ທ່ານ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ປປ ລາວ ໄດ້ຊີ້ແຈງຕໍ່ຄຳເຫັນຂອງຄະນະປະຈຳສະພາແຫ່ງຊາດ ແລະ ບັນດາສະມາຊິກສະພາແຫ່ງຊາດ ໃນກອງປະຊຸມສະໄໝວິສາມັນ ເທື່ອທີ I ຂອງສະພາແຫ່ງຊາດ ຊຸດທີ X ໃນວັນທີ 8 ກໍລະກົດຜ່ານມາ, ທີ່ສະພາແຫ່ງຊາດ ໂດຍການເປັນປະທານຂອງທ່ານ ໄຊສົມພອນ ພົມວິຫານ ປະທານສະພາແຫ່ງຊາດ.
ທ່ານ ນາຍົກລັດຖະມົນຕີ ໄດ້ຊີ້ແຈງວ່າ: ເພື່ອຮັບມືກັບຄວາມບໍ່ແນ່ນອນ ແລະ ຫຼຸດຜ່ອນຜົນກະທົບຂອງລາຄານໍ້າມັນເຊື້ອໄຟທີ່ມີທ່າອ່ຽງເພີ່ມສູງຂຶ້ນ ທັງໃນສະເພາະໜ້າ ແລະ ຍາວນານ ລວມທັງເປັນການຫຼຸດຜ່ອນ ຄວາມຕ້ອງການນໍາໃຊ້ເງິນຕາໃນການຊໍາລະສິນຄ້ານໍາເຂົ້າ ເນື່ອງຈາກວ່າ ການນໍາເຂົ້ານໍ້າມັນເຊື້ອໄຟ, ເຄມີພັນ ແລະ ພາຫະນະແມ່ນສິນຄ້າ 3 ອັນດັບຕົ້ນທີ່ນໍາເຂົ້າຫຼາຍ, ຍົກຕົວຢ່າງ ໄລຍະ 5 ປີຜ່ານມາ, ປະເທດເຮົາໄດ້ນໍາເຂົ້ານໍ້າມັນເຊື້ອໄຟລວມເປັນ 8,103 ລ້ານລິດ, ຄິດເປັນເງິນ 5,559 ລ້ານໂດລາ. ພ້ອມດຽວກັນນັ້ນ, ປະເທດເຮົາ ກໍມີແຫຼ່ງຜະລິດພະລັງງານໄຟຟ້າທີ່ຫຼວງຫຼາຍ. ສະນັ້ນ, ການສົ່ງເສີມ ການຂົນສົ່ງດ້ວຍຍານພະຫາໄຟຟ້າແມ່ນ ເໝາະສົມ ແລະ ສອດຄ່ອງກັບເງື່ອນໄຂຂອງປະເທດເຮົາ. ດັ່ງນັ້ນ, ລັດຖະບານ ຈຶ່ງໄດ້ອອກນິຕິກຳ ແລະ ມາດຕະການນິຕິກຳເພື່ອນໍາໃຊ້ລົດໄຟຟ້າ ແລະ ພະລັງງານທາງເລືອກດັ່ງນີ້:
1. ໄດ້ໂຈະນໍາເຂົ້າຊົ່ວຄາວລົດເບົາທີ່ໃຊ້ນໍ້າມັນເຊື້ອໄຟ ຊຶ່ງໃນໄລຍະ 3 ເດືອນຜ່ານມາ, ຕົວເລກການນໍາເຂົ້າພາຫະນະໄຟຟ້າ ແລະ ພະລັງງານທາງເລືອກເພີ່ມຂຶ້ນ 5,514 ຄັນ (ບໍ່ລວມລົດ 2-3 ລໍ້), ຄິດເປັນມູນຄ່າ 101.6 ລ້ານໂດລາ ທຽບໃສ່ໄລຍະດຽວກັນ ຂອງປີຜ່ານມາເພີ່ມຂຶ້ນເຖິງ 140.7%. ຕໍ່ກັບການໂຈະຊົ່ວຄາວນີ້ ກໍຂໍອະທິບາຍເພີ່ມເຕີມ ເນື່ອງຈາກຍັງມີຫາງສຽງສັງຄົມຈຳນວນໜຶ່ງທີ່ຍັງບໍ່ທັນເຂົ້າໃຈເລິກຊຶ່ງ, ເຖິງແມ່ນວ່າ ການຊື້ພາຫະນະຕ່າງໆ ແມ່ນນໍາໃຊ້ເງິນຂອງສັງຄົມເອງແຕ່ດ້ານມະຫາພາກ ຖ້າມີຄວາມຕ້ອງການນໍາໃຊ້ເງິນຕາຫຼາຍ ກໍສົ່ງຜົນກະທົບໂດຍລວມຕໍ່ລະບົບເງິນຕາ ລວມທັງອັດຕາເງິນເຟີ້ ແລະ ອັດຕາແລກປ່ຽນ. ຊຶ່ງທັງໝົດນີ້ເພື່ອຄວາມໝັ້ນຄົງດ້ານເສດຖະກິດ ແລະ ດ້ານພະລັງງານທີ່ນໍາໃຊ້ຢູ່ພາຍໃນປະເທດ,
2. ອະນຸມັດໃຫ້ບໍລິສັດທີ່ເປັນຕົວແທນຈໍາໜ່າຍ ແລະ ມີສູນບໍລິການຫຼັງການຂາຍເທົ່າ ນັ້ນ ທີ່ສາມາດນໍາເຂົ້າລົດໄຟຟ້າໄດ້ ເພື່ອສ້າງຄວາມເຊື່ອໝັ້ນໃນການນໍາໃຊ້ລົດໄຟຟ້າ, ຮັບປະກັນ ແລະ ສາມາດຕອບສະໜອງການບໍລິການສ້ອມແປງໃຫ້ສັງຄົມຢ່າງທົ່ວເຖິງ,
3. ຄົ້ນຄວ້າປັບປຸງລະບຽບການຕ່າງໆ ກ່ຽວກັບການຄຸ້ມຄອງຍານພາຫະນະທາງບົກໃຫ້ສອດຄ່ອງກັບການຂະຫຍາຍຕົວຂອງການນໍາໃຊ້ລົດໄຟຟ້າໃນປັດຈຸບັນ, ຄົ້ນ ຄວ້າ ແລະ ກຳນົດໂຄງສ້າງລາຄາຈໍາໜ່າຍລົດໄຟຟ້າ (EV) ໃຫ້ມີຄວາມເໝາະສົມ ເພື່ອປ້ອງກັນການສວຍໂອກາດຂຶ້ນລາຄາ ແລະ ສ້າງຄວາມເປັນທຳໃຫ້ຜູ້ບໍລິໂພກ,
4. ໄດ້ແຕ່ງຕັ້ງຄະນະກຳມະການຊີ້ນໍາລະດັບຊາດ ເພື່ອຜັນຂະຫຍາຍນະໂຍບາຍສົ່ງເສີມການໃຊ້ລົດໄຟຟ້າ ແລະ ພະລັງງານທາງເລືອກໃຫ້ເປັນຮູບປະທຳ ຕາມຂໍ້ຕົກລົງ ເລກທີ 31/ນຍ, ລົງວັນທີ 20 ເມສາ 2026. (ຂ່າວ-ພາບ: ສຳນານ)
ຄໍາເຫັນ