 |
ພະຍາດໄຂ້ຍຸງລາຍມັກເກີດຂຶ້ນໃນຊຸມຊົນແອອັດຫຼາຍກວ່າ ແລະ ເກີດຍ້ອນເຊື້ອພະຍາດ ໂດຍແມ່ນຍຸງລາຍເປັນພາຫະນໍາເຊື້ອ, ຍຸງລາຍນີ້ ເປັນໂຕລາຍສີດໍາສະຫຼັບຂາວ ຢູ່ຕາມຕົນຕົວຂອງມັນ, ຖ້າຍຸງລາຍໄປກັດຄົນທີ່ມີເຊື້ອໄຂ້ຍຸງລາຍຈະຂະຫຍາຍຕົວຢູ່ໃນຍຸງ, ເມື່ອຍຸງໂຕນີ້ໄປກັດຄົນ ອື່ນໆທີ່ມີສຸຂະພາບແຂງແຮງ ກໍຈະສົ່ງເຊື້ອພະຍາດໄຂ້ຍຸງລາຍໃສ່ຄົນຕໍ່ໄປ. ສາເຫດຕົ້ນຕໍແມ່ນເກີດຈາກຍຸງລາຍທີ່ມີເຊື້ອມາກັດຕອດ, ຈຸດພິເສດຂອງຍຸງນີ້ມັກກັດຄົນໃນເວລາກາງເວັນເຊັ່ນ: ໃນເວລາໃກ້ຈະແຈ້ງ 6 ໂມງເຊົ້າ ແລະ ເວລາຄໍ່າມືດ 18:00 ໂມງແລງ. ຖ້າຄົນເຈັບເປັນໄຂ້ເລືອດອອກຢູ່ໃນບ້ານໃດໜຶ່ງ ແລະ ຍຸງລາຍນັ້ນໄປກັດເອົາຄົນອື່ນໆ ກໍພາໃຫ້ເກີດມີຄົນເຈັບໄຂ້ເລືອດອອກແຜ່ຂະຫຍາຍໄປໃນໜູ່ບ້ານ. ເນື່ອງຈາກຍຸງໂຕນັ້ນສາມາດບິນໄປໄດ້ 400 ແມັດ ຈຶ່ງພາໃຫ້ເກີດເປັນພະຍາດໄຂ້ ເລືອດອອກໃນໝູ່ບ້ານນັ້ນ ແລະ ຕິດຕໍ່ໄປໝູ່ບ້ານອື່ນໆ ອີກຕໍ່ໄປ, ຍ້ອນວ່າຍຸງລາຍມີຢູ່ທຸກບ່ອນໃນເມື່ອຄົນເຈັບເປັນໄຂ້ເລືອດອອກຢູ່ບອນໃດ, ຢູ່ບ່ອນນັ້ນມັກຈະເກີດມີການແຜ່ຂະຫຍາຍໄວຖ້າບໍ່ມີມາດຕະການໃນການຄວບຄຸມໃຫ້ດີ.
 |
ສະພາບພະຍາດໄຂ້ຍຸງລາຍທົ່ວປະເທດ ມາຮອດວັນທີ 24 ສິງຫາ 2026 ໃຫ້ຮູ້ວ່າ: ທົ່ວປະເທດມີຜູ້ຕິດເຊື້ອພະຍາດໄຂ້ຍຸງລາຍສະສົມ 4,371 ຄົນ, ຕິດເຊື້ອໃໝ່ 42 ຄົນ, ບໍ່ມີຜູ້ເສຍຊີວິດ. ແຂວງທີ່ມີຜູ້ຕິດເຊື້ອພະຍາດໄຂ້ຍຸງລາຍສະສົມຫຼາຍກວ່າໝູ່ແມ່ນນະຄອນຫຼວງວຽງຈັນ ສູງເຖິງ 706 ຄົນ, ແຂວງເຊກອງ 530 ຄົນ, ແຂວງອຸດົມໄຊ ແລະ ແຂວງວຽງຈັນ 459 ຄົນ, ແຂວງຄໍາມ່ວນ 424 ຄົນ ແລະ ແຂວງອື່ນໆຕາມລໍາດັບ. ຢ່າງໃດກໍຕາມຖ້າທ່ານ ຫຼື ຄົນໃນຄອບຄົວ ຮູ້ສຶກເປັນໄຂ້ ຫຼືບໍ່ສະບາຍບໍ່ຄວນຊື້ຢາມາກິນເອງ, ຄວນຮີບຮ້ອນໄປພົບແພດໝໍໃກ້ບ້ານທ່ານໂດຍດ່ວນ ເພື່ອຈະໄດ້ກິນຢາຕາມແພດໝໍສັ່ງ, ຖືກຕ້ອງ ແລະ ປິ່ນປົວທັນເວລາ.
(ຂໍ້ມູນ: ກະຊວງສາທາລະນະສຸກ)
ຄໍາເຫັນ