ປກສ ບໍລິຄຳໄຊ ເອົາໃຈໃສ່ກະກຽມກອງປະຊຸມໃຫຍ່ 3 ຂັ້ນຂອງພັກ

ທ່ານ ພັນເອກ ກົງຈັນ ໄຊປັນຍາ ຫົວໜ້າກອງບັນຊາການປ້ອງກັນຄວາມສະຫງົບ (ປກສ) ແຂວງບໍລິຄຳໄຊ ໄດ້ໃຫ້ສຳພາດຕໍ່ນັກຂ່າວໜັງສືພິມປະຊາຊົນໃນວັນທີ 4 ມີນາຜ່ານມາ ທີ່ກອງບັນຊາການດັ່ງກ່າວ ກ່ຽວກັບການກະກຽມເປີດກອງປະຊຸມ 3 ຂັ້ນຂອງພັກຊຶ່ງຈະເປີດຂຶ້ນໃນມໍ່ໆນີ້.
ທ່ານ ພັນເອກ ກົງຈັນ ໄຊປັນຍາ ກ່າວວ່າ: ອີງໃສ່ຄຳສັ່ງວ່າດ້ວຍການກະກຽມ ແລະ ດຳເນີນກອງປະຊຸມໃຫຍ່ 3 ຂັ້ນຂອງຄະນະເລຂາທິການສູນກາງພັກ. ພາຍຫຼັງໄດ້ຮັບທິດຊີ້ນໍາ, ຄະນະພັກ, ຄະນະບັນຊາໄດ້ກະກຽມໂດຍການອອກແຈ້ງການໃຫ້ການຈັດຕັ້ງພາຍໃນກົມກອງ, ແຕ່ງຕັ້ງອະນຸກຳມະການຕ່າງໆເພື່ອຮອງຮັບ, ເຄື່ອນໄຫວ, ຊຸກຍູ້ໃຫ້ບັນດາການຈັດຕັ້ງຂອງພັກແຕ່ລະຂັ້ນ, ກະກຽມບຸກຄະລາກອນ, ເນື້ອໃນ, ອະນຸກຳມະການເສດຖະກິດ ແລະ ອະນຸກຳມະການດ້ານຕ່າງໆ. ມາເຖິງປັດຈຸບັນກອງບັນຊາການ ປກສ ແຂວງຢູ່ໃນໄລຍະດຳເນີນກອງປະຊຸມໜ່ວຍພັກຕ່າງໆທີ່ຂຶ້ນກັບກອງບັນຊາການເກືອບສຳເລັດໝົດທຸກໜ່ວຍ.
 ຈາກນັ້ນ, ໄດ້ກະກຽມໃສ່ກອງປະຊຸມໃຫຍ່ຄະນະພັກຮາກຖານຕິດພັນກັບການກະກຽມພວກເຮົາໄດ້ປັບປຸງກົງຈັກການຈັດຕັ້ງເພື່ອສ້າງຄວາມພ້ອມໃຫ້ບຸກຄະລາກອນ. ມາເຖິງປັດຈຸບັນກົງຈັກຂອງພັກ ກໍຄືກົງຈັກຂອງລັດທີ່ຂຶ້ນກັບກອງບັນຊາການໄດ້ປັບປຸງສຳເລັດປະມານ 90% ເພື່ອເປັນການກະກຽມໃສ່ກອງປະຊຸມໃຫຍ່ 3 ຂັ້ນຂອງພັກທີ່ຈະມາເຖິງ.
ຂ່າວ: ພູວັນ, ພາບ: ແສງຈັນ