ກະຊວງສຶກສາທິການ ແລະ ກິລາ (ສສກ) ໄດ້ຈັດພິທີເປີດການສອບເສັງແຂ່ງຂັນນັກຮຽນເກັ່ງລະດັບຊາດຂຶ້ນໃນວັນທີ 8 ເມສາຜ່ານມາທີ່ນະຄອນຫຼວງວຽງຈັນ ໂດຍມີທ່ານ ພຸດ ສິມມາລາວົງ ລັດຖະມົນຕີກະຊວງ ສສກ, ທ່ານ ບໍ່ວຽງຄໍາ ວົງດາລາ ລັດຖະມົນຕີກະຊວງເຕັກໂນໂລຊີ ແລະ ການສື່ສານ, ທ່ານ ໂພໄຊ ໄຊຍະສອນ ລັດຖະມົນຕີກະຊວງພະລັງງານ ແລະ ບໍ່ແຮ່, ມີຮອງລັດຖະມົນຕີ, ຫົວໜ້າ-ຮອງຫົວໜ້າກົມ, ຄູ-ອາຈານ, ນັກຮຽນ ພ້ອມດ້ວຍຄະນະຮັບຜິດຊອບກ່ຽວຂ້ອງເຂົ້າຮ່ວມ.
ທ່ານນາງ ນວມຄໍາ ຈັນທະບູລີ ວ່າການແທນຫົວໜ້າກົມສາມັນສຶກສາ ກະຊວງ ສສກ ກ່າວໃຫ້ຮູ້ວ່າ: ສົກຮຽນ 2024-2025 ແມ່ນຄັດເລືອກເອົານັກຮຽນມັດທະຍົມສຶກສາຜູ້ທີ່ສອບເສັງໄດ້ອັນດັບທີ 1-2 ລະດັບແຂວງ ແລະ ນະຄອນຫຼວງເຂົ້າຮ່ວມການສອບເສັງຄັ້ງນີ້ມີຈໍານວນ 228 ຄົນ ຍິງ 162 ຄົນ, ໃນນັ້ນຊັ້ນມັດທະຍົມສຶກສາຕອນຕົ້ນ (ມ4) ມີ 144 ຄົນ ຍິງ 92 ຄົນ ແລະ ຊັ້ນມັດທະຍົມສຶກສາຕອນປາຍ (ມ7) ມີ 144 ຄົນ ຍິງ 52 ຄົນ, ມີສາມະເນນ 5 ອົງ, ພະ 1 ອົງ ກວມເອົາ 22 ເຜົ່າ 4 ກຸ່ມພາສາ ໂດຍໄດ້ສອບເສັງ 4 ວິຊາຄື: ຄະນິດສາດ, ພາສາລາວ-ວັນນະຄະດີ, ຟີຊິກສາດ ແລະ ເຄມີສາດ. ນອກນີ້ຍັງໄດ້ຈັດແຂ່ງຂັນຖາມ-ຕອບວິທະຍາສາດເປັນເວລາ 1 ວັນ ແລະ ຍັງໄດ້ນໍາພາຕົວແທນນັກຮຽນເກັ່ງໄປທັດສະນະສຶກສາທີ່ຫໍພິພິທະພັນປະຫວັດສາດ ແລະ ວິທະຍາໄລເຕັກນິກການລົດໄຟອີກດ້ວຍ.
ແຫຼ່ງຂ່າວ: ວຽງຈັນໃໝ່
ຄໍາເຫັນ