ໃນລະຫວ່າງວັນທີ 5-7 ພຶດສະພາ 2025 ເພື່ອຮັດແໜ້ນສາຍພົວພັນ ແລະ ການຮ່ວມມືທາງດ້ານຕຸລາການ ລະຫວ່າງ ສານປະຊາຊົນສູງສຸດ ແຫ່ງ ສປປ ລາວ ແລະ ສານສູງສຸດ ແຫ່ງ ຣາຊະອານາຈັກ ກຳປູເຈຍ ບົນພື້ນຖານການຜັນຂະຫຍາຍສາຍພົວພັນມິດຕະພາບ, ຄວາມສາມັກຄີອັນເປັນມູນເຊື້ອທີ່ມີມາແຕ່ດົນນານ ແລະ ການເປັນຄູ່ຮ່ວມມືຍຸດທະສາດຮອບດ້ານ ແລະ ໝັ້ນຄົງຍາວນານ ລະຫວ່າງ ສປປ ລາວ ແລະ ຣາຊະອານາຈັກ ກຳປູເຈຍ ໃຫ້ຈະເລີນງອກງາມ ແລະ ແຕກດອກອອກຜົນຍິ່ງໆຂຶ້ນ.
ການພົວພັນຮ່ວມມືລະຫວ່າງສານປະຊາຊົນສູງສຸດ ແຫ່ງ ສປປ ລາວ ແລະ ສານສູງສຸດ ແຫ່ງ ຣາສະອານາຈັກ ກຳປູເຈຍ ໃນໄລຍະຜ່ານມາແມ່ນໄດ້ຖືເອົາການຮ່ວມມືໃນກອບອາຊຽນ ຊຶ່ງອົງການຕຸລາການຂອງ 2 ປະເທດກໍແມ່ນສະມາຊິກໜຶ່ງຂອງສະພາຕຸລາການອາຊຽນ (Council of ASEAN Chief Justice), ກົນໄກການຮ່ວມມືໃນກອບ 3 ປະເທດ ທີ່ມີຊາຍແດນຕິດຈອດກັນ ລາວ-ຫວຽດນາມ-ກໍາປູເຈຍ, ແຕ່ເຖິງຢ່າງໃດກໍຕາມ ການພົວພັນ ແລະ ຮ່ວມມືໃນກອບສອງຝ່າຍ ເຫັນວ່າຍັງບໍ່ທັນໄດ້ມີກົນໄກທີ່ຊັດເຈນ, ສະນັ້ນ ການພົບປະລະຫວ່າງຄະນະຜູ້ແທນຂອງສອງປະເທດ ຄັ້ງນີ້ແມ່ນມີຄວາມໝາຍສຳຄັນ.
ການພົບປະລະຫວ່າງຄະນະຜູ້ແທນຂັ້ນສູງຂອງອົງການຕຸລາການ 2 ປະເທດ ໄດ້ຮັບຜົນສໍາເລັດໃນລະດັບສູງ ຊຶ່ງທັງສອງຝ່າຍໄດ້ແລກປ່ຽນຄວາມຄິດຄວາມເຫັນ ທີ່ເຕັມໄປດ້ວຍໄມຕີຈິດມິດຕະພາບ, ຄວາມສາມັກຄີ ຮັກແພງ, ສ້າງຄວາມເຂົ້າໃຈ ຊຶ່ງກັນ ແລະ ກັນ. ເນື່ອງໃນໂອກາດດັ່ງກ່າວ ທັງສອງຝ່າຍ ຍັງໄດ້ລົງນາມໃນບົດບັນທຶກຄວາມເຂົ້າໃຈວ່າດ້ວຍການຮ່ວມມືທາງດ້ານຕຸລາການຂອງ 2 ປະເທດ ສະບັບທຳອິດ ຊຶ່ງເປັນຂີດໝາຍປະຫວັດສາດແຫ່ງການພົວພັນ ແລະ ການຮ່ວມມື ລະຫວ່າງອົງການຕຸລາການ ຂອງ ສປປ ລາວ ແລະ ຣາຊະອານາຈັກ ກຳປູເຈຍ ແລະ ຈະກາຍເປັນພື້ນຖານໃຫ້ແກ່ການພົວພັນຮ່ວມມື ລະຫວ່າງ ສານປະຊາຊົນສູງສຸດ ແຫ່ງ ສປປ ລາວ ແລະ ສານສູງສຸດ ແຫ່ງ ຣາຊະອານາຈັກ ກຳປູເຈຍ ແນໃສ່ແລກປ່ຽນບົດຮຽນໃນດ້ານວິຊາການ ທີ່ສອງຝ່າຍມີຄວາມສົນໃຈ, ເປັນບ່ອນອີງໃນການຊ່ວຍເຫຼືອ ແລະ ສະໜັບສະໜູນຊຶ່ງກັນ ແລະ ກັນ ໃນການສ້າງເວທີແລກປ່ຽນ ບົດຮຽນ ແລະ ທັກສະ ໃຫ້ແກ່ພະນັກງານ-ຜູ້ພິພາກສາຂອງ 2 ອົງການ ໃຫ້ມີການພັດທະນາທາງດ້ານຂີດຄວາມສາມາດໃຫ້ສູງຂຶ້ນ. ນອກຈາກນັ້ນ ຍັງເປັນບ່ອນອີງໃຫ້ແກ່ການຊຸກຍູ້ການຮ່ວມມືລະຫວ່າງສານບັນດາແຂວງທີ່ມີຊາຍແດນຕິດຈອດກັບ ກຳປູເຈຍ ແລະ ລາວ ເພື່ອແລກປ່ຽນຂໍ້ມູນຂ່າວສານ, ແລກປ່ຽນການຢ້ຽມຢາມ ແລະ ແລກປ່ຽນປະສົບການຊຶ່ງກັນ ແລະ ກັນ.
ໃນໂອກາດດຽວກັນນີ້, ຄະນະຜູ້ແທນຂັ້ນສູງຂອງສານປະຊາຊົນສູງສຸດ ແຫ່ງ ສປປ ລາວ ໄດ້ເຂົ້າຢ້ຽມຂໍ່ານັບ ສົມເດັດ ມະຫາ ບໍວໍ ທິບໍດີ ຮຸນ ມາເນັດ ນາຍົກລັດຖະມົນຕີ ແຫ່ງຣາຊະອານາຈັກກຳປູເຈຍ ແລະ ທ່ານຮອງນາຍົກລັດຖະມົນຕີ-ລັດຖະມົນຕີກະຊວງຍຸຕິທຳ ແຫ່ງ ຣາສະອານາຈັກກຳປູເຈຍ ຊຶ່ງທັງສອງທ່ານ ໄດ້ຕີລາຄາສູງ ຕໍ່ການມາເຄື່ອນໄຫວຢ້ຽມຢາມ ແລະ ເຮັດວຽກຂອງຄະນະຜູ້ແທນຂັ້ນສູງຂອງສານປະຊາຊົນສູງສຸດ ແຫ່ງ ສປປ ລາວ ແລະ ສະແດງຄວາມຊົມເຊີຍ ຕໍ່ອົງການການຕຸລາການຂອງ 2 ປະເທດທີ່ໄດ້ລິເລີ່ມການພົວພັນ ແລະ ຮ່ວມມື ໂດຍໄດ້ພ້ອມກັນລົງນາມໃນບົດບັນທຶກການຮ່ວມມືືທາງດ້ານຕຸລາການ ສະບັບທຳອິດ ຊຶ່ງຈະເປັນພື້ນຖານໃຫ້ແກ່ການເສີມຂະຫຍາຍການຮ່ວມມືໃນອານາຄົດ.
(ຂ່າວ-ພາບ: ສປສສ)
ຄໍາເຫັນ