ກະຊວງກະສິກຳ ແລະ ປ່າໄມ້ (ກປ) ໄດ້ເປີດກອງປະຊຸມສະຫຼຸບວຽກງານກະສິກຳ, ປ່າໄມ້ ແລະ ພັດທະນາຊົນນະບົດ ປະຈໍາປີ 2024 ແລະ ທິດທາງແຜນການ ປີ 2025 ຂຶ້ນໃນວັນທີ 30 ມັງກອນ ນີ້ ທີ່ຫໍປະຊຸມແຫ່ງຊາດ ໂດຍການເປັນປະທານຂອງ ທ່ານ ລິນຄໍາ ດວງສະຫວັນ ລັດຖະມົນຕີກະຊວງ ກປ ຊຶ່ງມີບັນດາພາກສ່ວນກ່ຽວຂ້ອງຈາກທັງສູນກາງ ແລະ ທ້ອງຖິ່ນເຂົ້າຮ່ວມ.
ທ່ານ ລິນຄໍາ ດວງສະຫວັນ ໄດ້ກ່າວເປີດກອງປະຊຸມວ່າ: ກອງປະຊຸມຄັ້ງນີ້, ມີຄວາມໝາຍສຳຄັນຕໍ່ການສະຫຼຸບສັງລວມ, ກຳນົດແຜນການ ແລະ ປຶກສາຫາລື ວຽກງານຂອງຂະແໜງການ ກປ ແລະ ພັດທະນາຊົນນະບົດ ຊຶ່ງຈະໄດ້ດຳເນີນເປັນເວລາ 2 ວັນ ໂດຍກອງປະຊຸມຈະໄດ້ຮັບຟັງບົດສະຫຼຸບຕີລາຄາການຈັດຕັ້ງປະຕິບັດ ແຜນພັດທະນາກະສິກໍາ, ປ່າໄມ້ ແລະ ພັດທະນາຊົນນະບົດ ປີ 2024 ແລະ ທິດທາງແຜນການປີ 2025 ແລະ ແຜນ 5 ປີ (2006-2030); ຮັບຟັງການສະຫຼຸບຕີລາຄາການຈັດຕັ້ງຜັນຈະຫຍາຍ ມະຕິ 19/ກມສພ, ມະຕິ 04 ແລະ ມະຕິ 05 ທີ່ຕິດພັນກັບພາລະບົດບາດຂອງຂະແໜງ ກປ. ນອກຈາກນັ້ນ, ຈະໄດ້ຮັບຟັງການນໍາສະເໜີ ບັນດາໂຄງການ, ນະໂຍບາຍ, ນິຕິກໍາ ແລະ ບັນຫາຕ່າງໆ ຈາກບັນດາກົມພາຍໃນກະຊວງກະສິກໍາ ແລະ ປ່າໄມ້ ແລະ ບາງຂະແໜງການຂັ້ນສູນກາງ ແລະ ຂັ້ນທ້ອງຖິ່ນ ທີ່ກ່ຽວຂ້ອງຈໍານວນໜຶ່ງ ພ້ອມທັງເປີດກວ້າງໃຫ້ຜູ້ເຂົ້າຮ່ວມໄດ້ປະກອບຄໍາຄິດຄໍາເຫັນ; ພ້ອມກັນນີ້, ກໍຈະໄດ້ມອບແຜນວຽກຈຸດສຸມ ປີ 2025 ໃຫ້ພະແນກກະສິກໍາ ແລະ ປ່າໄມ້ຂັ້ນແຂວງ, ການນໍາຂັ້ນທ້ອງຖິ່ນ ແລະ ບັນດາຂະແໜງການທີ່ກ່ຽວຂ້ອງຂັ້ນສູນກາງຈໍານວນໜຶ່ງ ເພື່ອສືບຕໍ່ຊີ້ນໍາ-ນໍາພາຈັດຕັ້ງຜັນຂະຫຍາຍປະຕິບັດຕາມຂອບເຂດສິດ ແລະ ພາລະບົດບາດຂອງຕົນ.
ເພື່ອເຮັດໃຫ້ກອງປະຊຸມປະສົບຜົນສໍາເລັດຕາມລະດັບຄາດໝາຍທີ່ວາງໄວ້ນັ້ນ, ທ່ານລັດຖະມົນຕີກະຊວງ ກປ ກໍໄດ້ຮຽກຮ້ອງໃຫ້ບັນດາຜູ້ແທນກອງປະຊຸມ ໂດຍສະເພາະບັນດາພະແນກ ກປ ຊຶ່ງເປັນພາກສ່ວນຈັດຕັ້ງປະຕິບັດບັນດານິຕິກໍາ ແລະ ລະບຽບການຕ່າງໆ ຢູ່ຂັ້ນທ້ອງຖິ່ນ ແລະ ຍັງເປັນພາກສ່ວນທີ່ຕິດແທດກັບຜູ້ປະກອບການຂອງຂະແໜງ ກປ ຕ້ອງໄດ້ຕີລາຄາຄືນ ຜ່ານມາໄດ້ພົບພໍ້ບັນຫາໃດແດ່, ອັນສໍາຄັນບັນດາສິ່ງທ້າທາຍຂອງວຽກງານກະສິກໍາ, ປ່າໄມ້ ແລະ ພັດທະນາຊົນນະບົດ ທີ່ພວກເຮົາກໍາລັງປະເຊີນ ແລະ ຈະປະເຊີນໃນຕໍ່ໜ້າ ໂດຍສະເພາະການຜະລິດເປັນສິນຄ້າເພື່ອສົ່ງອອກ, ການດຸ່ນດ່ຽງຜົນຜະລິດລະຫວ່າງ ແຂວງ ຕໍ່ ແຂວງ ເພື່ອທົດແທນການນໍາເຂົ້າຈາກຕ່າງປະເທດ.
ທ່ານ ລິນຄໍາ ດວງສະຫວັນ ຍັງກ່າວວ່າ: ຜົນຂອງກອງປະຊຸມໃນຄັ້ງນີ້, ມີຄວາມໝາຍຄວາມສໍາຄັນຫຼາຍ ເນື່ອງຈາກເປັນການສະຫຼຸບຕີລາຄາປີມ້ວນທ້າຍ ຂອງການຈັດຕັ້ງປະຕິບັດແຜນພັດທະນາ ກປ ແລະ ພັດທະນາຊົນນະບົດ ຊຶ່ງໃນໄລຍະ 5 ປີ ຜ່ານມາ ຂະແໜງການໄດ້ສຸມໃສ່ 4 ແຜນງານຫຼັກ ຄື: ການຜະລິດ ຄໍ້າປະກັນສະບຽງອາຫານ ແລະ ໂພຊະນາການ, ການຜະລິດກະສິກຳເປັນສິນຄ້າ, ການຄຸ້ມຄອງ ຊັບພະຍາກອນປ່າໄມ້, ການພັດທະນາຊົນນະບົດ ແລະ ແກ້ໄຂຄວາມທຸກຍາກ.
(ຂ່າວ-ພາບ: ສຸກສະຫວັນ)
ຄໍາເຫັນ