ໂດຍການເປັນປະທານຂອງສະຫາຍ ນາງ ຕ້ອຍ ກອງຊັບກໍາມະການພັກເມືອງ ເລຂາຄະນະບໍລິຫານງານຊາວໜຸ່ມເມືອງ, ເປັນກຽດເຂົ້າຮ່ວມມີ ສະຫາຍ ໜູໄຊ ນໍກີຢາ ເລຂາຄະນະບໍລິຫານງານຊາວໜຸ່ມແຂວງ, ມີສະຫາຍ ສົມນຶກ ສິງຄໍາ ເລຂາຄະນະບໍລິຫານງານພັກເມືອງ ວ່າການເຈົ້າເມືອງໆຄອບ, ມີແຂກເຊີນອອ້ມຂ້າງເມືອງ ແລະ ຮາກຖານຊາວໜຸ່ມບ້ານທົ່ວເມືອງເຂົ້າຮ່ວມ.
ໃນກອງປະຊຸມ, ສະຫາຍ ນາງ ຕ້ອຍ ກອງຊັບ ໄດ້ກ່າວເປີດກອງປະຊຸມໃຫຍ່ຢ່າງເປັນທາງການ ພ້ອມທັງຜ່ານບົດລາຍງານການເມືອງທັງ 2 ພາກ ຊຶ່ງໄດ້ຕີລາຄາສະພາບການຈັດຕັ້ງປະຕິບັດມະຕິກອງປະຊຸມໃຫຍ່ຜູ້ແທນຊາວໜຸ່ມເມືອງຄອບຄັ້ງທີ V ຜ່ານມາ ແລະ ທິດທາງແຜນການ ພັດທະນາຊາວໜຸ່ມ 5 ປີຕໍ່ໜ້າ. ຄະນະບໍລິຫານງານຊາວໜຸ່ມເມືອງແມ່ນໄດ້ຖືເອົາວຽກງານສຶກສາອົບຮົບການເມືອງ - ແນວຄິດເປັນກົກ ເພື່ອແນໃສ່ເຮັດໃຫ້ຄະນະຊາວໜຸ່ມ, ສະມາຊິກຊາວໜຸ່ມ - ໄວໜຸ່ມ, ເຍົາວະຊົນໄດ້ຮັບຮູ້ເຊື່ອມຊຶມແນວທາງນະໂຍບາຍຂອງພັກ, ກົດໝາຍຂອງລັດ, ໂດຍສະເພາະ ແມ່ນມະຕິກອງປະຊຸມໃຫຍ່ຂອງຊາວໜຸ່ມຂັ້ນຕ່າງໆ, ມູນເຊື້ອຂອງຊາດ, ຂອງພັກ, ຂອງກອງທັບ, ຕັ້ງໜ້າຝຶກຝົນຫຼໍ່ຫຼອມ, ຮໍ່າຮຽນເອົາຄຸນສົມບັດສິນທຳປະຕິວັດ, ໂດຍຕິດພັນກັບຂໍ້ແຂ່ງຂັນ 4 ບຸກຂອງ ຄຊປປລ ,ຂໍ້ແຂ່ງຂັນ 3 ດີ 4 ຮູ້ ຂອງເຍົາວະຊົນທັນວາ ດ້ວຍຫຼາຍວິທີການ, ຫຼາຍຮູບການເປັນຕົ້ນແມ່ນ ຈັດຕັ້ງປາຖະກະຖາເລົ່າຫວນຄືນມູນເຊື້ອວັນສ້າງຕັ້ງຊາວໜຸ່ມ, ວັນສ້າງຕັ້ງເຍົາວະຊົນ ແລະ ວັນສໍາຄັນອື່ນໆ. ທົ່ວເມືອງມີຮາກຖານຊາວໜຸ່ມ 5 ຮາກຖານ ມີ 21 ໜ່ວຍຂຶ້ນກັບ, 38 ໜ່ວຍຮາກຖານ. ທົ່ວເມືອງມີໄວໜຸ່ມໃນເກນອາຍຸທັງໝົດ 8,009 ສະຫາຍ, ຍິງ 3,945 ສະຫາຍ, ສະມາຊິກຊາວໜຸ່ມປະຊົນປະຕິວັດລາວ 1,644 ສະຫາຍ, ຍິງ 557 ສະຫາຍ; ວຽກງານຜົນການປະເມີນ 4 ບຸກຂອງໜ່ວຍຮາກຖານ: ໜ່ວຍປະເພດແຂງ 37 ໜ່ວຍ, ໜ່ວຍກາງ 1 ໜ່ວຍ, ທົ່ວເມືອງປະກາດເປັນໜ່ວຍ 4 ບຸກແລ້ວ 4 ຮາກຖານ, 36 ໜ່ວຍ, ຍັງ 2 ໜ່ວຍ, ຜົນການປະເມີນຂອງສະມາຊິກຊາວໜຸ່ມ: ສະມາຊິກຊາວໜຸ່ມປະເພດແຂງ 1,385 ສະຫາຍ, ຍິງ 478 ສະຫາຍ, ກວມເອົາ 84.24%, ສະມາຊິກຊາວໜຸ່ມປະເພດກາງ 662 ສະຫາຍ, ຍິງ 17 ສະຫາຍ, ກວມເອົາ 3.77%, ສະມາຊິກຊາວໜຸ່ມປະເພດອ່ອນ 3 ສະຫາຍ, ກວມເອົາ 0,18%, ສະມາຊິກຊາວໜຸ່ມບໍ່ໄດ້ແບ່ງ 194 ສະຫາຍ, ຍິງ 62 ສະຫາຍ, ກວມເອົາ 11.80%; ຈາກນັ້ນ ຄະນະບໍລິຫານງານຊຸດເກົ່າໄດ້ຜ່ານບົດສຳຫຼວດການນຳພາພ້ອມທັງກ່າວລາໜ້າທີ່ ແລະ ກອງປະຊຸມໄດ້ປ່ອນບັດຄັດເລືອກເອົາຄະນະບໍລິຫານງານຊຸດໃໝ່, ຊຶ່ງມີຜູ້ສະມັກຈຳນວນ 17 ສະຫາຍ ເລືອກເອົາ 15 ສະຫາຍ.
ຜ່ານການປ່ອນບັດຕົວຈິງ ໄດ້ເລືອກເອົາສະຫາຍ ຄໍາບີ ທອງວັນຢາງ ເປັນເລຂາຄະນະບໍລິຫານງານຊາວໜຸ່ມເມືອງ, ສະຫາຍ ຟືຊົງ ໄມຈົວຍີຊົງ ເປັນຮອງເລຂາ ທັງເປັນປະທານກວດກາ, ສະຫາຍ ໄຫຼ ບຸນທັນ ເປັນຮອງເລຂາ, ສະຫາຍ ເມືອງຄໍາ ໄຊມູນຖີ ເປັນຮອງປະທານກວດກາ, ກອງປະຊຸມໄດ້ເລືອກເອົາ ຜູ້ແທນສົມບູນ 5 ສະຫາຍ ແລະ ຜູ້ແທນສໍາຮອງ 2 ສະຫາຍໄປຮ່ວມກອງປະຊຸມໃຫຍ່ຜູ້ແທນຊາວໝຸ່ມແຂວງໄຊຍະບູລີ ທີ່ຈະໄດ້ໄຂຂຶ້ນໃນຕໍ່ຫນ້າ.
(ພາບ-ຂ່າວ: ພົມມະນີ ອິນສະຫວັນ)
ຄໍາເຫັນ