ທ່ານ ສັນຕິພາບ ພົມວິຫານ ໄດ້ຍົກໃຫ້ເຫັນເຫດຜົນ ແລະ ຄວາມຈໍາເປັນ ໃນການປັບປຸງກົດໝາຍໃນຄັ້ງນີ້, ເພື່ອປັບປຸງເນື້ອໃນກົດໝາຍໃຫ້ມີຄວາມຮັດກຸມ, ຈະແຈ້ງ ແລະ ສອດຄ່ອງ ດັ່ງນີ້: ໃຫ້ສອດຄ່ອງກັບການປັບ ປຸງລັດຖະທໍາມະນູນແຫ່ງ ສປປ ລາວ ແລະ ກົດໝາຍອື່ນໆ ທີ່ກ່ຽວຂ້ອງ; ໃຫ້ສອດຄ່ອງກັບແຜນພັດທະນາເສດ ຖະກິດ-ສັງຄົມແຫ່ງຊາດ; ໃຫ້ສອດຄ່ອງກັບການປັບປຸງກົງຈັກການຈັດຕັ້ງ (ໂຮມກະຊວງແຜນການ ແລະ ການລົງທຶນເຂົ້າກັນເປັນກະຊວງການເງິນ); ໃຫ້ສອດຄ່ອງກັບຫຼັກການຂອງສາກົນ ແລະ ຮັບປະກັນການຈັດຕັ້ງປະຕິບັດການຫັນເປັນທັນສະໄໝ ລະບົບຄຸ້ມຄອງຂໍ້ມູນຂ່າວສານການເງິນພາກລັດ; ເພື່ອຍົກສູງຄວາມຮັບຜິດຊອບຂອງຫົວໜ່ວຍງົບປະມານ, ສ້າງຄວາມເຂັ້ມແຂງທາງດ້ານການເງິນເທື່ອລະກ້າວ ເຮັດໃຫ້ການເງິນແຫ່ງຊາດມີສະຖຽນລະພາບ, ຄວາມໝັ້ນຄົງ ແລະ ສອດຄ່ອງກັບລະບົບສະຖິຕິການເງິນພາກລັດ. ດ້ວຍເຫດຜົນທີ່ກ່າວມານັ້ນ, ຈຶ່ງໄດ້ມີການປັບປຸງເນື້ອໃນກ່ຽວກັບ: ການແບ່ງຂັ້ນຄຸ້ມຄອງຫົວໜ່ວຍງົບປະມານແຫ່ງລັດ, ຫົວໜ່ວຍງົບປະມານບໍລິຫານວິຊາການ ແລະ ຄັງສະສົມແຫ່ງລັດ, ໂຄງປະກອບລາຍຮັບ-ລາຍຈ່າຍງົບປະມານແຫ່ງລັດ, ຄວາມຮັບຜິດຊອບຂອງລັດຖະບານ, ຄວາມຮັບຜິດຊອບຂອງກະຊວງການເງິນ ແລະ ຄວາມຮັບຜິດຊອບຂັ້ນທ້ອງຖິ່ນ, ລະບົບງົບ ປະມານແຫ່ງລັດ, ການແບ່ງຂັ້ນຄຸ້ມຄອງລາຍຮັບ-ລາຍຈ່າຍງົບປະມານແຫ່ງລັດຂັ້ນສູນກາງ ແລະ ທ້ອງຖິ່ນ, ການຊ່ວຍໜູນງົບປະມານແຫ່ງລັດທີ່ມີເປົ້າໝາຍສະເພາະ, ນະໂຍບາຍສົ່ງເສີມການເກັບລາຍຮັບງົບປະມານແຫ່ງລັດ ແລະ ນະໂຍບາຍສົ່ງເສີມການປະຕິບັດລາຍຈ່າຍໃຫ້ມີປະສິດທິຜົນ, ການຊ່ວຍເຫຼືອ, ການສັງລວມ ແລະ ລາຍງານການສະຫຼຸບຂາດຕົວງົບປະມານແຫ່ງລັດ, ການກຳນົດຜົນການກວດກາ ຂອງອົງການກວດສອບແຫ່ງລັດ ແລະ ເນື້ອໃນອື່ນ ທີ່ຕິດພັນກັບການຄຸ້ມຄອງງົບປະມານແຫ່ງລັດ.
ຮ່າງກົດໝາຍ ວ່າດ້ວຍງົບປະມານແຫ່ງລັດ ແມ່ນໜຶ່ງໃນຮ່າງກົດໝາຍທີ່ນອນຢູ່ໃນແຜນການສ້າງ ແລະ ປັບປຸງກົດໝາຍ 5 ປີ ຂອງສະພາແຫ່ງຊາດ ຊຸດທີ X (2026-2030). ກະຊວງການເງິນ ໄດ້ແຕ່ງຕັ້ງຄະນະຮັບຜິດຊອບຄົ້ນຄວ້າ, ປັບປຸງກົດໝາຍວ່າດ້ວຍງົບປະມານແຫ່ງລັດ ຕາມຂໍ້ຕົກລົງສະບັບເລກທີ 0502/ກງ, ລົງວັນທີ 25 ກຸມພາ 2025, ເພື່ອຮັບປະກັນການຄົ້ນຄວ້າດໍາເນີນໄປຕາມຂັ້ນຕອນທີ່ກໍານົດໄວ້ໃນກົດໝາຍວ່າດ້ວຍການສ້າງນິຕິກໍາ, ຄະນະຮັບຜິດຊອບໄດ້ເລີ່ມຄົ້ນຄວ້ານັບແຕ່ເດືອນກຸມພາ ປີ 2025 ເປັນຕົ້ນມາ, ຍ້ອນການປັບປຸງກົງຈັກລັດຖະບານທີ່ໂຮມກະຊວງແຜນການ ແລະ ການລົງທຶນເຂົ້າກັບກະຊວງການເງິນ. ສະນັ້ນ, ກະຊວງການເງິນ ຈຶ່ງໄດ້ລາຍງານລັດຖະບານ ເພື່ອຂໍເລື່ອນວາລະການພິຈາລະນາຮັບຮອງໃນກອງປະຊຸມສະໄໝສາມັນເທື່ອທີ 2 ປີ 2025 ມາສະເໜີພິຈາລະນາໃນກອງປະຊຸມສະພາແຫ່ງຊາດ ປີ 2026.
ທ່ານ ສັນຕິພາບ ພົມວິຫານ ກ່າວຕື່ມວ່າ: ຜ່ານການສະເໜີຮ່າງກົດໝາຍດັ່ງກ່າວ ຕໍ່ກອງປະຊຸມຍົກສູງຄຸນນະພາບທາງດ້ານເນື້ອໃນ ໃຫ້ກອງປະຊຸມສະໄໝວິສາມັນ ເທື່ອທີ 1 ຂອງສະພາແຫ່ງຊາດ ຊຸດທີ X ໃນຄັ້ງວັນທີ 4 ກໍລະກົດ 2026 ຊຶ່ງມີບັນດາສະມາຊິກສະພາແຫ່ງຊາດ ປະກອບຄໍາເຫັນ 17 ທ່ານ, ກວມເອົາ 18 ມາດຕາ ແລະ ຕິດພັນໂຄງຮ່າງພາກ II ແລະ ພາກ V ໝວດທີ 1, ຜ່ານການຄົ້ນຄວ້າຂອງຄະນະຮັບຜິດຊອບປັບປຸງກົດໝາຍ ແມ່ນສະເໜີຮັກສາໄວ້ຄືເກົ່າຈໍານວນ 12 ມາດຕາ ແລະ ເຫັນດີປັບປຸງ ຕາມການປະກອບຄໍາເຫັນ ຈໍານວນ 6 ມາດຕາ ເປັນຕົ້ນ:
1) ການອະທິບາຍຄຳສັບ (ຜູ້ສັ່ງການເອກ, ລາຍຮັບຈາກການລົງທຶນທາງດ້ານການເງິນ),
2) ການແບ່ງຂັ້ນຄຸ້ມຄອງຫົວໜ່ວຍງົບປະມານ,
3) ຄັງສະສົມແຫ່ງລັດ,
4) ງົບປະມານສົມດູນ, ເກີນດູນ ແລະ ຂາດດູນ,
5) ແຫຼ່ງທຶນດຸ່ນດ່ຽງງົບປະມານ,
6) ການດັດແກ້ແຜນງົບປະມານ. ສໍາລັບໂຄງສ້າງຂອງຮ່າງກົດໝາຍວ່າດ້ວຍງົບປະມານແຫ່ງລັດ ປະກອບມີ XI ພາກ, 14 ໝວດ, 97 ມາດຕາ. ໃນນີ້, ໄດ້ເພີ່ມໃໝ່ I ພາກ, ປັບປຸງເນື້ອໃນທັງໝົດ 78 ມາດຕາ, ຮັກສາເດີມ 10 ມາດຕາ ແລະ ເພີ່ມໃໝ່ 9 ມາດຕາ. ຄາດຄະເນຜົນໄດ້ຮັບຈາກການປັບປຸງພາຍຫຼັງຮ່າງກົດໝາຍສະບັບນີ້ໄດ້ຖືກຮັບຮອງ ແລະ ປະກາດໃຊ້ຈະກາຍເປັນເຄື່ອງມືທີ່ສໍາຄັນໃຫ້ລັດຖະບານ ໃນການຄຸ້ມຄອງວຽກງານງົບປະມານແຫ່ງລັດ, ການຄຸ້ມຄອງການເກັບລາຍຮັບ ແລະ ລາຍຈ່າຍ ງົບປະມານແຫ່ງລັດ ແລະ ກຳນົດສິດໜ້າທີ່ຂອງແຕ່ລະພາກສ່ວນທີ່ກ່ຽວຂ້ອງ ກັບວຽກງານງົບປະມານແຫ່ງລັດມີຄວາມຮັດກຸມ, ຈະແຈ້ງ, ລວມສູນ ແລະ ສາມາດຕອບສະໜອງດ້ານງົບປະມານໄດ້ທັນຕາມກໍານົດເວລາ, ຊຶ່ງຈະເປັນການປະກອບສ່ວນເຂົ້າໃນການສ້າງລັດ ທີ່ປົກຄອງດ້ວຍກົດໝາຍເທື່ອລະກ້າວ.
(ຂ່າວ: ວັນເພັງ, ພາບ: ສໍານານ)
ຄໍາເຫັນ