ຜູ້ແທນອົງຄະນະພັກເມືອງສາລະວັນ ເລືອກເອົາ ສະຫາຍ ຈັນສີລອນ ສີສົມບູນ ເປັນເລຂາຄະນະບໍລິຫານງານພັກເມືອງຊຸດໃໝ່.

ທີ່ເປັນຕົວແທນໃຫ້ແກ່ສະມາຊິກພັກໃນທົ່ວເມືອງ 3,050 ສະຫາຍ, ກອງປະຊຸມຄັ້ງນີ້, ໄດ້ໃຊ້ສິດປະຊາທິປະໄຕຂອງຕົນ ປ່ອນບັດເລືອກຕັ້ງເອົາຄະນະບໍລິຫານງານພັກເມືອງ ສະໄໝທີ X, ມີຜູ້ອອກຮັບສະໝັກເລືອກຕັ້ງ 32 ສະຫາຍ ຍິງ 5 ສະຫາຍ, ເລືອກເອົາ 27 ສະຫາຍ, ຍິງ 4 ສະຫາຍ. ທັງປ່ອນບັດຄັດເລືອກເອົາຜູ້ແທນສົມບູນໄປຮ່ວມກອງປະຊຸມໃຫຍ່ຜູ້ແທນອົງຄະນະພັກແຂວງສາລະວັນ ຄັ້ງທີ X ຈໍານວນ 23 ສະຫາຍ ຍິງ 4 ສະຫາຍ ແລະ ຜູ້ແທນສໍາຮອງ 5 ສະຫາຍ, ຍິງ 1 ສະຫາຍ. ຜ່ານການດຳເນີນກອງປະຊຸມຄັ້ງປະຖົມມະລຶກ ໄດ້ເປັນເອກະສັນຮັບຮອງເອົາຄະນະປະຈໍາພັກເມືອງ 9 ສະຫາຍ ຍິງ 1 ສະຫາຍ ໂດຍເຫັນດີເລືອກເອົາສະຫາຍ ຈັນສີລອນ ສີສົມບູນ ເປັນເລ ຂາຄະນະບໍລິຫານງານພັກເມືອງສາລະວັນ, ສະຫາຍ ບຸນສາ ຄ່ຽມມະນີຂັນໄຊ ແລະ ສະຫາຍ ກໍ່າສະໃໝ ແສນແທຫຼວງ ເປັນຮອງເລຂາພັກເມືອງ, ເລືອກເອົາ ສະຫາຍ ສົມບັດ ໄຕຍະລາດ ເປັນປະທານກວດກາພັກເມືອງ, ສະຫາຍ ແສງສະຫັວນ ອິນທະວົງສີ ແລະ ສະຫາຍ ນາງ ຫຼຽນທອງ ຈັນທະວົງ ເປັນຮອງປະທານກວດກາພັກເມືອງ.

ສະຫາຍ ຈັນສີລອນ ສີສົມບູນ ໄດ້ຕີລາຄາສູງວ່າ: ກອງປະຊຸມໃຫຍ່ຄັ້ງນີ້, ໄດ້ຄົ້ນຄວ້າຢ່າງເລິກເຊິ່ງ ແລະ ເປັນເອກະສັນກັນຮັບຮອງເອົາຮ່າງບົດລາຍງານການເມືອງ, ແຜນພັດທະນາເສດຖະກິດ-ສັງຄົມ ແລະ ທິດທາງຄາດໝາຍສູ້ຊົນໃນແຕ່ລະດ້ານກ່ຽວກັບວຽກງານກໍ່ສ້າງພັກ-ພະນັກງານ ແລະ ບົດສໍາຫຼວດການນໍາພາລວມຂອງຄະນະພັກຊຸດເກົ່າ. ໃນນັ້ນ, ໄດ້ຕີລາຄາດ້ານດີ ທົ່ວເມືອງສາລະວັນ ມີຄວາມສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບເປັນລະບຽບຮຽບຮ້ອຍໂດຍພື້ນຖານ, ບ້ານທົ່ວເມືອງໄດ້ຮັບນາມມະຍົດເປັນບ້ານປ້ອງກັນຊາດ-ເຂັ້ມແຂງ, ບ້ານເຮັດວຽກປ້ອງກັນຄວາມສະຫງົບດີ, ເສດຖະກິດສືບຕໍ່ຂະຫຍາຍຕົວໃນລະດັບ 6.87%, ລວມຍອດຜະລິດຕະພັນພາຍໃນ ບັນລຸໄດ້ 8,204 ຕື້ກວ່າກີບ, ລາຍຮັບສະເລ່ຍ 16 ລ້ານກີບ ຫຼື 776 ໂດລາສະຫະລັດ ຕໍ່ຄົນຕໍ່ປີ ການຈັດເກັບລາຍຮັບເຂົ້າງົບປະມານປະຕິບັດໄດ້ລື່ນຄາດໝາຍໃນແຕ່ລະປີ, ຄຸ້ມຄອງລາຍຈ່າຍ ໃຫ້ສອດຄ່ອງກັບວິໄນການເງິນຢ່າງເຂັ້ມງວດ, ການລົງທຶນກໍເພີ່ມຂຶ້ນ, ບ້ານ ແລະ ຄອບຄົວທຸກຍາກກໍໄດ້ຮັບການແກ້ໄຂຫຼຸດລົງເທື່ອລະກ້າວ, ການປັບປຸງ-ກໍ່ສ້າງພັກ ຮາກຖານພັກທົ່ວເມືອງໄດ້ຮັບນາມມະຍົດເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນຫຼາຍປີຕໍ່ເນື່ອງ, ການຂະຫຍາຍພັກເພີ່ມຂຶ້ນທາງດ້ານປະລິມານ ແລະ ຄຸນນະພາບ ວຽກງານບູລະນະກົງຈັກລັດ ແລະ ອົງການປົກຄອງ ກໍມີຄວາມໜັກແໜ້ນເຂັ້ມແຂງ, ແນວລາວສ້າງຊາດ ແລະ ອົງການຈັດຕັ້ງມະຫາຊົນ ກໍໄດ້ອອກແຮງເສີມຂະຫຍາຍມູນເຊື້ອຂອງພັກຂອງຊາດ ເຂົ້າໃນຂະບວນການຕ່າງໆ ຂອງມະຫາຊົນໄດ້ເປັນຢ່າງດີ, ແນວທາງການຕ່າງປະເທດ ທີ່ພັກວາງອອກໄດ້ປະຕິບັດຢ່າງຖືກຕ້ອງ, ຮອບດ້ານເຮັດໃຫ້ແນວທາງນະໂຍບາຍຂອງພັກ ແລະ ມະຕິກອງປະຊຸມໃຫຍ່ ຄັ້ງທີ X ຂອງອົງຄະນະພັກເມືອງໄດ້ຮັບການຈັດຕັ້ງປະຕິບັດໃຫ້ບັນລຸຜົນຕາມລະດັບຄາດໝາຍ.

ກອງປະຊຸມຄັ້ງນີ້, ໃຫ້ກຽດເຂົ້າຮ່ວມຂອງ ສະຫາຍ ດາວວົງ ພອນແກ້ວ ກໍາມະການສູນກາງພັກ ເລຂາຄະນະບໍລິຫານງານພັກແຂວງ ເຈົ້າແຂວງສາລະວັນ.

(ພາບ-ຂ່າວ: ທິດລານີ ໂຄດໂຍທາ)