ກອງປະຊຸມສາກົນເພື່ອສະເຫຼີມສະຫຼອງວັນສັນຕິພາບສາກົນ ທີ່ ສປ ຈີນ

ຮອງປະທານສະພາແຫ່ງຊາດ ປະທານຄະນະສັນຕິພາບ ແລະ ສາມັກຄີ ຂອງລາວ ໄດ້ເຂົ້າຮ່ວມກອງປະຊຸມສາກົນສະເຫຼີມສະຫຼອງວັນສັນຕິພາບສາກົນ ປະຈຳປີ 2024 ແລະ ຢ້ຽມຢາມ ຢູ່ ສປ ຈີນ.

ໃນວັນທີ 19 ກັນຍາ 2024, ທ່ານ ສົມມາດ ພົນເສນາ ໄດ້ເຂົ້າຮ່ວມພິທີເປີດກອງປະຊຸມສາກົນເພື່ອສະເຫຼີມສະຫຼອງວັນສັນຕິພາບສາກົນ 21 ກັນຍາ. ໃຫ້ກຽດເຂົ້າຮ່ວມ ແລະ ມີຄໍາເຫັນກ່າວເປີດ ໂດຍ ທ່ານ ຫານ ເຈິງ (Han Zheng), ຮອງປະທານປະເທດ ສປ ຈີນ. ນອກນັ້ນ, ຍັງມີບັນດາທ່ານອະດີດປະທານາທິບໍດີ, ລັດຖະມົນຕີ, ຮອງລັດຖະມົນຕີ ຈາກ 80 ປະເທດ ແລະ ອົງການຈັດຕັ້ງສາກົນເຂົ້າຮ່ວມ 150 ທ່ານ. ໃນໂອກາດດັ່ງກ່າວ ທ່ານປະທານຄະນະສັນຕິພາບ ແລະ ສາມັກຄີ ຂອງລາວ ໄດ້ມີຄໍາເຫັນໃນເວທີໃນຫົວຂໍ້ ເພື່ອລະນຶກວັນສາກົນ ເພື່ອສັນຕິພາບ ພາຍໃຕ້ຄຳຂວັນ “ ຢຶດໝັ້ນຕໍ່ອະນາຄົດຮ່ວມກັນເພື່ອສ້າງໂລກແຫ່ງການຢູ່ຮ່ວມກັນໂດຍສັນຕິ” ຄໍາຂວັນດັ່ງກ່າວແມ່ນເປົ້າໝາຍອັນແທ້ຈິງ ຂອງວິໄສທັດ ທາງການທູດທີ່ ທ່ານ ສີ ຈິ້ນຜິງ ໄດ້ວາງອອກໃນໄລຍະໃໝ່ ເພື່ອຜົນປະໂຫຍດອັນຍາວນານ ຂອງບັນດາປະຊາຊາດ. ທ່ານ ສົມມາດ ພົນເສນາ ໄດ້ມີຄໍາເຫັນຕີລາຄາສະພາບການພາກພື້ນ ແລະ ສາກົນ ເຫັນວ່າຍັງສືບຕໍ່ຜັນແປໄປຢ່າງໄວວາ, ສັບສົນ, ບັນຫາສະພາບອາກາດ, ໄພພິບັດທໍາມະຊາດ ແລະ ການປະທະກັນ ດ້ວຍກໍາລັງອາວຸດຍັງສືບຕໍ່ເກີດຂຶ້ນຢູ່ຫຼາຍຂົງເຂດຂອງໂລກ ແລະ ແຜ່ລາມເປັນວົງກວ້າງ, ບັນຫາເຫຼົ່ານັ້ນໄດ້ເປັນໄພຂົ່ມຂູ່ຕໍ່ສັນຕິພາບ, ຄວາມໝັ້ນຄົງສາກົນ ແລະ ການພັດທະນາ ຂອງບັນດາປະເທດໃນໂລກ. ພ້ອມນັ້ນ, ກໍໄດ້ຊົມເຊີຍ ແລະ ຕີລາຄາສູງຕໍ່ການປະກອບສ່ວນຢ່າງເອົາໃຈໃສ່ ຂອງ ສປ ຈີນ ໃນຄວາມພະຍາຍາມສ້າງສັນຕິພາບ, ຄວາມໝັ້ນຄົງ ແລະ ການພັດທະນາ ຂອງໂລກ ໂດຍສະເພາະແມ່ນການລິເລີ່ມແນວຄວາມຄິດ “5 ຫຼັກການຢູ່ຮ່ວມກັນໂດຍສັນຕິ”. ສໍາລັບປະຊາຊົນລາວຮູ້ດີເຖິງຄຸນຄ່າ ຂອງສັນຕິພາບ ແລະ ຜົນຮ້າຍຂອງສົງຄາມ ແລະ ພ້ອມທີ່ຈະຮ່ວມກັບປະຊາຊາດຜູ້ຮັກຫອມສັນຕິພາບໃນໂລກ ໃນການສະໜັບສະໜູນ ແລະ ຕໍ່ສູ້ເພື່ອສັນຕິພາບ ເພື່ອເຮັດໃຫ້ໂລກ ຂອງພວກເຮົາມີຄວາມສະຫງົບ, ມີຄວາມຍຸຕິທໍາ ເພື່ອໃຫ້ຄົນຮຸ່ນໃໝ່ ຂອງພວກເຮົາໄດ້ດໍາລົງຊີວິດຢ່າງມີຄວາມສຸກ.
ໃນກອງປະຊຸມ ຄະນະຜູ້ແທນຈາກບັນດາປະເທດຕ່າງໆ ທີ່ຮັກຫອມສັນຕິພາບ ແລະ ຄວາມເປັນທຳຈະໄດ້ແລກປ່ຽນຄວາມຄິດເຫັນ ແລະ ແບ່ງປັນບົດຮຽນການເຄື່ອນໄຫວວຽກງານສັນຕິພາບ ເພື່ອປະ ກອບສ່ວນເຂົ້າໃນການເສີມສ້າງສັນຕິພາບ ແລະ ຄວາມໝັ້ນຄົງສາກົນ ຖືເປັນກົນໄກແຫ່ງການຮ່ວມມືພາ ຄີທີ່ທຸກຝ່າຍໄດ້ຮັບຜົນປະໂຫຍດຢ່າງແທ້ຈິງ, ທັງເປີດກວ້າງພັດທະນາເສດຖະກິດໂລກໃນທຸກດ້ານ ໂດຍ ຢຶດຖືເອົາຄວາມຜາສຸກ ຂອງປະຊາຊົນໃນທົ່ວໂລກເປັນບຸລິມະສິດອັນດັບໜຶ່ງ.
ນອກຈາກເຂົ້າຮ່ວມກອງປະຊຸມ, ຄະນະຜູ້ແທນລາວຍັງໄດ້ພົບປະສອງຝ່າຍກັບການນຳ ຂອງແຂວງຊານຕົ່ງ ສປ ຈີນ. ຝ່າຍ ຈີນ ໄດ້ແຈ້ງຂໍ້ມູນ ແລະ ສະພາບການພົ້ນເດັ່ນ ຂອງການພັດທະນາເສດຖະກິດ-ສັງຄົມ ຂອງ ແຂວງຊານຕົ່ງ ໃຫ້ຊາບ, ຊຶ່ງແຂວງຊານຕົງເປັນແຂວງທີ່ມີປະຫວັດສາດຍາວນານ, ເປັນບ້ານເກີດ ຂອງ ທ່ານ ຂົງຈື້ ມີບົດບາດສໍາຄັນດ້ານວັດທະນະທໍາ ແລະ ເປັນແຂວງທີ່ນໍາໜ້າດ້ານການສຶກສາ, ການຄົ້ນຄວ້າ ແລະ ມີການຂະຫຍາຍຕົວທາງດ້ານເສດຖະກິດອັນດັບ 3 ຂອງປະເທດຈີນ. ສ່ວນຝ່າຍ ລາວ ກໍໄດ້ແຈ້ງສະພາບອັນພົ້ນເດັ່ນເປັນຕົ້ນແມ່ນປັດຈຸບັນ, ພັກ ແລະ ລັດຖະບານລາວ ພວມສຸມໃສ່ການຈັດຕັ້ງປະຕິບັດມະຕິຄັ້ງທີ XI ຂອງພັກ ແລະ ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ 9 ຂອງລັດຖະບານ. ໃນເດືອນພຶດສະພາຜ່ານມາ, ສູນກາງພັກ ໄດ້ດໍາເນີນກອງປະຊຸມຄົບຄະນະເທື່ອທີ 8 ສະໄໝທີ XI ໂດຍໄດ້ຕີລາຄາຄືນ ແລະ ໃຫ້ທິດຊີ້ນໍາຕໍ່ການແກ້ໄຂບັນຫາຫຍຸ້ງຍາກທາງດ້ານເສດຖະກິດ, ການເງິນ ແລະ ແກ້ໄຂສະພາບການເປັນຢູ່ ຂອງປະຊາຊົນ.
ສອງຝ່າຍ ຍັງໄດ້ຕີລາຄາສູງຕໍ່ສາຍພົວພັນມິດຕະພາບ ອັນເປັນມູນເຊື້ອ ແລະ ການຮ່ວມມືແບບຄູ່ຮ່ວມຍຸດທະສາດ ຮອບດ້ານ, ໝັ້ນຄົງຍາວນານຕາມທິດ 4 ດີ ແລະ ຄູ່ຮ່ວມຊາຕາກຳ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ ແລະ ຈີນ ທີ່ນັບມື້ໄດ້ຮັບການເສີມຂະຫຍາຍ ແລະ ເພີ່ມພູນຄູນສ້າງນັບມື້ກ້າວເຂົ້າສູ່ລວງເລິກ ແລະ ນໍາເອົາຜົນໂຫຍດຕົວຈິງມາສູ່ປະຊາຊົນສອງຊາດ.
(ຂ່າວ: ຄຕພ)