ຝ່າຍແຂວງຜົ້ງສາລີ ນຳໂດຍທ່ານ ວີສອນ ລາວເມົາ ຮອງເຈົ້າແຂວງຜົ້ງສາລີ ແລະ ຝ່າຍເມືອງຈຽງເຊິນ ນຳໂດຍທ່ານ ຫຼົງ ເຕີ ເຊິງ ເຈົ້າເມືອງຈຽງເຊີນ ພ້ອມດ້ວຍຄະນະຜູ້ແທນທັງສອງຝ່າຍເຂົ້າຮ່ວມ.
ໃນກອງປະຊຸມຄັ້ງນີ້, ທ່ານ ວີສອນ ລາວເມົາ ໄດ້ກ່າວສະແດງຄວາມຕ້ອນຮັບ ແລະ ຕີລາຄາສູງຕໍ່ການມາຢ້ຽມຢາມ ແລະ ເຮັດວຽກຂອງຄະນະຜູ້ແທນເມືອງຈຽງເຊິນໃນຄັ້ງນີ້ ຊຶ່ງໄດ້ນໍາເອົາຄວາມອົບອຸ່ນ, ຄວາມສາມັກຄີຮັກແພງ, ຄວາມເປັນຫ່ວງເປັນໄຍມາສູ່ການນໍາແຂວງຜົ້ງສາລີ, ທັງເປັນການເສີມຂະຫຍາຍມູນເຊື້ອການພົວພັນຮ່ວມມືອັນດີງາມຂອງສອງພັກ, ສອງລັດຖະບານ ລາວ-ຈີນ ເວົ້າລວມ, ເວົ້າສະເພາະແຂວງຜົ້ງສາລີ ແລະ ເມືອງຈຽງເຊີນ, ເປັນການຈັດຕັ້ງຜັນຂະຫຍາຍຍຸດທະສາດການຮ່ວມມືຮອບດ້ານ, ໝັ້ນຄົງຍາວນານ ຕາມທິດ 4 ດີ; ໜຶ່ງແລວທາງ ໜຶ່ງເສັ້ນທາງ ແລະ ຄູ່ຮ່ວມຊາຕາກໍາ ລາວ-ຈີນ; ຈີນ-ລາວ ເຂົ້າສູ່ລວງເລິກ. ຈາກນັ້ນ, ທັງສອງຝ່າຍກໍໄດ້ຜັດປ່ຽນກັນລາຍງານສະພາບຈຸດພິເສດທີ່ຕັ້ງ ແລະ ການພັດທະນາເສດຖະກິດ-ສັງຄົມ, ການຮ່ວມມືຮອບດ້ານ ໃນໄລຍະທີ່ຜ່ານມາຢ່າງກົງໄປກົງມາໃຫ້ກັນຊາບ, ຊຶ່ງສອງຝ່າຍເຫັນດີເປັນເອກະພາບຮ່ວມກັນ, ສືບຕໍ່ປົກປັກຮັກສາຄວາມສະເໝີພາບ, ຄວາມເປັນລະບຽບຮຽບຮ້ອຍລຽບຕາມຊາຍແດນສອງຝ່າຍ, ຊຸກຍູ້ ແລະ ປະກອບສ່ວນໃນການພັດທະນາເສດຖະກິດ-ສັງຄົມໃຫ້ມີບາດກ້າວຂະຫຍາຍຕົວເທື່ອລະກ້າວ ແລະ ສອງຝ່າຍໄດ້ເປັນເອກະພາບຕໍ່ທິດທາງແຜນການຮ່ວມມືເປັນຕົ້ນແມ່ນ: ສືບຕໍ່ເພີ່ມພູນສ້າງສາຍພົວພັນມິດຕະພາບ, ການຮ່ວມມືຮອບດ້ານ ໃຫ້ເປັນປົກກະຕິ ແລະ ນັບມື້ເຂົ້າສູ່ລ່ວງເລິກ; ສືບຕໍ່ໃນການເປັນໃຈກາງ, ເປັນຂົວຕໍ່ໃນການປະສານ, ປຸກລະດົມຊຸກຍູ້ບັນດານັກທຸລະກິດ, ຫົວໜ່ວຍທຸລະກິດຂອງ ສປ ຈີນ ທີ່ມີຄວາມສາມາດ ແລະ ເງື່ອນໄຂເຂົ້າມາສຳຫຼວດລົງທຶນ ຢູ່ແຂວງຜົ້ງສາລີ ໃຫ້ຫຼາຍຂຶ້ນ; ສອງຝ່າຍສືບຕໍ່ຊຸກຍູ້ພາກສ່ວນປະຈໍາດ່ານອໍານວຍຄວາມສະດວກການຜ່ານ ເຂົ້າ-ອອກ ຢູ່ດ່ານສາກົນ ລ່ານຕຸ້ຍ-ເມືອງຄໍາ ແລະ ພ້ອມກັນສະເໜີຂັ້ນເທິງພິຈາລະນາໃຫ້ພົນລະເມືອງປະເທດທີສາມ ສາມາດຜ່ານເຂົ້າ-ອອກໄດ້ໂດຍໄວ ເພື່ອເປັນເງື່ອນໄຂສ້າງໜ່ວຍງານວີຊ່າກັບດ່ານຢູ່ເບື້ອງລາວ ພ້ອມທັງອອກໃບຂັບຂີ່ຂ້າມປະເທດຊົ່ວຄາວ; ສອງຝ່າຍສືບຕໍ່ຮ່ວມກັນຕ້ານການເຄື່ອນໄຫວຜິດກົດໝາຍ ແລະ ອາດຊະຍາກຳຂ້າມຊາຍແດນ, ຊຸກຍູ້ສົ່ງເສີມວຽກງານສິ່ງແວດລ້ອມ, ວຽກງານການທ່ອງທ່ຽວ, ວຽກງານກູ້ໄພສຸກເສີນ ແລະ ອື່ນໆ.
(ພາບ-ຂ່າວ: ແສງຄຳ ສາລີວັນ)
ຄໍາເຫັນ