ແລະ ເຂົ້າຮ່ວມກອງປະຊຸມປະຈຳປີຂອງສອງສະມາຄົມມິດຕະພາບລາວ-ສເກົາຫຼີແລະສເກົາຫຼີ-ລາວ ແຕ່ວັນທີ 16-20 ທັນວາ 2024 ນີ້.
ໃນວັນທີ 16 ທັນວາຜ່ານມາ, ສອງສະມາຄົມມິດຕະພາບ ໄດ້ຈັດກອງປະຊຸມພົບປະ ຄັ້ງທີ XIII, ໂດຍການເປັນປະທານຮ່ວມຂອງທ່ານ ຄຳສວຍ ແກ້ວດາລາວົງປະທານສະມາຄົມມິດຕະພາບລາວ-ສເກົາຫຼີແລະທ່ານໂອມິງຮວັນ ປະທານສະມາຄົມມິດຕະພາບສເກົາຫຼີ - ລາວ ແລະ ໃຫ້ກຽດເຂົ້າຮ່ວມ ຂອງ ທ່ານຈອງ ຢອງຊູເອກອັກຄະລັດຖະທູດວິສາມັນຜູ້ມີອໍານາດເຕັມແຫ່ງ ສເກົາຫຼີ ປະຈຳ ສປປ ລາວ. ພ້ອມນີ້,ຍັງມີບັນດາທ່ານຄະນະສະມາຄົມມິດຕະພາບ ລາວ-ສເກົາຫຼີ ແລະ ສເກົາຫຼີ-ລາວ, ພະນັກງານຈາກພາກສ່ວນທີ່ກ່ຽວຂ້ອງຂອງທັງສອງຝ່າຍ ເຂົ້າຮ່ວມຢ່າງພ້ອມພຽງ.
ກອງປະຊຸມພົບປະ ຄັ້ງທີ XIIIໄດ້ສະຫຼຸບຕີລາຄາການພົວພັນຮ່ວມມືກັນລະຫວ່າງສອງສະມາຄົມໃນໄລຍະ 1ປີຜ່ານມາ, ຜົນສໍາເລັດອັນພົ້ນເດັ່ນ ຄືສອງສະມາຄົມມິດຕະພາບ ໄດ້ຮ່ວມມືກັນປະກອບສ່ວນຊ່ວຍເຫຼືອ ແລະ ພັດທະນາຢູ່ ສປປ ລາວ ໂດຍສະເພາະດ້ານການພັດທະນາພື້ນຖານໂຄງລ່າງການສຶກສາ, ສາທາ, ມະນຸດສະທໍາ ຊຶ່ງສອງສະມາຄົມມິດຕະພາບ ໄດ້ຊ່ວຍເຫຼືອສ້າງໂຮງຮຽນ,ຢາປົວພະຍາດ, ເຄື່ອງນຸ່ງຫົ່ມ, ອຸປະກອນການສຶກສາ ແລະອື່ນໆ. ພ້ອມນີ້, ຄະນະຜູ້ແທນສອງສະມາຄົມມິດຕະພາບ ຍັງໄດ້ແລກປ່ຽນຄວາມຄິດເຫັນຕໍ່ທິດທາງແຜນການ ແລະ ກິດຈະກໍາທີ່ສອງຝ່າຍຈະເຮັດຮ່ວມກັນໃນຊຸມປີຕໍ່ໜ້າ. ສອງຝ່າຍເຫັນດີສືບຕໍ່ຮ່ວມມື ແລະ ເຄື່ອນໄຫວຮ່ວມກັນຕາມພາລະບົດບາດ ໂດຍສະເພາະແມ່ນສືບຕໍ່ໂຄສະນາເຜີຍແຜ່ສາຍພົວພັນ ແລະ ການຮ່ວມມືອັນດີງາມ ລະຫວ່າງ ສອງປະເທດ ໃຫ້ປະຊາຊົນສອງຊາດ ໄດ້ຮັບຮູ້ ແລະ ເຂົ້າໃຈຢ່າງເລິກເຊິ່ງ, ສະໜັບສະໜູນການໄປມາຫາສູ່ ແລະ ພົວພັນຮ່ວມມືລະຫວ່າງປະຊາຊົນ ເພື່ອສ້າງຄວາມຮັກແພງ, ຄວາມໄວ້ເນື້ອເຊື່ອໃຈ ແລະ ສ້າງກິດຈະກໍາຮ່ວມກັນ ເພື່ອເປັນການປະກອບສ່ວນເສີມຂະຫຍາຍ ແລະ ເພີ່ມພູນຄູນສ້າງສາຍພົວພັນມິດຕະພາບແລະ ການຮ່ວມມືອັນດີງາມ ລະຫວ່າງ ສປປ ລາວ ແລະ ສເກົາຫຼີ ໃຫ້ນັບມື້ໄດ້ຮັບການພັດທະນາ ແລະ ກ້າວເຂົ້າສູ່ລວງເລິກ.
ໃນວັນດຽວກັນ,ທ່ານ ບຸນເຫຼືອ ພັນດານຸວົງ ຮັກສາການຫົວໜ້າຄະນະພົວພັນຕ່າງປະເທດສູນກາງພັກ (ຄຕພ) ກໍໄດ້ຕາງໜ້າໃຫ້ລັດຖະບານແຫ່ງ ສປປ ລາວ ປະດັບຫຼຽນກາມິດຕະພາບໃຫ້ຄະນະບໍລິຫານງານຂອງສະມາຄົມມິດຕະພາບສເກົາຫຼີ-ລາວຈຳນວນ6 ທ່ານເພື່ອເປັນການຍ້ອງຍໍຜົນງານ ແລະ ຄຸນງາມຄວາມດີຕໍ່ການປະກອບສ່ວນເສີມຂະຫຍາຍສາຍພົວພັນ ແລະ ການຮ່ວມມື ລະຫວ່າງ ສປປ ລາວ ແລະ ສເກົາຫຼີ ກໍຄືການປະກອບສ່ວນທຶນຮອນຊ່ວຍເຫຼືອສ້າງສາພັດທະນາສປປລາວ ເປັນຕົ້ນແມ່ນດ້ານການສຶກສາ, ສາທາລະນະສຸກ, ມະນຸດສະທໍາ ແລະ ອື່ນໆ; ໂດຍສະເພາະໃຫ້ທຶນກໍ່ສ້າງໂຮງຮຽນຢູ່ນະຄອນຫຼວງວຽງຈັນ ແລະ ແຂວງຫົວພັນ ເຊັ່ນ: ໂຮງຮຽນປະຖົມສົມບູນບ້ານຊຽງແລນາເມືອງປາກງື່ມນະຄອນຫຼວງວຽງຈັນ; ໂຮງຮຽນປະຖົມສົມບູນບ້ານຫ້ວຍລ້າເມືອງສັງທອງນະຄອນຫຼວງວຽງຈັນ ແລະ ໂຮງຮຽນປະຖົມສົມບູນບ້ານກ້ານເມືອງຊຳເໜືອແຂວງຫົວພັນ.
ໃນລະຫວ່າງການມາຢ້ຽມຢາມຄັ້ງນີ້, ຄະນະຜູ້ແທນສະມາຄົມມິດຕະພາບ ສເກົາຫຼີ-ລາວ ໄດ້ເຂົ້າຢ້ຽມຂໍ່ານັບ ທ່ານ ບຸນເຫຼືອ ພັນດານຸວົງ ຮັກສາການຫົວໜ້າ ຄຕພ. ໂອກາດດັ່ງກ່າວ, ບັນດາການນໍາພັກ, ລັດ ຂອງ ລາວ ໄດ້ຕີລາຄາສູງຕໍ່ການຢ້ຽມຢາມ ຂອງຄະນະຜູ້ແທນສະມາຄົມມິດຕະພາບ ສເກົາຫຼີ-ລາວ. ພ້ອມນັ້ນ, ຍັງໄດ້ຕີລາຄາສູງຕໍ່ສາຍພົວພັນ ແລະ ການຮ່ວມມືອັນດີງາມລະຫວ່າງສອງປະເທດ ແລະ ປະຊາຊົນສອງຊາດ ລາວ ແລະ ສເກົາຫຼີ ທີ່ສືບຕໍ່ໄດ້ຮັບການເສີມຂະຫຍາຍ ແລະ ພັດທະນາ ແລະ ນໍາເອົາຜົນປະໂຫຍດມາສູ່ປະຊາຊົນສອງປະເທດ. ນອກນັ້ນ, ຍັງໄດ້ແຈ້ງສະພາບການພັດທະນາອັນພົ້ນເດັ່ນ ຂອງ ສປປ ລາວ ໃຫ້ຄະນະຜູ້ແທນຊາບ. ສ່ວນ ທ່ານ ໂອ ມິງຮວັນ ໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ແລະ ອໍານວຍຄວາມສະດວກ ໃຫ້ແກ່ຄະນະຜູ້ແທນສະມາຄົມມິດຕະພາບ ສເກົາຫຼີ-ລາວ, ທັງໄດ້ລາຍງານການເຄື່ອນໄຫວອັນພົ້ນເດັ່ນ ຂອງສະມາຄົມມິດຕະພາບ ສເກົາຫຼີ-ລາວ ແລະ ຍິນດີສືບຕໍ່ຮ່ວມກັບສະມາຄົມມິດຕະພາບ ລາວ-ສເກົາຫຼີ ສະໜັບສະໜູນ ແລະ ປະກອບສ່ວນຊ່ວຍເຫຼືອ ໃນການສ້າງສາພັດທະນາ ຢູ່ ສປປ ລາວ.
ການມາຢ້ຽມຢາມຄັ້ງນີ້, ຄະນະຜູ້ແທນສະມາຄົມມິດຕະພາບ ສເກົາຫຼີ-ລາວ ຍັງໄດ້ນໍາພານັກສິລະປະພື້ນເມືອງຈາກອົງການແລກປ່ຽນວັດທະນະທຳສເກົາຫຼີ ແລະສະມາຄົມມິດຕະພາບ ສເກົາຫຼີ-ລາວ ມາສະແດງເພື່ອສະເຫຼີມສະຫຼອງເນື່ອງໃນໂອກາດຄົບຮອບ20 ປີວັນສ້າງຕັ້ງສະມາຄົມມິດຕະພາບສເກົາຫຼີ-ລາວ ແລະ ຄົບຮອບ15 ປີວັນສ້າງຕັ້ງສະມາຄົມມິດຕະພາບລາວ-ສເກົາຫຼີຢູ່ຫໍວັດທະນະທໍາແຫ່ງຊາດ ເຮັດໃຫ້ບັນຍາກາດການມາຢ້ຽມຢາມ ແລະ ເຂົ້າຮ່ວມກອງປະຊຸມໃນຄັ້ງນີ້ມີຄວາມໝາຍ, ມີບັນຍາກາດ ແລະ ມີຜົນສໍາເລັດຢ່າງຈົບງາມ.
ນອກຈາກນີ້,ຄະນະຜູ້ແທນສະມາຄົມມິດຕະພາບ ສເກົາຫຼີ-ລາວ ຍັງໄດ້ຢ້ຽມຢາມບັນດາໂຮງຮຽນປະຖົມທີ່ສະມາຄົມໄດ້ໃຫ້ການສະໜັບສະໜູນກໍ່ສ້າງອາຄານໂຮງຮຽນຜ່ານມາຢູ່ນະຄອນຫຼວງວຽງຈັນແລະ ແຂວງຫົວພັນ ແລະຢ້ຽມຢາມສະຖານທີ່ທ່ອງທ່ຽວທາງປະຫັວດສາດ ແລະວັດທະນະທຳຈຳນວນໜຶ່ງຢູ່ນະຄອນຫຼວງວຽງຈັນແລະແຂວງຫົວພັນ.
(ຂ່າວ: ຄຕພ, ພາບ: ສຸກສະຫວັນ)
ຄໍາເຫັນ