ພະບາດສົມເດັດ ພຣະປໍຣະມາພິໄທ ມະຫາວະຊິຣາລົງກອນ ພຣະວະຊິຣະເກົ້າເຈົ້າຢູ່ຫົວ ແຫ່ງ ຣາຊະອານາຈັກໄທ ໄດ້ສົ່ງສານອວຍພອນເຖິງ ພະນະທ່ານ ທອງລຸນ ສີສຸລິດ ປະທານປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ທີ່ນະຄອນຫຼວງວຽງຈັນ ຊຶ່ງມີເນື້ອໃນວ່າ: ໃນໂອກາດວັນສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ ຂ້າພະເຈົ້າ ຂໍສະແດງຄວາມຍິນດີ ແລະ ຂໍອວຍພອນໄຊມາຍັງ ພະນະທ່ານປະທານປະເທດ ຈົ່ງມີພະລານາໄມສົມບູນແຂງແຮງ ແລະ ມີຄວາມຜາສຸກ ພ້ອມທັງອວຍພອນໃຫ້ປະເທດຊາດ ແລະ ປະຊາຊົນລາວ ຈົ່ງຢູ່ເຢັນເປັນສຸກ ແລະ ຈະເລີນຮຸ່ງເຮື່ອງຍິ່ງໆຂຶ້ນໄປ.
ປະເທດໄທ ແລະ ສາທາລະນະລັດ ປະຊາທິປະໄຕ ປະຊາຊົນລາວ ໃນຖານະເປັນເພື່ອນບ້ານທີ່ເປັນມິດ, ມີສາຍພົວພັນອັນແໜ້ນແຟ້ນ ບົນພື້ນຖານມິດຕະພາບ, ຄວາມເຂົ້າໃຈອັນດີ, ມີວັດທະນະທໍາຮີດຄອງປະເພນີທີ່ສືບທອດຮ່ວມກັນມາ ແລະ ເປັນທີ່ປິຕິຍິນດີເປັນຢ່າງຍິ່ງທີ່ປະເທດໄທ ແລະ ສາ ທາລະນະລັດ ປະຊາທິປະໄຕ ປະຊາຊົນລາວ ໄດ້ຮ່ວມກັນສະເຫຼີມສະຫຼອງວັນສ້າງຕັ້ງສາຍພົວພັນການທູດຄົບຮອບ 75 ປີ. ພ້ອມກັບການເປີດນໍາໃຊ້ຂົວມິດຕະພາບ ໄທ-ລາວ ແຫ່ງທີ 5 ທີ່ຈະມີຂຶ້ນໃນເດືອນທັນວາປີນີ້ ຊຶ່ງສະແດງໃຫ້ເຫັນຢ່າງຈະແຈ້ງເຖິງສາຍພົວພັນມິດຕະພາບອັນໃກ້ຊິດ ທີ່ມີມາແຕ່ດົນນານ ບົນພື້ນຖານການເຄົາລົບ, ຍ້ອງຍໍ ແລະ ເອົາໃຈໃສ່ຮ່ວມກັນໃນການສ້າງຜົນປະໂຫຍດໃຫ້ແກ່ປະເທດ ແລະ ປະຊາຊົນທັງສອງຝ່າຍ ຜ່ານການພັດທະນາການຮ່ວມມື ແລະ ການເປັນຄູ່ຮ່ວມມືຍຸດທະສາດໃນດ້ານຕ່າງໆ ທັງໃນຂອບສອງຝ່າຍ ແລະ ໃນອາຊຽນຢ່າງເຂັ້ມແຂງ.
ຂ້າພະເຈົ້າເຊື່ອໝັ້ນວ່າສາຍພົວພັນອັນອົບອຸ່ນນີ້ ຈະສືບຕໍ່ພັດທະນາຢ່າງບໍ່ຢຸດຢັ້ງ ແລະ ເປັນຮາກຖານສຳຄັນໃນການສົ່ງເສີມຄວາມກ້າວໜ້າໃນດ້ານການຄ້າ, ການລົງທຶນ, ການທ່ອງທ່ຽວ, ພະລັງງານ, ການພັດທະນາພື້ນຖານໂຄງລ່າງຄົມມະນາຄົມ ແລະ ວັດທະນະທຳ, ຊຶ່ງການພັດທະນາໃນດ້ານຕ່າງໆນີ້ບໍ່ພຽງແຕ່ຈະສ້າງຜົນປະໂຫຍດໃຫ້ທັງສອງປະເທດ ແລະ ປະຊາຊົນເທົ່ານັ້ນ, ຫາກຍັງຈະປະ ກອບສ່ວນເຂົ້າໃນຄວາມໝັ້ນຄົງ ແລະ ຄວາມຈະເລີນຮຸ່ງເຮືອງ ຂອງພາກພື້ນຂອງພວກເຮົາອີກດ້ວຍ.
ຄໍາເຫັນ