ກອງປະຊຸມສະໄໝວິສາມັນ ເທື່ອທີ 1 ຂອງສະພາແຫ່ງຊາດ ຊຸດທີ X ປິດລົງດ້ວຍຜົນສໍາເລັດຢ່າງຈົບງາມ

ທ່ານ ໄຊສົມພອນ ພົມວິຫານ ກ່າວວ່າ: ກອງປະຊຸມສະໄໝວິສາມັນ ເທື່ອທີ 1 ຂອງສະພາແຫ່ງຊາດ ຊຸດທີ X ໄດ້ພິຈາລະນາ, ຮັບຮອງເອົາເນື້ອໃນສໍາຄັນຈໍານວນໜຶ່ງດັ່ງນີ້: 1) ພິຈາລະນາ ແລະ ຮັບຮອງເອົາບົດລາຍງານຂອງລັດຖະບານກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ, ແຜນເງິນຕາ 6 ເດືອນຕົ້ນປີ 2026 ແລະ ທິດທາງແຜນການ 6 ເດືອນທ້າຍປີ 2026. ກອງປະຊຸມໄດ້ຕີລາຄາສູງຕໍ່ຄວາມພະຍາຍາມຂອງລັດຖະບານໃນການບໍລິຫານ, ບັນຊາໂດຍໄດ້ນໍາໃຊ້ທຸກທ່າແຮງ ແລະ ປຸກລະດົມປະຊາຊົນລາວບັນດາເຜົ່າ ເຂົ້າໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ, ແຜນງົບ ປະມານແຫ່ງລັດ ແລະ ແຜນເງິນຕາ ໃນ 6 ເດືອນຕົ້ນປີ 2026 ຊຶ່ງສາມາດເຮັດໃຫ້ເສດຖະກິດຂະຫຍາຍຕົວໃນລະດັບ 5%; ມີການນໍາໃຊ້ເຄື່ອງມືທັນສະໄໝໃນການເກັບລາຍຮັບໄດ້ຕາມແຜນ ແລະ ຄາດຄະເນຈະລື່ນແຜນໃນທ້າຍປີ 2026; ອັດຕາເງິນເຟີ້ມີທ່າອ່ຽງຫຼຸດລົງ, ການແກ້ໄຂຄວາມທຸກຍາກໄດ້ຮັບການເອົາໃຈໃສ່ ປະກອບສ່ວນຢ່າງຕັ້ງໜ້າ ເຮັດໃຫ້ຊີວິດການເປັນຢູ່ຂອງປະຊາຊົນບັນດາເຜົ່າ ໄດ້ຮັບການປັບປຸງດີຂຶ້ນເທື່ອລະກ້າວ; ກອງປະຊຸມ ສະເໜີໃຫ້ລັດຖະບານເອົາໃຈໃສ່ ຊຸກຍູ້ການປະຕິບັດຕາມກົດໝາຍຢ່າງເຂັ້ມງວດ ແລະ ສຸມໃສ່ການເກັບລາຍຮັບດ້ວຍການຫັນເປັນທັນສະໄໝທົ່ວປະເທດ, ເຂົ້າສູ່ລະບົບເທື່ອລະກ້າວ, ສາມາດເຊື່ອມຕໍ່ກັບທຸກຂະແໜງການ; ໃຫ້ມີນະໂຍບາຍການດຶງດູດການລົງທຶນທີ່ຊັດເຈນ, ສືບຕໍ່ເກັບລາຍຮັບງົບປະມານຈາກການຂຸດຄົ້ນ ແລະ ສົ່ງອອກແຮ່ທາດໃຫ້ຄົບຖ້ວນຕາມກົດໝາຍ, ຫຼຸດຜ່ອນການຍົກເວັ້ນ ແລະ ຜ່ອນຜັນພາສີ-ອາກອນທີ່ຈະເຮັດໃຫ້ລັດເສຍລາຍຮັບງົບປະມານ; ຊຸກຍູ້ສົ່ງເສີມ ແລະ ອຳນວຍຄວາມສະດວກໃນການເຂົ້າຫາແຫຼ່ງທຶນຂອງທຸລະກິດຂະໜາດນ້ອຍ ແລະ ຂະໜາດກາງ, ມີນະໂຍບາຍໃນການນໍາໃຊ້ລົດໄຟຟ້າ ເພື່ອຫຼຸດຜ່ອນລາຍຈ່າຍໃນການຊື້ພະລັງງານເຊື້ອໄຟ, ສືບຕໍ່ດໍາເນີນການປະຕິຮູບລັດວິສາຫະກິດໃຫ້ມີຄວາມແຂງແຮງ, ມີຄຸນນະພາບ ແລະ ມີປະສິດທິຜົນ; ກອງປະຊຸມສະເໜີໃຫ້ລັດຖະບານເອົາໃຈໃສ່ ການສະໜອງແນວພັນ, ການສົ່ງເສີມຜະລິດສິນຄ້າທີ່ເປັນທ່າແຮງຂອງທ້ອງຖິ່ນ ໃຫ້ສອດຄ່ອງກັບແນວທາງການສ້າງເສດຖະກິດເອກະລາດ ເປັນເຈົ້າຕົນເອງ, ສົ່ງເສີມພາກເອກະຊົນໃນການຜະ ລິດຝຸ່ນ, ປຸ໋ຍ ແລະ ອາຫານສັດ ແລະ ມີມາດຕະການຈໍາກັດການນໍາເຂົ້າສິນຄ້າທີ່ສາມາດຜະລິດໄດ້ພາຍໃນຢ່າງເຂັ້ມງວດ, ປັບປຸງລະບົບຊົນລະປະທານ ເພື່ອສາມາດຮັບໃຊ້ການຜະລິດໃນລະດູແລ້ງ; ເພີ່ມທະວີຄວາມເຂັ້ມງວດໃນການຄຸ້ມຄອງ, ປົກປັກຮັກສາ, ນໍາໃຊ້ປ່າໄມ້ ເພື່ອໃຫ້ບັນລຸເນື້ອທີ່ປົກຫຸ້ມຂອງປ່າໄມ້ໄດ້ 65% ໃນປີ 2030, ສຸມໃສ່ການຂຶ້ນສຳມະໂນຄົວທີ່ດິນເພື່ອສ້າງຖານລາຍຮັບໃໝ່, ມີມາດຕະການສົ່ງເສີມການເກັບລາຍຮັບຈາກອາ ກອນທີ່ດິນດ້ວຍລະບົບທັນສະໄໝ; ມີມາດຕະການເດັດຂາດຕໍ່ການບຸກລຸກທໍາລາຍປ່າໄມ້ 3 ປະເພດປ່າ ແລະ ອຸທິຍານແຫ່ງຊາດ, ຕິດຕາມກວດກາໂຄງການໃຫ້ເຊົ່າ ແລະ ສຳປະທານທີ່ດິນຂອງລັດ, ມີການປະເມີນຜົນກະທົບຕໍ່ສິ່ງແວດລ້ອມ ແລະ ມີມາດຕະການຢ່າງເຂັ້ມງວດຕໍ່ຜູ້ກະທຳຜິດ ແລະ ລະເມີດກົດໝາຍ; ກອງປະຊຸມສະເໜີໃຫ້ລັດຖະບານເອົາໃຈໃສ່ການສ້ອມແປງເສັ້ນທາງທີ່ເປ່ເພ ໂດຍສະເພາະໃນເຂດຫ່າງໄກສອກຫຼີກ-ຊົນນະບົດ, ເສັ້ນ ທາງລຽບ ແລະ ອອກສູ່ບໍລິເວນຊາຍແດນ, ທາງຫຼວງແຫ່ງຊາດ, ໂຄງການຟື້ນຟູໄພພິບັດສຸກເສີນ, ໂຄງການ ການກໍ່ສ້າງຕ້ານເຈື່ອນ, ຄຸ້ມຄອງນໍ້າໜັກລົດບັນທຸກສິນຄ້າຢ່າງເຂັ້ມງວດ, ເດັດຂາດ, ມີມາດຕະການປັບໄໝ ຕໍ່ຜູ້ປະກອບການທີ່ລະເມີດລະບຽບກົດໝາຍ; ກອງປະຊຸມ ສະເໜີໃຫ້ລັດຖະບານປະເມີນການຈັດຕັ້ງປະຕິບັດຄໍາສັ່ງສະບັບເລກທີ 06/ນຍ, ເລກທີ 46/ນຍ ແລະ ຄໍາສັ່ງສະບັບເລກທີ 11/ກມສພ ຢ່າງເຂັ້ມງວດ, ເພີ່ມທະວີຄວາມເອົາໃຈໃສ່ຕິດຕາມກວດກາປະເມີນຜົນໂຄງການລົງທຶນທັງພາຍໃນ ແລະ ຕ່າງປະເທດ ແລະ ມີມາດຕະການເຂັ້ມງວດຕໍ່ບັນດາບໍລິສັດ ທີ່ບໍ່ປະຕິບັດຕາມສັນຍາ, ລະບຽບກົດໝາຍ ແລະ ບໍ່ໄດ້ມາດຕະຖານ, ໂຄງການມີຄວາມຄືບໜ້າຊ້າ, ບໍ່ມີປະສິດທິຜົນ; ຢຸດຕິໂຄງການປະເພດ C, C+ ແລະ ແຈ້ງໃຫ້ທ້ອງຖິ່ນຮັບຊາບ ແລະ ມີຄວາມເປັນເອກະພາບໃນການຈັດຕັ້ງປະຕິບັດ; ສະເໝີໃຫ້ພິຈາລະນາຄືນການຂະຫຍາຍຕາຂ່າຍໄຟຟ້າສູ່ຊົນນະບົດ, ສົ່ງເສີມພະລັງງານທາງເລືອກ ເປັນຕົ້ນ ພະລັງງານລົມ, ແສງຕາເວັນ, ການສະໜອງໄຟຟ້າ ເພື່ອນໍາໃຊ້ເຂົ້າໃນໂຄງການລົງທຶນເພື່ອສາມາດຈັດຕັ້ງປະຕິບັດໂຄງການໄດ້ ແລະ ສາມາດປະຕິບັດພັນທະທາງດ້ານການເງິນໃຫ້ລັດຖະບານ; ກອງປະຊຸມ ສະເໜີໃຫ້ລັດຖະບານເພີ່ມທະວີການແກ້ໄຂບັນຫາຄູອາສາສະໝັກ ແລະ ຂາດແຄນຄູ, ການກໍານົດເວລາໃນການປັບປຸງຫຼັກສູດ 6+3+3 ໃຫ້ສາມາດປະຕິບັດໃນສົກຮຽນ 2028-2029; ປັບປຸງຄຸນນະພາບການສຶກສາ ມີການຈັດສັນໂກຕາລັດຖະກອນໃຫ້ຂະແໜງສຶກສາ ແລະ ສາທາລະນະສຸກໃຫ້ຫຼາຍຂຶ້ນ; ຕິດຕາມ, ຊຸກຍູ້ການຈັດສັນງົບປະມານໃຫ້ຂົງເຂດການສຶກສາ, ສາທາລະນະສຸກໃຫ້ສົມຄູ່ກັບຄວາມສໍາຄັນທີ່ພັກ-ລັດໃຫ້ຄວາມເອົາໃຈ ໃສ່; ສືບຕໍ່ພັດທະນາສີມືແຮງງານດ້ານຕ່າງໆ ໃຫ້ມີຄຸນນະພາບ, ຕອບສະໜອງໄດ້ຕະຫຼາດແຮງງານພາຍໃນ ແລະ ຕ່າງປະເທດ ແລະ ສືບຕໍ່ຈັດຕັ້ງປະຕິບັດນະໂຍບາຍຕອບແທນບຸນຄຸນຕໍ່ບຸກຄົນ ແລະ ຄອບຄົວທີ່ມີຄຸນງາມ ຄວາມດີຕໍ່ປະເທດຊາດ.

2) ກອງປະຊຸມພິຈາລະນາ ແລະ ຮັບຮອງເອົາວາລະແຫ່ງຊາດ ວ່າດ້ວຍການພັດທະນາຊົນນະບົດ ແລະ ແກ້ໄຂຄວາມທຸກຍາກຂອງປະຊາຊົນ ຊຶ່ງເປັນການຈັດຕັ້ງຜັນຂະຫຍາຍເນື້ອໃນຈິດໃຈຂອງກອງປະຊຸມໃຫຍ່ຄັ້ງທີ XII ຂອງພັກວາງອອກ. ກອງປະຊຸມ ເຫັນດີໂດຍພື້ນຖານຕໍ່ການກໍານົດໂຄງຮ່າງວາລະແຫ່ງຊາດສະບັບນີ້, ເວລາການຈັດຕັ້ງປະຕິບັດແຕ່ປີ 2027-2030 ຊຶ່ງສອດຄ່ອງຕາມແຜນພັດທະນາເສດຖະກິດ-ສັງຄົມແຫ່ງຊາດ 5 ປີຄັ້ງທີ X, ເຫັນດີຕໍ່ການກຳນົດທັດສະນະ, ຫຼັກການ, ຄາດໝາຍ, ທິດທາງ, ວຽກຈຸດສຸມໃຫຍ່ ແລະ ມາດຕະການຈັດຕັ້ງປະຕິບັດທີ່ລະອຽດສົມຄວນ.

ກອງປະຊຸມ ສະເໜີລັດຖະບານເອົາໃຈໃສ່ຕື່ມບາງດ້ານເຊັ່ນ: ຄວນມີງົບປະມານເປັນບ້ວງສະເພາະ, ອາດຈະຄົ້ນຄວ້າບ້ວງເງິນເກີນແຜນຂອງແຕ່ລະແຂວງ ແລະ ການປະກອບສ່ວນຂອງປະຊາຊົນ ແລະ ສັງຄົມ, ມີນະ ໂຍບາຍດຶງດູດການລົງທຶນໃນຂົງເຂດກະສິກຳ-ອຸດສາຫະກຳປຸງແຕ່ງຢູ່ເຂດຊົນນະບົດຫ່າງໄກສອກຫຼີກ, ອຳນວຍຄວາມສະດວກໃຫ້ປະຊາຊົນສາມາດເຂົ້າເຖິງແຫຼ່ງທຶນ ແລະ ສິນເຊື່ອໄດ້ງ່າຍ, ສະດວກ, ວ່ອງໄວ ແລະ ມີອັດຕາດອກເບ້ຍທີ່ເໝາະສົມ, ມີການຈັດສັນເຂດການຜະລິດ, ເອົາໃຈໃສ່ການອອກໃບຕາດິນ, ມີການແນະນໍາທາງດ້ານເຕັກນິກ, ວິຊາການ ເຂົ້າໃນວຽກງານການປູກ-ການລ້ຽງ; ສ້າງໂຮງງານປຸງແຕ່ງຕິດພັນກັບຕະຫຼາດ; ສ້າງ ແລະ ປັບປຸງສູນທົດລອງ, ສູນສົ່ງເສີມກະສິກຳ; ສ້າງ ແລະ ສ້ອມແປງເສັ້ນທາງທີ່ເປ່ເພ ໃຫ້ສາມາດນໍາໃຊ້ໄດ້ຕະຫຼອດປີ; ສະໜອງໄຟຟ້າ, ນໍ້າສະອາດ, ລະບົບໂທລະຄົມ ແລະ ການສື່ສານໃຫ້ທົ່ວເຖິງ; ປັບປຸງສະຖານການສຶກສາ ແລະ ສະໜອງອຸປະກອນການຮຽນ-ການສອນ, ມີນະໂຍບາຍຕໍ່ນັກຮຽນທີ່ຮຽນດີ, ຮຽນເກັ່ງ, ຜູ້ທຸກຍາກ ແລະ ດ້ອຍໂອກາດ; ເອົາໃຈໃສ່ການປັບປຸງສຸກສາລາໃຫ້ດີ, ໃຫ້ມີແພດຊ່ວຍເກີດລູກ ແລະ ສັກຢາວັກຊິນກັນພະຍາດໃຫ້ທົ່ວເຖິງ; ມີການສ້າງວຽກເຮັດງານທຳຢູ່ຊົນນະບົດໃຫ້ຊາວໜຸ່ມ, ສ້າງສູນຝຶກອົບຮົມວິຊາອາຊີບໃຫ້ຊາວໜຸ່ມ, ປຸກ ລະດົມການມີສ່ວນຮ່ວມຂອງລະບົບການເມືອງຂັ້ນຮາກຖານ ເຂົ້າຮ່ວມການພັດທະນາຊົນນະບົດ ແລະ ແກ້ໄຂຄວາມທຸກຍາກຂອງປະຊາຊົນດ້ວຍການຂົນຂວາຍ, ປຸກລະດົມຈິດໃຈຮັກຊາດ, ຮັກບ້ານເກີດເມືອງນອນ, ສ້າງຄວາມມຸ່ງໝັ້ນໃນການພັດທະນາຂອງປະຊາຊົນ ເພື່ອສ້າງເສດຖະກິດເອກະລາດເປັນເຈົ້າຕົນເອງ. ເພື່ອບັນລຸເປົ້າໝາຍໃນການພັດທະນາຊົນນະບົດ ແລະ ແກ້ໄຂຄວາມທຸກຍາກຂອງປະຊາຊົນ ສະເໜີໃຫ້ລັດຖະບານມີກົນໄກປະສານງານກັບ 5 ພາກສ່ວນກ່ຽວຂ້ອງຢ່າງກົມກຽວເຊັ່ນ: ພາກລັດ, ພາກເອກະຊົນ ຜູ້ປະກອບການ, ພາກ ສ່ວນທະນາຄານ, ພາກສ່ວນເຕັກໂນໂລຊີ-ວິຊາການ ແລະ ພາກທຸລະກິດ.

3) ກອງປະຊຸມໄດ້ພິຈາລະນາ, ຮັບຮອງເອົາການສ້າງ ແລະ ປັບປຸງກົດໝາຍ 2 ສະບັບ. ໃນນີ້, ກົດ ໝາຍວ່າດ້ວຍຄັງເງິນແຫ່ງລັດ (ສະບັບສ້າງໃໝ່) ແລະ ກົດໝາຍວ່າດ້ວຍງົບປະມານແຫ່ງລັດ (ສະບັບປັບປຸງ) ເພື່ອໃຫ້ສອດຄ່ອງກັບການຮັບຮອງເອົາວາລະແຫ່ງຊາດ ວ່າດ້ວຍການພັດທະນາຊົນນະບົດ ແລະ ແກ້ໄຂຄວາມທຸກຍາກຂອງປະຊາຊົນ ທັງເປັນການປະກອບສ່ວນສໍາຄັນໃນການຄຸ້ມຄອງລັດ, ຄຸ້ມຄອງສັງຄົມດ້ວຍກົດ ໝາຍໃຫ້ເປັນຮູບປະທຳ ແລະ ມີປະສິດທິຜົນຍິ່ງໆຂຶ້ນ.

ກອງປະຊຸມໄດ້ມອບໃຫ້ຄະນະຮັບຜິດຊອບນໍາເອົາເນື້ອໃນຂອງຮ່າງກົດໝາຍສອງສະບັບໄປຮຽບຮຽງໃຫ້ຄົບຖ້ວນສົມບູນ ເພື່ອໄດ້ປະກາດໃຊ້ໂດຍໄວ ແລະ ນໍາໄປສູ່ການຈັດຕັ້ງປະຕິບັດໃຫ້ມີປະສິດພາບ ແລະ ປະສິດທິຜົນເປັນຢ່າງດີ. 

4) ກອງປະຊຸມໄດ້ຮັບຟັງການຊີ້ແຈງ ຕໍ່ຄໍາຊັກຖາມຂອງທ່ານນາຍົກລັດຖະມົນຕີ ແລະ ບັນດາທ່ານໃນຄະນະລັດຖະບານ ທັງໝົດ 9 ທ່ານ ຊຶ່ງເປັນບັນຫາເຄັ່ງຮ້ອນຂອງສັງຄົມ ຕໍ່ແຜນພັດທະນາເສດຖະກິດ-ສັງຄົມແຫ່ງຊາດ, ແຜນງົບປະມານແຫ່ງລັດ, ແຜນເງິນຕາ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2026 ແລະ ວາລະແຫ່ງຊາດ ວ່າດ້ວຍການພັດທະນາຊົນນະບົດ ແລະ ແກ້ໄຂຄວາມທຸກຍາກຂອງປະຊາຊົນ. 

5) ກອງປະຊຸມໄດ້ມີການປຶກສາຫາລື ແລະ ຮັບຮອງເອົາບັນດາບັນຫາທີ່ສໍາຄັນຂອງຊາດທີ່ກ່ຽວຂ້ອງກັບວາລະແຫ່ງຊາດ ວ່າດ້ວຍການພັດທະນາຊົນນະບົດ ແລະ ການແກ້ໄຂຄວາມທຸກຍາກຂອງປະຊາຊົນ ແລະ ກົດ ໝາຍສອງສະບັບ ໂດຍມີການຮັບຮອງເອົາ 4 ມະຕິທີ່ກ່ຽວຂ້ອງດ້ວຍຄະແນນສູງແຕ່ 90% ຂຶ້ນໄປ.

ການດໍາເນີນກອງປະຊຸມສະໄໝວິສາມັນ ເທື່ອທີ 1 ຂອງສະພາແຫ່ງຊາດ ຊຸດທີ X ໃນຄັ້ງນີ້, ເປັນການຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XII ຂອງພັກ, ແຜນພັດທະນາເສດຖະກິດ-ສັງຄົມແຫ່ງຊາດ 5 ປີຄັ້ງທີ X ເຂົ້າສູ່ວຽກງານຕົວຈິງ, ແມ່ນໝາກຜົນລວມຍອດສະຕິປັນຍາ, ການໃຊ້ສິດປະຊາທິປະໄຕ ກໍຄືຜົນຂອງການຍົກສູງຄວາມຮັບຜິດຊອບທາງການເມືອງ ຂອງບັນດາສະມາຊິກສະພາແຫ່ງຊາດ, ການຕັດສິນໃຈສູງຂອງລັດຖະບານ, ອົງການລັດທີ່ກ່ຽວຂ້ອງ ທີ່ມີຄວາມພະຍາຍາມ ແລະ ມີມາດຕະການຕົວຈິງໃນການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນໃຫ້ຕົກໄປເທື່ອລະກ້າວ, ເພື່ອສ້າງຄວາມເຊື່ອໝັ້ນໃຫ້ປະຊາຊົນຕໍ່ການນໍາພາຂອງພັກ ແລະ ລັດເຮົາໃນພາລະກິດປົກປັກຮັກສາ ແລະ ພັດທະນາປະເທດຊາດ ໃຫ້ມີຄວາມໜັກແໜ້ນຂຶ້ນເລື້ອຍໆ. (ຂ່າວ: ວັນເພັງ, ພາບ: ສໍານານ)