ທ່ານ ສອນທະນູ ທຳມະວົງ ໄດ້ລາຍງານການປັບປຸງກົງຈັກການຈັດຕັ້ງບັນດາພະແນກການທີ່ນອນໃນເປົ້າໝາຍ ໂຮມ ແລະ ໂອນວຽກງານ ວ່າ: ພາຍຫຼັງມີມະຕິຂອງ ຄະນະບໍລິຫານງານສູນກາງພັກ ສະບັບເລກທີ 03/ຄບສພ ແລະ ຄໍາແນະນໍາຂອງຄະນະ ເລຂາທິການສູນກາງພັກ ສະບັບເລກທີ 483/ຄລສພ, ແຂວງບໍລິຄໍາໄຊ ໄດ້ອອກຂໍ້ຕົກລົງ ຂອງທ່ານເຈົ້າແຂວງ ສະບັບເລກທີ 258/ຂບຊ, ລົງວັນທີ 25 ເມສາ 2025 ວ່າດ້ວຍ ການແຕ່ງຕັ້ງຄະນະຮັບຜິດຊອບປັບປຸງກົງຈັກການຈັດຕັ້ງ, ໄດ້ເກັບກຳຂໍ້ມູນກົງຈັກການ ຈັດຕັ້ງພະນັກງານ-ລັດຖະກອນ ນັບແຕ່ຜູ້ມີຕຳແໜ່ງບໍລິຫານຮອດພະນັກງານວິຊາການ ເກັບກຳຂໍ້ມູນກົງຈັກການຈັດຕັ້ງພັກ ແລະ ສະມາຊິກພັກຮອດປັດຈຸບັນສໍາເລັດ 100%; ສໍາລັບການເກັບກຳຂໍ້ມູນວັດຖຸ, ອຸປະກອນທີ່ເປັນຊັບສິນຂອງລັດ ຮອດປັດຈຸບັນສໍາເລັດ 80%, ຈາກນັ້ນ ທ່ານ ອຸດອນ ສອນສຸລິນ ຫົວໜ້າຄະນະໂຄສະນາອົບຮົມແຂວງບໍລິຄຳໄຊ ໄດ້ລາຍງານການກະກຽມຄາມພ້ອມໂອນຍົກຍ້າຍວຽກງານຖະແຫຼງຂ່າວສື່ວນຊົນພ້ອມບຸກຄະລາກອນ ມາຂຶ້ນກັບຄະນະໂຄສະນາອົບຮົມແຂວງ.
ໃນໂອກາດດັ່ງກ່າວ, ທ່ານ ຄຳພັນ ເຜີຍຍະວົງ ໄດ້ມີຄຳເຫັນຊີ້ນຳວ່າ: ການປັບປຸງກົງຈັກການຈັດຕັ້ງໃນການໂຮມ ແລະ ໂອນວຽກງານເຂົ້າກັນ ແມ່ນປະຕິບັດຕາມແນວທາງນະໂຍບາຍຂອງພັກ, ໃຫ້ລວມສູນເຂົ້າກັນເພື່ອໃຫ້ມີກຳລັງແຮງ, ທ່ວງທັນກັບສະພາບການ ໂດຍສະເພາະການຕອບໂຕ້ຕໍ່ກັບສະພາບໃຫ້ມີຄວາມທ່ວງທັນ ແລະ ທ່ານເນັ້ນວ່າ: ການປັບປຸງການຈັດຄັ້ງນີ້, ເພື່ອເຮັດແນວໃດໃຫ້ກົງຈັກການຈັດຕັ້ງມີຄວາມກະທັດຮັດ, ຫັນເປັນ ທັນສະໄໝ, ຫຼຸດຜ່ອນກົງຈັກການຈັດຕັ້ງ, ໃນນັ້ນຕ້ອງຮັບປະກັນວຽກໃຫ້ມີປະສິດທິພາບ, ປະສິດທິຜົນ, ມີຄວາມເຂັ້ມແຂງໃນການເຮັດວຽກໃຫ້ມີຄວາມວ່ອງໄວ, ເອົາໃຈໃສ່ວຽກງານ ສຶກສາອົບຮົມການເມືອງ - ແນວຄິດໃຫ້ເຂົ້າໃຈ, ມີຄວາມອຸ່ນອ່ຽນ, ທຸ່ນທ່ຽງເຊື່ອໝັ້ນ ຕໍ່ການນໍາພາຂອງພັກ, ປະຕິບັດພາລະບົດບາດ, ຄວາມຮັບຜິດຊອບໃຫ້ມີຄວາມເປັນ ເອກະພາບກັນ, ຫັນເປັນທັນສະໄໝ ແລະ ນຳໃຊ້ເຄື່ອງມືທີ່ທັນສະໄໝເຂົ້າໃສ່ໃນການເຮັດ ວຽກງານ, ພ້ອມນີ້ຂັ້ນຂະແໜງການໃຫ້ສືບຕໍ່ປັບປຸງ ແລະ ຈັດວາງບຸກຄະລາກອນເຂົ້າໃສ່ ວຽກງານໃຫ້ເປັນອັນດຽວກັນ ແລະ ໃຫ້ເປັນລະບົບ. ໂດຍສະເພາະການປັບປຸງພາລະບົດ ບາດຂອງໂຄສະນາອົບຮົມ ແມ່ນໃຫ້ເບິ່ງພາລະບົດບາດວຽກງານຖະແຫຼງຂ່າວໃຫ້ເຂົ້າເປັນ ອັນໜຶ່ງອັນດຽວ ແລະ ເບິ່ງກົນໄກການເຮັດວຽກໃຫ້ເຂົ້າກັນ ແລະ ໃຫ້ສອດຄ່ອງເພື່ອເຮັດ ແນວໃດໃຫ້ວຽກງານເຜີຍແຜ່ການເມືອງແນວຄິດມີຄວາມທັນສະໄໝທັນກັບສະພາບການ, ໃນນັ້ນຕ້ອງເປັນເຈົ້າການໃນການເປັນເນເສນາທິການໃຫ້ຄະນະພັກ ແລະ ຄະນະຈຳພັກ ແຂວງ.
(ຂ່າວ-ພາບ: ສຳນານ)
ຄໍາເຫັນ