ສສຊ ແຂວງຫຼວງນໍ້າທາ ປະກອບຄໍາເຫັນຕໍ່ຮ່າງກົດໝາຍວ່າດ້ວຍລັດຖະບານ

ທ່ານນາງປານິດາເຮືອງແພງອ່ອນໄດ້ສະແດງຄວາມເປັນເອກະພາບສູງຕໍ່ຄະນະຄົ້ນຄວ້າປັບປຸງຮ່າງກົດໝາຍວ່າດ້ວຍລັດຖະບານສະບັບປັບປຸງ. ຊຶ່ງຮ່າງກົດໝາຍສະບັບນີ້ມີຄວາມຈະແຈ້ງແລະສອດຄ່ອງກັບພາລະບົດບາດການບໍລິຫານລັດ. ຂ້າພະເຈົ້າຂໍສະເໜີແລກປ່ຽນຄໍາເຫັນໃນບາງມາດຕາເພື່ອເຮັດໃຫ້ກົດໝາຍມີຄວາມສົມບູນ, ຈະແຈ້ງແລະຮັດກຸມຍິ່ງຂຶ້ນ. ໃນມາດຕາ 5 ຂໍ້ທີ 9,10,11 ແລະມາດຕາ 6 ຂໍ້5 ແລະຂໍ້6 ສິດຂອງລັດຖະບານຕ່າງກັບສິດຂອງນາຍົກລັດຖະມົນຕີໃນມາດຕາ 5 ກໍານົດວ່າລັດຖະບານເປັນຜູ້ຕົກລົງສ້າງຕັ້ງໂຮມເຂົ້າຫຼືຍຸບເລີກກະຊວງ,ອົງການລັດຂຶ້ນກັບລັດຖະບານອົງການລັດທຽບເທົ່າທະບວງ, ກົມ, ອົງການລັດທຽບເທົ່າກົມເຂດເສດຖະກິດ; ແຕ່ໃນມາດຕາ 6 ກໍານົດໃຫ້ນາຍົກລັດຖະມົນຕີມີສິດອອກດໍາລັດຄໍາສັ່ງຂໍ້ຕົກລົງຫຼືແຕ່ງຕັ້ງປົດຕໍາແໜ່ງໃນສອງມາດຕາດັ່ງກ່າວເຫັນວ່າຄວນກຳນົດສິດແລະບົດບາດໃຫ້ຈະແຈ້ງກວ່າເກົ່າ. ການຕົກລົງຂອງລັດຖະບານແມ່ນຕ້ອງຜ່ານກອງປະຊຸມລັດຖະບານແລ້ວມອບໃຫ້ນາຍົກລັດຖະມົນຕີເປັນຜູ້ລົງນາມອອກນິຕິກໍາໃນນາມລັດຖະບານເພື່ອບໍ່ໃຫ້ເກີດຄວາມສັບສົນລະຫວ່າງສິດຂອງໝູ່ຄະນະແລະສິດຂອງບຸກຄົນ; ມາດຕາ 5 ຂໍ້ 14,15,16 ແລະມາດຕາ 6 ຂໍ້ 12,13,14 ເວົ້າເຖິງວຽກງານສັນຊາດ, ລູກລ້ຽງພົນລະເມືອງ,ກິດຕິມະສັກໃນມາດຕາ 5 ບັນຍັດວ່າລັດຖະບານເປັນຜູ້ຕົກລົງແຕ່ມາດຕາ 6 ບັນຍັດວ່ານາຍົກລັດຖະມົນຕີເປັນຜູ້ອອກຂໍ້ຕົກລົງໃນສາມຂໍ້ດັ່ງກ່າວນີ້ສະເໜີຄວນປັບສຳນວນໃນມາດຕາ 5 ໃຫ້ຮັດກຸມກວ່າເກົ່າແລະຕົກລົງເຫັນດີເພື່ອໃຫ້ນາຍົກລັດຖະມົນຕີອອກຂໍ້ຕົກລົງຕາມການຕົກລົງເຫັນດີຂອງລັດຖະບານເພື່ອບໍ່ໃຫ້ເກີດຊ່ອງຫວ່າງແລະຂັ້ນຕອນທາງດ້ານກົດໝາຍໃຫ້ມີຄວາມຈະແຈ້ງສອດຄ່ອງກັນ. ມາດຕາ 19 ຂໍ້9,10 ກໍານົດວ່າລັດຖະມົນນຕີມີສິດກ່ຽວກັບຄຳເຫັນຕໍ່ການສະເໜີຂອງປະທານຄະນະກຳມະການປົກຄອງແຂວງໃນການແຕ່ງຕັ້ງຫຼືໂຍກຍ້າຍຫົວໜ້າ,ຮອງຫົວໜ້າພະແນກຂັ້ນແຂວງ. ຜ່ານມາເຫັນວ່າມີບາງກໍລະນີທີ່ກະຊວງ,ອົງການຫຼືວ່າໃຫ້ຄໍາຕອບຂ້ອນຂ້າງຊັກຊ້າແລະແກ່ຍາວເຮັດໃຫ້ເສຍໂອກາດໃນການບໍລິຫານວຽກງານສະເໜີຄວນກໍານົດເພີ່ມການມີຄໍາເຫັນເປັນລາຍລັກອັກສອນໃຫ້ຈະແຈ້ງອອກພາຍໃນ 30 ວັນທາງລັດຖະການແລະໃນຂໍ້ທີ 9 ສະເໜີເພີ່ມຄໍາວ່ານະຄອນຫຼວງຢູ່ຫຼັງຄໍາວ່າຄະນະປະຈໍາສະພາປະຊາຊົນເພາະຮ່າງກົດໝາຍແມ່ນຂຽນໃສ່ແຕ່ວ່າແຕ່ຂັ້ນແຂວງແລະໃນມາດຕາ 6 ຂໍ້ 21; ມາດຕາ 7; ມາດຕາ 13 ຂໍ້ 8 ມາດຕາ 14, ໃນນີ້ມາດຕາ 19 ຂໍ້ 14 ມາດຕາ 20 ການລາອອກຈາກຕໍາແໜ່ງໄດ້ບັນຍັດໄວ້ວ່າເມື່ອເຫັນວ່າຕົນບໍ່ສາມາດປະຕິບັດໜ້າທີ່ໄດ້ຍ້ອນເຫດຜົນທາງດ້ານສຸຂະພາບຫຼືດ້ວຍເຫດຜົນອື່ນຊຶ່ງຄໍາວ່າດ້ວຍເຫດຜົນອື່ນເບິ່ງຄືວ່າເປັນຄວາມໝາຍທີ່ກ້ວາງຫຼາຍ.ສະນັ້ນຂໍເພີ່ມຄໍາວ່າດ້ວຍເຫດຜົນຄວາມຈໍາເປັນອື່ນທີ່ໄດ້ຮັບການອະນຸມັດເຫັນດີຈາກອົງການທີ່ແຕ່ງຕັ້ງ; ມາດຕາ 23 ກອງປະຊຸມລັດຖະບານກໍານົດວ່າກອງປະຊຸມວິສາມັນເປີດຂຶ້ນຕາມການສະເໜີຂອງສະມາຊິກລັດຖະບານຢ່າງໜ້ອຍ 1ສ່ວນ3 ຂອງຈໍານວນສະມາຊິກທັງໝົດແຕ່ໃນວັກທີ 6 ກໍານົດການລົງມະຕິໃຫ້ຖືເອົາສຽງສ່ວນຫຼາຍເຫັນວ່າທາງດ້ານອົງປະກອບຂອງກອງປະຊຸມຍັງບໍ່ທັນຄົບຖ້ວນເພື່ອໃຫ້ກອງປະຊຸມມີຄວາມສົມບູນຕາມກົດໝາຍສະເໜີເພີ່ມຂໍ້ຄວາມຢ່າງໜ້ອຍ 1 ສ່ວນ 3 ຂອງຈໍານວນສະມາຊິກທັງໝົດແລະກອງປະຊຸມລັດຖະບານຈະດໍາເນີນໄດ້ກໍຕໍ່ເມື່ອມີສະມາຊິກລັດຖະບານເຂົ້າຮ່ວມຢ່າງໜ້ອຍ 2 ສ່ວນ 3 ຂອງຈໍານວນສະມາຊິກທັງໝົດ. ຂ່າວ-ພາບ: ຍຸພິນທອງ-ບຸນອູ້ມ