ສະຫາຍ ບຸຍ ແທັງ ເຊີນຮອງນາຍົກລັດຖະມົນຕີລັດຖະມົນຕີກະຊວງການຕ່າງປະເທດແຫ່ງ ສາທາລະນະລັດ ສັງຄົມນິຍົມຫວຽດນາມໄດ້ສົ່ງສານສະແດງຄວາມຊົມເຊີຍເຖິງ: ສະຫາຍ ທອງສະຫວັນ ພົມວິຫານລັດຖະມົນຕີ ກະຊວງການຕ່າງປະເທດແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ
ທີ່ນະຄອນຫຼວງວຽງຈັນ ຊຶ່ງມີເນື້ອໃນວ່າ: ສະຫາຍ ທອງສະຫວັນ ພົມວິຫານ ທີ່ຮັກແພງ, ຂ້າພະເຈົ້າ ສຸດທີ່ດີໃຈທີ່ໄດ້ຊາບຂ່າວວ່າ ສະຫາຍໄດ້ຮັບການແຕ່ງຕັ້ງເປັນລັດຖະມົນຕີ ກະຊວງການຕ່າງປະເທດ ໃນກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ IX ໃນວັນທີ 18 ພະຈິກ 2024. ການທີ່ສະຫາຍຖືກແຕ່ງຕັ້ງໃຫ້ດຳລົງຕຳແໜ່ງອັນສຳຄັນນີ້ ສະແດງໃຫ້ເຫັນເຖິງ ຄວາມໄວ້ເນື້ອເຊື່ອໃຈ ແລະ ຕີລາຄາສູງຂອງພັກ ແລະ ລັດຖະບານ ແຫ່ງ ສປປ ລາວ ຕໍ່ກັບການປະກອບສ່ວນຂອງສະຫາຍໃນໄລຍະທີ່ຜ່ານມາ, ໂດຍສະເພາະແມ່ນ ໃນຖານະເປັນຫົວໜ້າຄະນະພົວພັນຕ່າງປະເທດສູນກາງພັກປະຊາຊົນປະຕິວັດລາວ. ຕາງໜ້າໃຫ້ກະຊວງການຕ່າງປະເທດ ແຫ່ງ ສາທາລະນະລັດ ສັງຄົມນິຍົມ ຫວຽດນາມ, ຂ້າພະເຈົ້າ ຂໍສົ່ງຄຳຊົມເຊີຍຢ່າງຈິງໃຈ ແລະ ອົບອຸ່ນ ມາຍັງສະຫາຍ.
ຂ້າພະເຈົ້າ ເຊື່ອໝັ້ນວ່າ ດ້ວຍຄວາມຮູ້, ຄວາມສາມາດ ແລະ ປະສົບການອັນກວ້າງຂວາງໃນດ້ານການຕ່າງປະເທດ, ສະຫາຍ ຈະສືບຕໍ່ນຳພາກະຊວງການຕ່າງປະເທດລາວ ບັນລຸໄດ້ບັນດາຜົນງານອັນໃໝ່, ປະຕິບັດສຳເລັດໜ້າທີ່ທີ່ພັກ ແລະ ລັດຖະບານ ແຫ່ງ ສປປ ລາວ ມອບໝາຍໃຫ້, ຕັ້ງໜ້າຜັນຂະຫຍາຍນະໂຍບາຍການຕ່າງປະເທດສັນຕິພາບ, ເອກະລາດ, ມິດຕະພາບ, ການຮ່ວມມືເພື່ອການພັດທະນາ, ຍົກສູງຖານະ ແລະ ບົດບາດຂອງ ສປປ ລາວ ໃນເວທີພາກພື້ນ ແລະ ໃນໂລກ.
ດ້ວຍຄວາມຮັກແພງສະໜິດສະໜົມ ແລະ ໃກ້ຊິດຕິດແທດກັບປະເທດ ແລະ ປະຊາຊົນຫວຽດນາມ, ຂ້າພະເຈົ້າ ຫວັງວ່າ ສະຫາຍ ຈະສືບຕໍ່ເອົາໃຈໃສ່ຊຸກຍູ້ການພົວພັນຮ່ວມມືລະຫວ່າງ ສອງກະຊວງການຕ່າງປະເທດ ກໍຄື ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງປະເທດ ລາວ-ຫວຽດນາມ ໃຫ້ນັບມື້ນັບມີຄວາມແໜ້ນແຟ້ນ ແລະ ມີປະສິດທິຜົນ.
ຂ້າພະເຈົ້າ ຂໍສະແດງຄວາມປິຕິຊົມເຊີຍ ແລະ ສົ່ງຄໍາອວຍພອນໄຊອັນປະເສີດມາຍັງສະຫາຍ. ຫວັງຢ່າງຍິ່ງວ່າ ຈະໄດ້ພົບປະກັບສະຫາຍອີກຄັ້ງໜຶ່ງ ໃນໂອກາດເຂົ້າຮ່ວມກອງປະຊຸມປຶກສາຫາລືດ້ານການເມືອງຂັ້ນລັດຖະມົນຕີກະຊວງການຕ່າງປະເທດ ຫວຽດນາມ-ລາວ ຄັ້ງທີ 9 ໃນເດືອນທັນວາ 2024 ທີ່ ສປປ ລາວ.
ຄໍາເຫັນ