 |
ທ່ານນາງສູນທອນໄຊຍະຈັກກ່າວວ່າ: ຕະຫຼອດໄລຍະເກືອບ 1 ປີຜ່ານມາ, ສະພາແຫ່ງຊາດໄດ້ອຸທິດຕົນປະຕິບັດ 3 ພາລະບົດບາດຫຼັກດ້ວຍຄວາມຮັບຜິດຊອບສູງແລະຍາດໄດ້ຜົນງານພົ້ນເດັ່ນໃນຫຼາຍດ້ານຄື: ດ້ານນິຕິບັນຍັດ:ໄດ້ຈັດກອງປະຊຸມສະໄໝວິສາມັນຄັ້ງທີ 1 ຮັບຮອງເອົາກົດໝາຍ 2 ສະບັບ (ກົດໝາຍວ່າດ້ວຍຄັງເງິນແຫ່ງລັດສ້າງໃໝ່ແລະກົດໝາຍວ່າດ້ວຍງົບປະມານສະບັບປັບປຸງ) ພ້ອມທັງກຳລັງພິຈາລະນາຮັບຮອງເອົາອີກ 8 ສະບັບໃນກອງປະຊຸມສະໄໝສາມັນຄັ້ງທີ 2 ທີ່ກຳລັງດຳເນີນຢູ່,ດ້ານການຕົກລົງບັນຫາສຳຄັນຂອງຊາດ: ໄດ້ເລືອກຕັ້ງບັນດາຕຳແໜ່ງສຳຄັນຂອງປະເທດ, ຮັບຮອງເອົາວາລະແຫ່ງຊາດວ່າດ້ວຍການພັດທະນາຊົນນະບົດແລະແກ້ໄຂຄວາມທຸກຍາກ, ພ້ອມທັງອອກມະຕິລວມ 21 ສະບັບແລະມະຕິຄະນະປະຈຳສະພາແຫ່ງຊາດ 96 ສະບັບ. ພ້ອມດຽວກັນນີ້, ກໍໄດ້ປັບປຸງກົງຈັກການຈັດຕັ້ງຕາມທິດກະທັດຮັດໂດຍຫຼຸດກຳມາທິການຈາກ 9 ມາເປັນ 5 ກໍາມາທິການ, ດ້ານການຕິດຕາມກວດກາ:ໄດ້ຕິດຕາມການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ວາລະແຫ່ງຊາດ, ການແກ້ໄຂຄຳຮ້ອງຂໍຄວາມເປັນທຳແລະຮັບຄຳສະເໜີຂອງປະຊາຊົນຜ່ານສາຍດ່ວນໃນກອງປະຊຸມສະພາຊຸດທີ 2 ຈຳນວນ 615 ສາຍ (ສັງລວມໄດ້ 431 ເລື່ອງ), ການສ້າງຄວາມເຂັ້ມແຂງແລະວຽກງານຕ່າງປະເທດ:ເນື່ອງຈາກສະມາຊິກສະພາແຫ່ງຊາດແລະສະພາປະຊາຊົນຂັ້ນແຂວງກວ່າ 80% ເປັນຜູ້ໃໝ່, ຈຶ່ງໄດ້ເນັ້ນໜັກການຝຶກອົບຮົມຍົກລະດັບຄວາມສາມາດຢ່າງຕໍ່ເນື່ອງ. ພ້ອມດຽວກັນນັ້ນ, ກໍໄດ້ເຄື່ອນໄຫວວຽກງານການຕ່າງປະເທດຢ່າງຕັ້ງໜ້າເຊັ່ນ: ເຂົ້າຮ່ວມກອງປະຊຸມພາກພື້ນ-ສາກົນ 23 ຄັ້ງແລະເປັນເຈົ້າພາບຈັດກອງປະຊຸມສຳຄັນຫຼາຍລະດັບ.
ສຳລັບທິດທາງແຜນການປີ 2027 ເພື່ອສືບຕໍ່ບຸກທະລຸວຽກງານໃນໄລຍະໃໝ່, ສະພາແຫ່ງຊາດໄດ້ວາງຄາດໝາຍສຳຄັນໄວ້ຄື: ດ້ານນິຕິບັນຍັດ:ສ້າງແລະປັບປຸງກົດໝາຍໃຫ້ໄດ້ຕາມແຜນຈຳນວນ 32 ສະບັບ (ສ້າງໃໝ່ 2 ສະບັບ, ປັບປຸງ 30 ສະບັບ), ດ້ານການຕົກລົງແລະຕິດຕາມກວດກາ:ຍົກສູງຄຸນນະພາບການຕົກລົງບັນຫາພື້ນຖານຂອງຊາດ, ເຂັ້ມງວດຕິດຕາມກວດກາຂົງເຂດເສດຖະກິດ-ການເງິນ, ວັດທະນະທຳ-ສັງຄົມ, ລະບົບຍຸຕິທຳແລະໂຄງການລົງທຶນທີ່ມີຜົນກະທົບຕໍ່ສິ່ງແວດລ້ອມແລະຊີວິດການເປັນຢູ່ຂອງປະຊາຊົນ, ຍົກລະດັບບຸກຄະລາກອນແລະທ້ອງຖິ່ນ:ສືບຕໍ່ສ້າງຄວາມເຂັ້ມແຂງໃຫ້ສະມາຊິກສະພາທຸກຂັ້ນ, ພ້ອມທັງເພີ່ມທະວີການປະສານງານລະຫວ່າງຄະນະສະມາຊິກສະພາແຫ່ງຊາດປະຈຳເຂດເລືອກຕັ້ງກັບອົງການປົກຄອງທ້ອງຖິ່ນ.
ຕອນທ້າຍພິທີ, ທ່ານນາງສູນທອນໄຊຍະຈັກໄດ້ສະແດງຄວາມຂອບໃຈຢ່າງເລິກເຊິ່ງຕໍ່ສື່ມວນຊົນທຸກໆສຳນັກທີ່ໄດ້ຕິດຕາມ, ສ່ອງແສງແລະເຜີຍແຜ່ຂໍ້ມູນຂ່າວສານການເຄື່ອນໄຫວວຽກງານຂອງສະພາແຫ່ງຊາດໄປເຖິງປະຊາຊົນລາວບັນດາເຜົ່າທົ່ວປະເທດຢ່າງທັນການແລະພາວະວິໄສ.(ຂ່າວ-ພາບ: ແສງຈັນ+ບຸນອຸ້ມ)
ຄໍາເຫັນ