![]() |
ກອງປະຊຸມ ສະຫຼຸບ-ປິດໂຄງການ ສ້າງຄວາມເຂັ້ມແຂງໃຫ້ຊາວກະສິກອນ 4 ກຸ່ມປູກພືດ ແລະລ້ຽງສັດ ຢູ່ບ້ານໂພນສະຫວ່າງ ແລະບ້ານໂພນໂຮມເມືອງປາກອູແຂວງຫຼວງພະບາງໂດຍໄດ້ຮັບທຶນສະໜັບສະໜູນ ຈາກລັດຖະບານ ສປ ຈີນ ພາຍໃຕ້ກອງທຶນພິເສດແມ່ນໍ້າຂອງ-ແມ່ນໍ້າລ້ານຊ້າງ ໃນມູນຄ່າ 282,000 ໂດລາ ຫຼື ປະມານ 6 ຕື້ກວ່າກີບ,ໄດ້ຈັດຂຶ້ນໃນວັນທີ 17 ພະຈິກນີ້ ທີ່ ແຂວງຫຼວງພະບາງ, ໂດຍມີ ທ່ານ ຈີນດາວົງ ໂພສີຄຳ ຮອງປະທານຄະນະກຳມະການປົກຄອງແຂວງ, ພ້ອມດ້ວຍຜູ້ຕາງໜ້າກົງສູນໃຫຍ່ ສປ ຈີນ ປະຈຳພາກເໜືອ ແຂວງຫຼວງພະບາງ, ຜູ້ຕາງໜ້າກະຊວງກ່ຽວຂ້ອງແລະພາກສ່ວນກ່ຽວຂ້ອງເຂົ້າຮ່ວມ.
ໃນກອງປະຊຸມໄດ້ຜ່ານບົດສະຫຼຸບການປະຕິບັດວຽກງານ ເຊິ່ງປະກອບມີ 5 ກິດຈະກຳຕົ້ນຕໍ ຄື: ຝຶກອົບຮົມເຕັກວິຊາການດ້ານການປູກພືດ ແລະລ້ຽງສັດ ໃຫ້ແກ່ຊາວກະສິກອນ; ສະໜອງອຸປະກອນການຜະລິດ ໃຫ້ຊາວກະສິກອນ; ທະລຸເສັ້ນທາງໄປຫາເຂດຜະລິດ ຂອງປະຊາຊົນ ຈຳນວນ 2 ເສັ້ນ; ກໍ່ສ້າງຕະຫຼາດຈຳໜ່າຍຜົນຜະລິດກະສິກຳ 1 ແຫ່ງ ແລະນໍາພາຊາວກະສິກອນ ໄປທັດສະນະສຶກສາ, ແລກປ່ຽນບົດຮຽນຢູ່ຕ່າງປະເທດເຊິ່ງແຕ່ລະກິດຈະກໍາ ຄະນະຊີ້ນໍາ, ຄະນະປະສານງານແຕ່ລະຂັ້ນ ຕະຫຼອດຮອດການຈັດຕັ້ງບ້ານ ແລະປະຊາຊົນ ໄດ້ມີຄວາມເປັນເຈົ້າການສູງ ໃນການປະສານງານ, ຊຸກຍູ້, ຕິດຕາມ ແລະຈັດຕັ້ງປະຕິບັດ ເຮັດໃຫ້ ແຕ່ລະກິດຈະກຳສາມາດບັນລຸຄາດໝາຍທີ່ວາງໄວ້, ຜ່ານການຈັດຕັ້ງປະຕິບັດໂຄງການ ເຮັດໃຫ້ພື້ນຖານໂຄງລ່າງຂອງບ້ານ ໄດ້ຮັບ ການພັດທະນາອີກກ້າວໜຶ່ງ ແລະຊີວິດການເປັນຢູ່ຂອງປະຊາຊົນບັນດາເຜົ່າ ຢູ່ 2 ບ້ານ ເປົ້າໝາຍ ໄດ້ຮັບການຍົກລະດັບໃຫ້ນັບມື້ນັບດີຂຶ້ນ.
ຈາກການປະເມີນໂດຍສຸ່ມຕົວຢ່າງ 36 ຄອບຄົວ ໃນຈໍານວນຄອບຄົວ ທີ່ໄດ້ເຂົ້າຮ່ວມ ໂຄງການທັງໝົດ 110 ຄອບຄົວ ເຫັນວ່າ ກ່ອນການຈັດຕັ້ງປະຕິບັດໂຄງການ ປະຊາຊົນມີລາຍຮັບ ສະເລ່ຍໄດ້ 56 ລ້ານກວ່າກີບຕໍ່ຄອບຄົວຕໍ່ປີ, ພາຍຫຼັງປະຕິບັດໂຄງການ ມີລາຍຮັບສະເລ່ຍໄດ້ 83 ລ້ານກວ່າກີບຕໍ່ຄອບຄົວຕໍ່ປີ ຫຼື ມີລາຍຮັບສະເລ່ຍເພີ່ມຂຶ້ນ 14%.
ທ່ານ ຈີນດາວົງ ໂພສີຄຳ ໄດ້ເນັ້ນໃຫ້ຄະນະຮັບຜິດຊອບໂຄງການ ສືບຕໍ່ຊຸກຍູ້, ຕິດຕາມ ການຄຸ້ມຄອງ ແລະນໍາໃຊ້ບັນດາກິດຈະກຳ ທີ່ໄດ້ສໍາເລັດໄປແລ້ວ ໃຫ້ມີຄວາມຍືນຍົງ, ສ່ວນການຈັດຕັ້ງບ້ານຂອງ 2 ບ້ານເປົ້າໝາຍ ຕ້ອງສືບຕໍ່ນໍາພາ ປະຊາຊົນໃນການປົກປັກຮັກສາ, ບູລະນະສ້ອມແປງພື້ນຖານໂຄງລ່າງ ໃຫ້ສາມາດນໍາໃຊ້ໄດ້ຢ່າງຍາວນານ, ຕິດຕາມ-ຊຸກຍູ້ ການຜະລິດຂອງປະຊາຊົນໃຫ້ເປັນປົກກະຕິ ແລະນັບມື້ນັບຫັນເຂົ້າສູ່ເຕັກນິກວິຊາການເທື່ອລະກ້າວ ແລະເຕັມຮູບແບບ ເພາະກິດຈະກຳປັບປຸງຊີວິດການເປັນຢູ່ ແມ່ນສໍາຄັນຫຼາຍ ເປັນການສ້າງລາຍຮັບເຂົ້າສູ່ຄອບຄົວໂດຍກົງ.
ຂ່າວ-ພາບ: ອາພຸດເດດ ບຸບຜາ

ຄໍາເຫັນ