ສະຫາຍ ຟ້າມ ມິງ ຈິງ ນາຍົກລັດຖະມົນຕີ ແຫ່ງ ສສ ຫວຽດນາມ; ສະຫາຍ ເຈິ່ນ ແທັງ ເມີ້ນ ປະທານສະພາແຫ່ງຊາດ ແຫ່ງ ສສ ຫວຽດນາມ ໄດ້ສົ່ງສານສະແດງຄວາມເຫັນໃຈເຖິງ: ສະຫາຍ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນ ປະຕິວັດລາວ ປະທານປະເທດ ແຫ່ງ ສປປ ລາວ; ສະຫາຍ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ; ສະຫາຍ ໄຊສົມພອນ ພົມວິຫານ ປະທານສະພາແຫ່ງຊາດ ແຫ່ງ ສປປ ລາວ ທີ່ ນະຄອນຫຼວງວຽງຈັນ ຊຶ່ງມີເນື້ອໃນວ່າ: ພວກຂ້າພະເຈົ້າ ມີຄວາມເປັນຫ່ວງເປັນໃຍຢ່າງຍິ່ງ ເມືອໄດ້ຮັບຂ່າວຝົນຕົກໜັກແກ່ຍາວ ຢູ່ 14/18 ແຂວງ, ນະຄອນ ຂອງ ສປປ ລາວ ໃນໄລຍະທີ່ຜ່ານມາ ໂດຍສະເພາະເຮັດໃຫ້ນໍ້າຖ້ວມ, ດິນເຊາະເຈື່ອນຢ່າງໜັກໜ່ວງ ແລະ ສ້າງຄວາມເສຍຫາຍແກ່ຊິວິດ ແລະ ຊັບສິນຂອງປະຊາຊົນ ຢູ່ແຂວງຫຼວງນໍ້າທາ, ໄຊສົມບູນ, ບໍລິຄຳໄຊ, ຄຳມ່ວນ, ຈຳປາສັກ ແລະ ນະຄອນ ຫຼວງວຽງຈັນ.
ຕາງໜ້າພັກ, ລັດ, ລັດຖະບານ, ສະພາແຫ່ງຊາດ ແລະ ປະຊາຊົນ ແຫ່ງ ສສ. ຫວຽດນາມ, ພວກຂ້າພະເຈົ້າ ຂໍສົ່ງຄວາມເຫັນອົກເຫັນໃຈຢ່າງສຸດຊຶ້ງມາຍັງບັນດາສະຫາຍ ແລະ ຜ່ານສະຫາຍໄປຍັງປະຊາ ຊົນລາວອ້າຍນ້ອງ ໂດຍສະເພາະອຳນາດການປົກຄອງທ້ອງຖິ່ນ ແລະ ຄອບຄົວຜູ້ທີ່ໄດ້ຮັບເຄາະຮ້າຍຈາກຜົນກະທົບຄັ້ງນີ້; ພວກຂ້າພະເຈົ້າ ມີຄວາມເຊື່ອໝັ້ນຢ່າງຍິ່ງວ່າ ພາຍໃຕ້ການຊີ້ນຳ-ນຳພາ ແລະ ການເອົາໃຈໃສ່ຢ່າງໃກ້ຊິດຂອງພັກ, ລັດ, ລັດຖະບານ, ສະພາແຫ່ງຊາດ ແລະ ບັນດາສະຫາຍ, ປະຊາຊົນລາວອ້າຍນ້ອງ ຈະສາມາດຜ່ານຜ່າຄວາມຫຍຸ້ງຍາກຄັ້ງນີ້ ເພື່ອຟື້ນຟູ ແລະ ເຮັດໃຫ້ຊີວິດການເປັນຢູ່ຂອງປະຊາ ຊົນຢູ່ເຂດໄດ້ຮັບຜົນກະທົບດັ່ງກ່າວ ກັບຄືນສູ່ສະພາບປົກກະຕິໂດຍໄວ.
ພັກ, ລັດ, ລັດຖະບານ, ສະພາແຫ່ງຊາດ ແລະ ປະຊາຊົນຫວຽດນາມ ຍາມໃດກໍຢູ່ຄຽງຂ້າງກັບປະຊາຊົນລາວອ້າຍນ້ອງ ໃນສະພາບຄວາມຫຍຸ້ງຍາກຄືປັດຈຸບັນ.
ໃນຂະນະດຽວກັນ, ສະຫາຍ ບຸຍ ແທັງ ເຊິນ ຮອງນາຍົກລັດຖະມົນຕີ ລັດຖະມົນຕີກະຊວງການຕ່າງປະເທດ ແຫ່ງ ສສ ຫວຽດນາມ ກໍໄດ້ສົ່ງສານສະແດງຄວາມເຫັນໃຈເຖິງ ສະຫາຍ ສະເຫຼີມໄຊ ກົມມະສິດ ຮອງນາຍົກລັດຖະມົນຕີ ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ເຊັ່ນດຽວກັນ.
ຄໍາເຫັນ