ໂອກາດດັ່ງກ່າວ, ທ່ານ ຄຳພັນ ພົມມະທັດ ໄດ້ສະແດງຄວາມຕ້ອນຮັບຢ່າງອົບອຸ່ນ ພ້ອມທັງຕີລາຄາສູງ ຕໍ່ທ່ານຫົວໜ້າອົງການໄອຍະການສູງສຸດ ແຫ່ງ ສະຫະພັນຣັດເຊຍ ແລະ ຄະນະທີ່ໄດ້ມາຢ້ຽມຢາມ ສປປ ລາວ ຄັ້ງນີ້, ການຢ້ຽມຢາມຂອງຄະນະຜູ້ແທນ ສະຫະພັນຣັດເຊຍແມ່ນມີຄວາມໝາຍສໍາຄັນຍິ່ງ ຊຶ່ງເປັນການປະກອບສ່ວນເຂົ້າໃນການເສີມຂະຫຍາຍສາຍພົວພັນມິດຕະພາບອັນມີມູນເຊື້ອ ແລະ ການຮ່ວມມືຫຼາຍດ້ານ ລະຫ່ວາງສອງປະເທດ ລາວ ແລະ ຣັດເຊຍ, ໂດຍສະເພາະ ແມ່ນການຮ່ວມມືໃນຂົງເຂດກົດໝາຍ ແລະ ຍຸຕິທໍາໃຫ້ນັບມື້ນັບແໜ້ນແຟ້ນ ແລະ ເກີດດອກອອກຜົນຍິ່ງໆຂຶ້ນ. ພ້ອມນີ້ ທ່ານຍັງໄດ້ກ່າວເຖິງການພົວພັນລາວ ແລະ ຣັດເຊຍ ທີ່ໄດ້ສ້າງຕັ້ງສາຍພົວພັນການທູດນຳກັນ ໃນປີ 1960 ແລະ ໄດ້ເສີມສ້າງຂະຫຍາຍການຮ່ວມມືສືບຕໍ່ຮັດແໜ້ນການຮ່ວມມືອັນດີງາມຕະຫຼອດມາ, ເປັນປະເທດເພື່ອນມິດໃກ້ຊິດ ແລະ ໄດ້ໃຫ້ຄວາມສຳຄັນຕໍ່ການເປັນຄູ່ຮ່ວມມືຍຸດທະສາດດ້ານຄວາມໜັ້ນຄົງໃນພາກພື້ນ ອາຊີ-ປາຊີຟິກ. ພວກເຮົາມີສະມາຄົມມິດຕະພາບລາວ-ຣັດເຊຍ, ຣັດເຊຍ-ລາວ ແລະ ສປປ ລາວ ແມ່ນໄດ້ຮັບການຊ່ວຍເຫຼືອໃນຫຼາຍດ້ານຈາກຣັດເຊຍ ໂດຍສະເພາະດ້ານອຸປະກອນ ແລະ ເຕັກນິກທະຫານ, ສ້າງບຸກຄະລາກອນ, ເສີມຂະຫຍາຍການຮ່ວມມືທາງດ້ານເສດຖະກິດ, ການຄ້າ, ການລົງທຶນ, ການສຶກສາ, ສາທາລະນະສຸກ, ການທ່ອງທ່ຽວ ແລະ ອື່ນໆ.
ທ່ານຫົວໜ້າອົງການໄອຍະການສູງສຸດ ແຫ່ງ ສະຫະພັນ ຣັດເຊຍ ກໍໄດ້ສະແດງຄວາມຂອບໃຈຢ່າງສູງຕໍ່ກັບການຕ້ອນຮັບອັນອົບອຸ່ນຂອງທ່ານປະທານອົງການກວດກາແຫ່ງລັດ ໃນຄັ້ງນີ້ ແລະ ໃນໂອກາດດັ່ງກ່າວນີ້ ທ່ານຫົວໜ້າອົງການໄອຍະການສູງສຸດ ສະຫະພັນຣັດເຊຍ ໄດ້ລາຍງານການມາຢ້ຽມຢາມ ແລະ ເຮັດວຽກຢູ່ ສປປ ລາວ ຄັ້ງນີ້ ໃຫ້ຮັບຊາບ ເປັນຕົ້ນສະພາບການຮ່ວມມື ແລະ ການເຄື່ອນໄຫວວຽກງານ ອົງການໄອຍະການຂອງສອງປະເທດ ຣັດເຊຍ-ລາວ ໃນໄລຍະຜ່ານມາ ແມ່ນໄດ້ຮັບການພັດທະນາດີຂຶ້ນຢ່າງບໍ່ຢຸດຢັ້ງ, ສໍາຄັນແມ່ນການຜັດປ່ຽນຄະນະຜູ້ແທນຂັ້ນສູງໄປຢ້ຽມຢາມ ແລະ ແລກປ່ຽນບົດຮຽນຮ່ວມກັນ, ແນໃສ່ການພັດທະນາຂົງເຂດວຽກງານໄອຍະການຂອງສອງປະເທດໃຫ້ເຂົ້າສູ່ລວງເລິກ.
(ຂ່າວ-ພາບ: ສຸກສະຫວັນ)
ຄໍາເຫັນ