ຂ້າພະເຈົ້າ ມີຄວາມເສົ້າສະຫຼົດໃຈ ແລະ ອາໄລອາວອນຢ່າງສຸດຊຶ້ງ ເມື່ອໄດ້ຮັບຂ່າວວ່າ: ສະຫາຍ ພົນຈັດຕະວາ ຮວີ່ງດັກເຮືອງ ອະດີດຫົວໜ້າ ຄະນະປະສານງານທົ່ວປະເທດ ທະຫານອາສາສະໝັກ ແລະ ຊ່ຽວຊານຫວຽດນາມ ທີ່ເຄີຍມາປະຕິບັດໜ້າທີ່ສາກົນຊ່ວຍເຫຼືອລາວ ໄດ້ເຖິງແກ່ມໍລະນະກໍາ ໃນວັນທີ 11 ມິຖຸນາ 2025 ຜ່ານມາ.
ສະຫາຍ ພົນຈັດຕະວາ ຮວີ່ງດັກເຮືອງ ໄດ້ອຸທິດເຫື່ອແຮງ, ສະຕິປັນຍາຂອງຕົນ ຢ່າງບໍ່ຮູ້ອິດເມື່ອຍເຂົ້າໃນການເຄື່ອນໄຫວພາລະກິດການປະຕິວັດຂອງຫວຽດນາມ. ພ້ອມດຽວກັນ, ສະຫາຍຍັງໄດ້ປະກອບສ່ວນສໍາຄັນເຂົ້າໃນພາລະກິດການປະຕິວັດຢູ່ລາວ ຊຶ່ງສະຫາຍໄດ້ຮັບມອບໝາຍໃຫ້ເປັນທີ່ປຶກສາຂອງ ປະທານ ໄກສອນ ພົມວິຫານ, ປະທານ ຄໍາໄຕ ສີພັນດອນ ແລະ ມີຄວາມໃກ້ຊິດຕິດແທດກັບ ພັກ, ລັດ ແລະ ປະຊາຊົນລາວ, ໃນຕະຫຼອດຊີວິດການເຄື່ອນໄຫວຂອງ ສະຫາຍ ແມ່ນໄດ້ອຸທິດແກ່ການເພີ່ມພູນຄູນສ້າງ ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລາວ-ຫວຽດນາມ ໃຫ້ນັບມື້ພັດທະນາຍິ່ງໆຂຶ້ນ.
ການຈາກໄປຂອງ ສະຫາຍ ພົນຈັດຕະວາ ຮວີ່ງດັກເຮືອງ ບໍ່ພຽງແຕ່ເປັນການສູນເສຍນັກປະຕິວັດທີ່ກ້າແກ່ນຂອງພັກ, ລັດ ແລະ ປະຊາຊົນຫວຽດນາມອ້າຍນ້ອງ, ແຕ່ຍັງເປັນການສູນເສຍເພື່ອນຜູ້ສະໜິດສະໜົມ, ໃກ້ຊິດຕິດແທດທີ່ສຸດຂອງ ພັກ, ລັດ ແລະ ປະຊາຊົນລາວບັນດາເຜົ່າ ຂອງພວກຂ້າພະເຈົ້າອີກດ້ວຍ. ໃນເວລາອັນໂສກເສົ້າເສຍດາຍນີ້, ຕາງໜ້າ ຄະນະບໍລິຫານງານສູນກາງພັກປະຊາຊົນ ປະຕິວັດລາວ ແລະ ໃນນາມສ່ວນຕົວ, ຂ້າພະເຈົ້າ ຂໍສະແດງຄວາມໂສກເສົ້າເສຍດາຍ, ອາໄລອາວອນ ແລະ ຂໍແບ່ງປັນຄວາມທຸກໂສກມາຍັງ ພັກ, ລັດ ແລະ ປະຊາຊົນຫວຽດນາມ ພ້ອມດ້ວຍຄອບຄົວ ສະຫາຍ ພົນຈັດຕະວາ ຮວິ່ງດັກເຮືອງ ມານະໂອກາດນີ້ດ້ວຍ.
ຄໍາເຫັນ