 |
ໂດຍສະເພາະເທສະບານເມືອງນານ, ມີບ້ານທີ່ໄດ້ຮັບຜົນກະທົບໃນເບື້ອງຕົ້ນ 7 ບ້ານ ຢູ່ລຽບແຄມນໍ້ານານ ຄື: ບ້ານນາຝາຍ, ນາເລົາ, ປ່າໄຜ່, ສີບຸນເຮືອງ, ສີມຸງຄຸນ, ທາດ ແລະ ບ້ານນາເຄີນ ແລະ ມີອີກ 3 ບ້ານທີ່ບໍ່ຢູ່ລຽບແຄມນໍ້ານານ ທີ່ຖືກຜົນກະທົບນໍ້າຖ້ວມຊຸ ຄື: ບ້ານນ້ຳຜັກ, ຫ້ວຍສາລາ ແລະ ບ້ານແກ້ວມະນີ ລວມມີເຮືອນທີ່ຖືກຜົນກະທົບຈໍານວນ 918 ຫຼັງ. ໃນນັ້ນ, ນໍ້າໄຫຼຊຸທັງຫຼັງຈຳນວນ 3 ຫຼັງ, ເປເພໜັກປະມານ 135 ຫຼັງ, ດິນນາທີ່ຖືກກະທົບປະມານ 65 ເຮັກຕາ. ໃນນັ້ນ, ຖືກເສຍຫາຍ 100% ປະມານ 37 ເຮັກຕາ, ສ່ວນພາຫະນະ, ວັດຖຸອຸປະກອນຕ່າງໆ ແລະ ສັດລ້ຽງ ຍັງບໍ່ທັນໄດ້ຂໍ້ມູນ, ເນືອງຈາກປະຊາຊົນກໍາລັງເລັ່ງໃສ່ໃນການເຄື່ອນຍ້າຍ. ປັດຈຸບັນ ກໍາມະການຄຸ້ມຄອງໄພພິບັດຂັ້ນເມືອງ ໄດ້ລະດົມກຳລັງທະຫານ-ຕ່ຳຫຼວດ ຊ່ວຍປະຊາຊົນອະນາໄມເຮືອນພາຍຫຼັງລະດັບນ້ຳລຸດລົງ, ທັງໄດ້ແຕ່ງຕັ້ງທີມງານ ລົງເກັບກໍາຂໍ້ມູນຄວາມເສຍຫາຍໃນເບື້ອງຕົ້ນ ເພື່ອລາຍງານໃຫ້ພາກສ່ວນທີ່ກ່ຽວຂ້ອງ ໄດ້ຮັບຮູ້ໂດຍໄວ.
 |
ໂອກາດລົງຕິດຕາມ ແລະ ແກ້ໄຂສະພາບໄພພິບັດໃນຕອນບ່າຍວັນທີ່ 23 ກໍລະກົດນີ້, ທ່ານ ບຸນເລື່ອມ ມະນີວົງ ຮອງເຈົ້າແຂວງຫຼວງພະບາງ ປະທານຄະນະກຳມະການຄຸ້ມຄອງໄພພິບັດຂັ້ນແຂວງ ໄດ້ເນັ້ນໃຫ້ອົງການປົກຄອງເມືອງ ເລັ່ງແກ້ໄຂສະພາບຜົນກະທົບໃຫ້ໄວ ໂດຍສະເພາະຄອບຄົວທີ່ຖືກນ້ຳຊຸໄຫຼ ຕ້ອງຈັດສັນບ່ອນຢູ່ ແລະ ສະໜອງອາຫານໃຫ້ ເພື່ອແກ້ໄຂເບື້ອງຕົ້ນ ພ້ອມນັ້ນ ໃຫ້ເລັ່ງເກັບກຳຂໍ້ມູນຜົນກະທົບເພື່ອລາຍງານຂັ້ນແຂວງໂດຍໄວ.
ໂອກາດນີ້, ທ່ານຮອງເຈົ້າແຂວງຫຼວງພະບາງ ໄດ້ມອບເງີນສົດຈຳນວນ 50 ລ້ານກີບ ໃຫ້ອົງການປົກຄອງເມືອງ ເພື່ອນຳໃຊ້ເຂົ້າໃນການແກ້ໄຂສະພາບໄພພິບັດເບື້ອງຕົ້ນ.
(ແຫຼ່ງຂ່າວ: ແຂວງຫຼວງພະບາງ)
ຄໍາເຫັນ