຈົ້າຂໍຕາງໜ້າພັກກອມມູນິດຈີນ ລັດຖະບານຈີນ ແລະ ປະຊາຊົນຈີນ ແລະ ໃນນາມສ່ວນຕົວ ສະແດງຄວາມຊົມເຊີຍຢ່າງສຸດໃຈ ມາຍັງພັກປະຊາຊົນ ປະຕິວັດລາວ ລັດຖະບານລາວ ແລະ ປະຊາຊົນລາວ.
ໃນໜຶ່ງປີຜ່ານມາ, ຝ່າຍລາວໄດ້ບຸກໜ້າບືນຕົວກ້າວໄປຂ້າງໜ້າຕາມເປົ້າໝາຍ ທີ່ກອງປະຊຸມໃຫຍ່ຄັ້ງທີ 11 ຂອງພັກປະຊາຊົນ ປະຕິວັດລາວ ກໍານົດ, ໄດ້ຮັກສາສະຖຽນລະພາບດ້ານການເມືອງ ແລະ ສັງຄົມ, ຊຸກຍູ້ການພັດທະນາເສດຖະກິດ-ສັງຄົມແບບຍືນຍົງ. ຂ້າພະເຈົ້າເຊື່ອວ່າ ພາຍໃຕ້ການຊີ້ນໍາ-ນໍາພາອັນເຂັ້ມແຂງ ຂອງສູນກາງພັກປະຊາຊົນປະຕິວັດລາວ ໂດຍມີ ສະຫາຍເລຂາທິການໃຫຍ່ ເປັນຫົວໜ້າ,ປະຊາຊົນລາວ ຈະສາມາດເດີນຕາມເສັ້ນທາງສັງຄົມທີ່ເໝາະສົມ ກັບສະພາບຕົວຈິງຂອງປະເທດຕົນເອງໃຫ້ດີ ແລະ ສ້າງໃບໜ້າໃໝ່ໃນພາລະກິດການກໍ່ສ້າງພັກ ແລະ ປະເທດຊາດ.
ໃນເດືອນຕຸລາປີນີ້, ພວກເຮົາໄດ້ຮ່ວມກັນລົງນາມ ແຜນແມ່ບົດວ່າດ້ວຍການ ສ້າງຄູ່ຮ່ວມຊາຕາກໍາຈີນ-ລາວ ສະບັບໃໝ່ອັນໄດ້ເປັນເຂັມທິດເຍືອງທາງ ແລະ ວາງແຜນໃໝ່ ໃຫ້ແກ່ການຮ່ວມມືຍຸດທະສາດຮອບດ້ານ ລະຫວ່າງ ຈີນ-ລາວ ໃນຍຸກສະໄໝໃໝ່. ຝ່າຍຈີນສະໜັບສະໜູນຝ່າຍລາວ ເປັນປະທານອາຊຽນໃນປີ 2024 ແລະ ເສີມຂະຫຍາຍບົດບາດຫຼາຍກວ່າເກົ່າ ໃນກິດຈະກໍາສາກົນ ແລະ ພາກພື້ນ.
ຂ້າພະເຈົ້າໃຫ້ຄວາມສໍາຄັນລະດັບສູງ ຕໍ່ການພັດທະນາສາຍພົວພັນຈີນ-ລາວ, ຍິນດີທີ່ຮ່ວມກັນກັບສະຫາຍ ສົ່ງເສີມມິດຕະພາບອັນເປັນມູນເຊື້ອ, ລົງເລິກຄວາມໄວ້ເນື້ອເຊື່ອໃຈກັນທາງດ້ານຍຸດທະສາດ ຮ່ວມກັນນໍາພາ ການສ້າງຄູ່ຮ່ວມຊາຕາກໍາ ຈີນ-ລາວ ເຂົ້າສູ່ລວງເລິກຢ່າງບໍ່ຢຸດຢັ້ງ ເພື່ອສ້າງຄວາມຜາສຸກ ໃຫ້ແກ່ປະຊາຊົນ ສອງຊາດໃຫ້ດີກວ່າເກົ່າ.
ຂໍອວຍພອນໃຫ້ປະເທດລາວ ຈົ່ງມີຄວາມຈະເລີນຮຸ່ງເຮືອງ, ປະຊາຊົນມີຄວາມຮັ່ງມີຜາສຸກ.
ຂໍອວຍພອນໃຫ້ ການກໍ່ສ້າງຄູ່ຮ່ວມຊາຕາກໍາຈີນ-ລາວ ຍາດໄດ້ຜົນສໍາເລັດອັນໃໝ່ຢ່າງບໍ່ຢຸດຢັ້ງ.
ໃນໂອກາດດຽວກັນນີ້ ສະຫາຍ ຈາວເລີ້ຈີ້ ປະທານຄະນະກໍາມະການປະຈໍາສະພາຜູ້ແທນປະຊາຊົນທົ່ວປະເທດ ສາທາລະນະລັດ ປະຊາຊົນຈີນ ກໍໄດ້ສົ່ງສານອວຍພອນ ເຖິງ ສະຫາຍ ໄຊສົມພອນ ພົມວິຫານ ປະທານສະພາແຫ່ງຊາດ ແຫ່ງສາທາລະນະລັດ ປະຊາທິປະໄຕ ປະຊາຊົນລາວ; ສະຫາຍ ຫຼີ ສຽງ ນາຍົກລັດຖະມົນຕີແຫ່ງ ສາທາລະນະລັດ ປະຊາຊົນຈີນ ກໍໄດ້ສົ່ງສານອວຍພອນ ເຖິງ ສະຫາຍ ສອນໄຊ ສີພັນດອນ ນາຍົກລັດຖະມົນຕີແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ສະຫາຍ ຫວາງອີ້ ກໍາມະການກົມການເມືອງສູນກາງພັກກອມມູນິດຈີນ ຫົວໜ້າຫ້ອງວ່າການຄະນະກໍາມະການວຽກງານການຕ່າງປະເທດສູນກາງພັກກອມມູນິດຈີນ ລັດຖະມົນຕີກະຊວງການຕ່າງປະເທດແຫ່ງ ສາທາລະນະລັດ ປະຊາຊົນຈີນ ກໍໄດ້ສົ່ງສານອວຍພອນ ເຖິງ ສະຫາຍ ສະເຫຼີມໄຊ ກົມມະສິດ ກໍາມະການກົມການເມືອງສູນກາງພັກ ປະຊາຊົນປະຕິວັດລາວ ຮອງນາຍົກລັດຖະມົນຕີ ລັດຖະມົນຕີກະຊວງການຕ່າງປະເທດແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ເຊັ່ນດຽວກັນ.
ຄໍາເຫັນ