 |
ໂຄງການກໍ່ສ້າງຮ່ອງລະບາຍນໍ້າຕົວເມືອງທ່າແຂກ ໄດ້ເລີ່ມລົງມືກໍ່ສ້າງນັບແຕ່ ວັນທີ 1 ກັນຍາ 2022 ແລະ ໄດ້ສໍາເລັດ ໃນວັນທີ 31 ກໍລະກົດ 2025, ຊຶ່ງບັນດາກິດຈະກຳທີ່ຈັດຕັ້ງປະຕິບັດປະກອບມີ: ການກໍ່ສ້າງຮ່ອງລະບາຍນໍ້າ 5 ເສັ້ນ, ມີຄວາມຍາວ 8,172 ແມັດ, ກໍ່ສ້າງສະຖານີສູບນໍ້າຈໍານວນ 3 ແຫ່ງ, ກໍ່ສ້າງທໍ່ໂລດາ 1 ຈຸດ. ໂຄງການດັ່ງກ່າວ, ມີມູນຄ່າທັງໝົດ 4 ລ້ານກວ່າໂດລາສະຫະລັດ ຊຶ່ງແມ່ນໜຶ່ງໃນ 5 ກິດຈະກໍາໂຄງການພັດທະນາຕົວເມືອງຕາມແລວອານຸພາກພື້ນແມ່ນໍ້າຂອງ 4 ຫຼື (GMS4) ໂດຍທືນຊ່ວຍເຫຼືອຂອງທະນາຄານພັດທະນາອາຊີ. ຊຶ່ງມີຈຸດປະສົງເພື່ອແກ້ໄຂບັນຫານໍ້າຖ້ວມ ແລະ ນໍ້າເສຍໃນເຂດຕົວເມືອງທ່າແຂກ, ເພື່ອປັບປຸງລະບົບຮ່ອງລະບາຍນໍ້າໃຫ້ມີປະສິດທິພາບ, ຮັກສາຄວາມສະອາດຂອງສິ່ງແວດລ້ອມ ແລະ ຍົກລະດັບຄຸນນະພາບຊີວິດຂອງປະຊາຊົນ.
ເຂົ້າຮ່ວມພິທີມອບຮັບຄັ້ງນີ້, ມີທ່ານ ເຫຼັກໄຫຼ ສີວິໄລ ລັດຖະມົນຕີກະຊວງໂຍທາທິການ ແລະ ຂົນສົ່ງ, ທ່ານ ວັນໄຊ ພອງສະຫວັນ ເຈົ້າແຂວງຄໍາມ່ວນ, ມີບັນດາການນໍາຈາກສູນກາງ, ແຂວງ, ບໍລິສັດຜູ້ຮັບເໝົາ ແລະ ພາກສ່ວນກ່ຽວຂ້ອງເຂົ້າຮ່ວມ.
(ຂ່າວ-ພາບ: ກອງຄໍາ)
ຄໍາເຫັນ