ກົດໝາຍວ່າດ້ວຍຄັງເງິນແຫ່ງລັດ ຈະເປັນເຄື່ອງມືສໍາຄັນຄຸ້ມຄອງວຽກງານຄັງເງິນແຫ່ງລັດ

ທ່ານ ສັນຕິພາບ ພົມວິຫານ ໄດ້ຍົກໃຫ້ເຫັນເຫດຜົນ ແລະ ຄວາມຈຳເປັນໃນການສ້າງກົດໝາຍວ່າດ້ວຍຄັງເງິນແຫ່ງລັດ: ຊຶ່ງການປະຕິບັດດຳລັດວ່າດ້ວຍຄັງເງິນແຫ່ງຊາດ ສະບັບເລກທີ 259/ນຍ ໃນໄລຍະຜ່ານມາ ຍັງບໍ່ທັນມີປະສິດທິຜົນ ເນື່ອງຈາກມີຫຼາຍເນື້ອໃນຍັງບໍ່ທັນສອດຄ່ອງກັບສະພາບເງື່ອນໄຂໃນປັດຈຸບັນ ເຮັດໃຫ້ການຈັດຕັ້ງປະຕິບັດວຽກງານຕົວຈິງພົບຄວາມຫຍຸ້ງຍາກ ເປັນຕົ້ນ:

1) ການຄຸ້ມຄອງລວມສູນແຫຼ່ງເງິນຂອງລັດເຂົ້າບັນຊີລວມສູນຄັງເງິນ (TSA) ຢູ່ທະນາຄານແຫ່ງ ສປປ ລາວ ຍັງເຮັດບໍ່ທັນໄດ້ດີ ແລະ ຄົບຖ້ວນ;

2) ການມອບລາຍຮັບ ແລະ ປະຕິບັດລາຍຈ່າຍຢູ່ຂັ້ນທ້ອງຖິ່ນໂດຍສ່ວນໃຫຍ່ ແມ່ນຍັງນໍາໃຊ້ເງິນສົດ ຊຶ່ງເຮັດໃຫ້ມີຄວາມສ່ຽງໃນການຄຸ້ມຄອງ ແລະ ເກັບຮັກສາເງິນ, ການຕ້ານ ແລະ ສະກັດກັ້ນການຮົ່ວໄຫຼຂອງລາຍຮັບງົບປະມານແຫ່ງລັດ ຍັງບໍ່ຮັດກຸມເທົ່າທີ່ຄວນ;

3) ການສ້າງເອກະສານລາຍງານການເງິນຍັງມີຄວາມຊັກຊ້າ, ບໍ່ຄົບຖ້ວນ ແລະ ບໍ່ທັນຕາມກຳນົດເວລາ;

4) ການຕິດຕາມ, ກວດກາ ການປະຕິບັດລາຍຈ່າຍງົບປະມານແຫ່ງລັດໃຫ້ຖືກຕ້ອງຕາມແຜນການທີ່ສະພາແຫ່ງຊາດຮັບຮອງ ແລະ ເບີກຈ່າຍຜ່ານບັນຊີລວມສູນຄັງເງິນຢູ່ທະນາຄານແຫ່ງ ສປປ ລາວ ຍັງເຮັດບໍ່ໄດ້ດີເທົ່າທີ່ຄວນ;

5) ກົນໄກການຄຸ້ມຄອງບັນຊີເງິນຝາກຂອງບັນດາຫົວໜ່ວຍງົບປະມານແຫ່ງລັດ, ກອງທຶນຂອງລັດ ແລະ ທຶນຊ່ວຍເຫຼືອທາງການເພື່ອການພັດທະນາ ລວມສູນຜ່ານລະບົບຄັງເງິນ ຍັງບໍ່ທັນເປັນລະບົບຄົບຊຸດ.

ຮ່າງກົດໝາຍ ວ່າດ້ວຍຄັງເງິນແຫ່ງລັດ ປະກອບມີ X ພາກ, 8 ໝວດ, 56 ມາດຕາ, ພາຍຫຼັງກົດໝາຍສະບັບນີ້ຖືກຮັບຮັບຮອງ ແລະ ປະກາດໃຊ້ແລ້ວ ຈະເປັນເຄື່ອງມືທີ່ສໍາຄັນໃຫ້ຄັງເງິນແຫ່ງລັດແຕ່ລະຂັ້ນນໍາໃຊ້ເຂົ້າໃນການຄຸ້ມຄອງທຸກແຫຼ່ງເງິນຂອງລັດ ເຂົ້າບັນຊີລວມສູນຄັງເງິນ (TSA) ຢູ່ທະນາຄານແຫ່ງ ສປປ ລາວ ເພື່ອບໍລິຫານແຫຼ່ງເງິນໃຫ້ມີຄວາມຄ່ອງຕົວ ສາມາດຕອບສະໜອງກັບລາຍຈ່າຍ, ຖືກຕ້ອງຕາມກົດໝາຍ, ລະບຽບການ ແລະ ມີຄວາມໂປ່ງໃສ, ສາມາດກວດກາ, ກວດສອບໄດ້; ພັດທະນາວຽກງານຄັງເງິນແຫ່ງລັດໃຫ້ມີຄວາມເຂັ້ມ ແຂງ, ຫັນເປັນທັນສະໄໝໃນການຄຸ້ມຄອງລາຍຮັບ, ປະຕິບັດລາຍຈ່າຍ ແລະ ການສະຫຼຸບລາຍງານໃຫ້ມີຄວາມຖືກຕ້ອງ, ວ່ອງໄວ, ຊັດເຈນ ແລະ ທັນຕາມກຳນົດເວລາ; ຍົກສູງຄວາມຮັບຜິດຊອບຂອງຄັງເງິນແຫ່ງລັດຂັ້ນສູນກາງ ແລະ ທ້ອງຖິ່ນ ກັບພາກສ່ວນທີ່ກ່ຽວຂ້ອງ ໃນການປະຕິບັດວຽກງານຄັງເງິນແຫ່ງລັດໃຫ້ສູງຂຶ້ນ.

ຂ່າວ: ພູວັນ; ພາບ: ສຳນານ