ສສຊປະກອບຄໍາເຫັນຕໍ່ກົດໝາຍວ່າດ້ວຍການຈະລາຈອນທາງບົກ

ທ່ານນາງໄຮມະນີວົງໜໍ່ແກ້ວສສຊເຂດເລືອກຕັ້ງທີ 16 ແຂວງເຊກອງໄດ້ສະແດງຄວາມຊົມເຊີຍຕໍ່ຄະນະຮັບຜິດຊອບກະກຽມຮ່າງກົດໝາຍດັ່ງກ່າວຂ້າພະເຈົ້າຂໍມີຄໍາເຫັນແລກປ່ຽນບາງຈຸດຢູ່ໃນມາດຕາ 72 ຂໍ້ທີ 3 ຄ່າປັບໄໝບໍ່ຄວນໃຫ້ເປັນລາຍຮັບໂດຍກົງຂອງກອງທຶນເພື່ອຫຼີກລ່ຽງຜົນປະໂຫຍດຄັດກັນຄວນໃຫ້ເຂົ້າງົບປະມານແຫ່ງລັດຈາກນັ້ນລັດຕ້ອງຈັດສັນໃຫ້ກອງທຶນຄືນເປັນເປີເຊັນແລະໃນມາດຕາ73 ສະເໜີໜ່ວຍງານໃດເປັນເຈົ້າພາບຫຼັກໃນການຄຸ້ມຄອງການນໍາໃຊ້ກອງທຶນເພື່ອຮັບປະກັນຄວາມໂປ່ງໃສແລະກວດສອບໄດ້ງ່າຍຄວນໃຫ້ຈະແຈ້ງຊັດເຈນ,ມາດຕາ 16 ຊຶ່ງເປັນມາດຕາໃໝ່ມີຫົວຂໍ້ວ່າ: ລະບຽບການຢຸດແລະຈອດຊົ່ວຄາວຂອງຍານພາຫະນະທາງບົກຕາມເສັ້ນທາງຫຼວງແລະຜູ້ຂັບຂີ່ຍານພາຫະນະທາງບົກສາມາດຈອດຊົ່ວຄາວບໍ່ເກີນ 5 ນາທີຢູ່ບ່ອນທີ່ອະນຸຍາດໃນຈຸດນີ້ຄິດວ່າ 5 ນາທີອາດຈະເປັນເວລາທີ່ໄວຫຼາຍ; ໃນມາດຕາ 2 ຄວນເພີ່ມຄໍາວ່າສັດແລະສະຖານທີ່ສາທາລະນະເພື່ອຄວບຄຸມການຈູງສັດແລະການສັນຈອນຢູ່ບ່ອນຈອດລົດເດີ່ນສາທະລະນະສະເໜີສັບຊ້ອນເນື້ອໃນຄືແນວນີ້ການຈະລາຈອນທາງບົກແມ່ນການສັນຈອນໄປມາຂອງຄົນ, ສັດ, ຍານພາຫະນະທຸກປະເພດຕາມທາງຫຼວງແລະສະຖານທີ່ອື່ນໆທີ່ໃຊ້ສໍາລັບການສັນຈອນທາງບົກ.

ທ່ານສໍານານສົນທະນີສສຊ ເຂດເລືອກຕັ້ງທີ 6 ແຂວງຫຼວງພະບາງໄດ້ສະເໜີບາງເນື້ອໃນເພີ່ມເຂົ້າຕື່ມໃນບາງມາດຕາຢູ່ພາກທີVIIIຄະນະກໍາມະການດ້ານຄວາມປອດໄພທາງຫຼວງຊຶ່ງໃນນັ້ນໄດ້ກໍານົດລະອຽດມີ 3 ຄະນະຄື: ຄະນະກໍາມະການແຫ່ງຊາດ, ຂັ້ນແຂວງ, ຂັ້ນເມືອງມາເບິ່ງໃນນີ້ແມ່ນບໍ່ໄດ້ລົງຮອດຕາແສງເຫັນດີແຕ່ວ່າຢູ່ໃນຄະນະກໍາມະການຂັ້ນເມືອງນັ້ນໃນມາດຕາ 81 ອົງປະກອບຂອງຄະນະກໍາມະການດ້ານຄວາມປອດໄພທາງຫຼວງຂັ້ນເມືອງຊຶ່ງປະກອບມີ 15 ພາກສ່ວນໃນ 15 ພາກສ່ວນນີ້ສະເໜີເພີ່ມໃສ່ຕື່ມໜຶ່ງໃນນັ້ນປະທານຕາແສງພາຍໃນເມືອງຂຶ້ນກັບເປັນຄະນະເພາະເມືອງໜຶ່ງອາດຈະມີສາມສີ່ຕາແສງໃຫ້ເອົາເຂົ້າໃນຄະນະກໍາມະການດັ່ງກ່າວ,ມາດຕາ 11 ໃນນັ້ນໄດ້ຂຽນວ່າບຸກຄົນທຸກຄົນທີ່ມີໜ້າທີ່ຊ່ວຍເຫຼືອເດັກຜູ້ເຖົ້າຄົນພິການທີ່ບໍ່ສາມາດຊ່ວຍເຫຼືອຕົນເອງໄດ້ໃນເວລາຍ່າງຂ້າມທາງສະເໜີເພີ່ມໃສ່ວ່າທຸກຄົນມີໜ້າທີ່ຊ່ວຍເຫຼືອເດັກຜູ້ເຖົ້າຄົນພິການແມ່ຍິງແລະບຸກຄົນທີ່ບໍ່ສາມາດຊ່ວຍເຫຼືອຕົນເອງໄດ້ໃນເວລາຍ່າງຂ້າມທາງ.

ທ່ານ ນາງ ມະໄລທອງ ທໍາມະຕິກາ ສສຊ ເຂດເລືອກຕັ້ງທີ 13 ແຂວງສະຫວັນນະເຂດ ປະກອບຄໍາເຫັນແລກປ່ຽນໃນມາດຕາ 11 ຂໍ້ທີ 2 ການຍ່າງຂ້າມທາງບ່ອນທີ່ບໍ່ມີທາງມ້າລາຍ ບໍ່ມີໄຟສັນຍານ ຂົວຂ້າມ, ທາງອຸມົງ ຫຼືບ່ອນກໍານົດໄວ້ ຖ້າບໍ່ມີບ່ອນຂ້າມທີ່ກໍານົດໄວ້ນີ້ ໃຫ້ຍ່າງຂ້າມທາງໃນບ່ອນທີ່ເຫັນວ່າມີຄວາມປອດໄພ ໃນຈຸດນີ້ ສະເໜີໃຫ້ເວົ້າຈະແຈ້ງຕື່ມ ກ່ຽວກັບຄໍາວ່າ: ບ່ອນທີ່ປອດໄພ ຢູ່ໃນຕົວເມືອງເປັນບ່ອນແນວໃດ ເປັນຕົ້ນຢູ່ໜ້າສໍານັກງານ, ອົງການ,ໂຮງໝໍ,ໂຮງຮຽນ ແລະອື່ນໆ ສ່ວນຢູ່ນອກເມືອງ ຫຼືເຂດນອກ ຄວນເປັນເຂດແນວໃດ ເພາະທຸກຄົນຂ້າມທາງ ກໍຄິດວ່າຕົນເອງຂ້າມຢູ່ໃນບ່ອນທີ່ປອດໄພແລ້ວ ເຂດດັ່ງກ່າວນີ້ ຍານພາຫະນະທີ່ສັນຈອນເທິງເສັ້ນທາງຕ້ອງຜ່ອນຄວາມໄວ; ມາດຕາ 15 ສະເໜີເພີ່ມຕື່ມບາງຄໍາສັບເພື່ອໃຫ້ຊັດເຈນແລະເຂົ້າໃຈງ່າຍ ເພາະໃນນັ້ນ ໄດ້ກໍານົດໄວ້ວ່າ: ກ່ອນຈະແຊງຂຶ້ນໜ້າຕ້ອງເປີດສັນຍານໄຟລ້ຽວຊ້າຍ ສະແດງວ່າອະນຸຍາດໃຫ້ແຊງຂຶ້ນເບື້ອງຊ້າຍເທົ່ານັ້ນ ຂໍໃຫ້ເພີ່ມຄໍາສັບວ່າ: ໂດຍອະນຸຍາດໃຫ້ແຊງຂຶ້ນໜ້າທາງກໍ້າຊ້າຍເທົ່ານັ້ນ ຢູ່ທາງເບື້ອງຫຼັງຄໍາວ່າ ເຕືອນດ້ວຍສັນຍານແກ ພ້ອມນີ້ ກໍຄວນກໍານົດຈະແຈ້ງຫຼັກການໃນການແຊງຂຶ້ນໜ້າ ສໍາລັບເສັ້ນທາງທີ່ມີ 4 ຊ່ອງທາງຂຶ້ນໄປ ພາຫະນະທີ່ໃຊ້ຄວາມໄວຕໍ່າ ເຊັ່ນ: ລົດບັນທຸກ ຄວນແລ່ນໃນຊ່ອງທາງເບື້ອງໃນ ຫຼືຊ່ອງທາງເບື້ອງຂວາສະເໝີ ແລະ ໃນມາດຕາ 24 ສະເໜີປັບປຸງຄໍາສັບຕື່ມ ກ່ຽວກັບຄວາມແຮງຂອງເຄື່ອງຈັກບໍ່ເກີນເທົ່າໃດຊີຊີ ຫຼືຄວາມແຮງຂອງມໍເຕີໄຟຟ້າ ບໍ່ເກີນກິໂລວັດ ເພາະຈະແຍກໃຫ້ເຫັນວ່າ ລົດທີ່ນໍາໃຊ້ຄວາມແຮງດ້ວຍກົນຈັກ ແລະຄວາມແຮງດ້ວຍໄຟຟ້າ ນອກຈາກນີ້ ກໍໃຫ້ກໍານົດກ່ຽວກັບລົດຂົນສົ່ງໂດຍສານ, ປັດຈຸບັນມີທັງລົດປະເພດທີ່ແລ່ນດ້ວຍເຄື່ອງຈັກແລະແລ່ນດ້ວຍໄຟຟ້າ; ສໍາລັບມາດຕາທີ 28 ສະເໜີໃຫ້ກໍານົດຈະແຈ້ງຕື່ມທັງສາມລໍ້ຕິດເຄື່ອງຈັກແລະແລ່ນດ້ວຍໄຟຟ້າ ໃນປັດຈຸບັນແມ່ນມີສາມລໍ້ທີ່ແລ່ນໃຫ້ບໍລິການປະຊາຊົນຢ່າງຫຼວງຫຼາຍເຊັ່ນ: ຢູ່ນະຄອນຫຼວງວຽງຈັນ ກໍມີລົດສາມລໍ້ກັອກໆ ຈະອະນຸຍາດໃຫ້ບັນທຸກຜູ້ໂດຍສານຈັກຄົນ; ໃນມາດຕາ 74 ຂໍ້ຫ້າມທົ່ວໄປ ສະເໜີເພີ່ມເນື້ອໃນເຂົ້າຕື່ມ ຄໍາວ່າຫ້າມຈອດໃນເຂດຫ້າມຈອດ ໂດຍການເປີດໄຟຂໍທາງ ເຫດການຕົວຈິງແມ່ນມີຫຼາຍໂດຍສະເພາະໃນເຂດຕົວເມືອງ ແລະ ການຄຸ້ມຄອງກ່ຽວກັບການສ້າງກອງທຶນຄວາມປອດໄພການຈໍລະຈອນທາງບົກ ສະເໜີກໍານົດຈະແຈ້ງຈຸດປະສົງເປົ້າໝາຍໃນການນໍາໃຊ້ກອງທຶນດັ່ງກ່າວ ເພື່ອບໍ່ໃຫ້ເກີດມີຫາງສຽງທາງສັງຄົມ.

ທ່ານ ສີວຽງທອງ ສໍຜາບມີໄຊ ສສຊ ເຂດເລືອກຕັ້ງທີ 1 ນະຄອນຫຼວງວຽງຈັນ ປະກອບຄໍາເຫັນຕໍ່ກັບຮ່າງກົດໝາຍຈະລາຈອນທາງບົກ (ສະບັບປັບປຸງ) ຊຶ່ງມີຄໍາເຫັນຕໍ່ມາດຕາ 29 ກ່ຽວກັບຄວາມເຂັ້ມຂຸ້ນຂອງທາດເຫຼົ້າໃນຮ່າງກາຍໃນເວລາຂັບຂີ່ຄວາມເຂັ້ມຂຸ້ນຂອງທາດເຫຼົ້າເປັນສູນນັ້ນເໝາະສົມແລ້ວບໍ ຫຼືຄວນກໍານົດອັດຕາເທົ່າໃດຈຶ່ງຈະປະຕິບັດໄດ້ ເພາະອີງໃສ່ຮີດຄອງປະເພນີແມ່ນມີຫຼາຍງານບຸນ. ສະນັ້ນ ໃນຂອດການຈັດຕັ້ງປະຕິບັດ ຖ້າຫາກວ່າຂຽນອອກໄປແລ້ວປະຕິບັດບໍ່ໄດ້ເທົ່າທີ່ຄວນ ຄວາມສັກສິດທາງດ້ານກົດໝາຍ ຊຶ່ງເຈົ້າໜ້າທີ່ຈະຕ້ອງໄດ້ມີຄວາມຮັບຜິດຊອບສູງຂຶ້ນ ແຕ່ການກໍານົດຂອບເຂດປະລິມານກໍເຫັນດີ ເຫັນບົດຮຽນບາງປະເທດ 0,03;0,05 ຢາກໃຫ້ກໍານົດອັດຕາລະອຽດວ່າ 0,05 ສໍາລັບເຄື່ອງດື່ມທີ່ມີທາດເຫຼົ້າເພາະເຄື່ອງດື່ມແຕ່ລະປະເພດເປີເຊັນຂອງເອວກໍຮໍແມ່ນຕ່າງກັນ ຕົວຢ່າງເບຍ ແມ່ນຈະຖືກຈັກແກ້ວ ຫຼືຈັກລິດ ໃຫ້ກໍານົດລະອຽດເປັນມາດຖານໃນຂອດຈັດຕັ້ງປະຕິບັດ ແລະມາດຕາ 13 ລະບຽບສໍາລັບຜູ້ຂັບຂີ່ ສໍາຄັນທີ່ສຸດ ຕ້ອງມີໃບອະນຸຍາດຂັບຂີ່ເທົ່ານັ້ນ ມາເບິ່ງຜູ້ຂັບຂີ່ໃຊ້ລົດໃຊ້ຖະໜົນຢູ່ທ້ອງຖະໜົນໃນບ້ານເຮົາເກືອບບໍ່ຮອດ 50% ທີ່ບໍ່ມີໃບຂັບຂີ່ ໂດຍສະເພາະນັກຮຽນມໍຕົ້ນ ມໍປາຍ ທີ່ຜູ້ປົກຄອງອະນຸຍາດໃຫ້ນໍາໃຊ້ລົດຈັກ ອັນນີ້ມີຄວາມສ່ຽງຫຼາຍ ແລະກໍເປັນການລະເມີດກົດໝາຍ, ອຸບັດເຫດທີ່ເກີດຈາກນັກຮຽນແມ່ນມີຫຼາຍ ສາເຫດກໍຍ້ອນວ່າບໍ່ຮູ້ກົດລະບຽບຈະລາຈອນ ສິ່ງນີ້ແມ່ນການສ້າງສະຕິໃນການປະຕິບັດເຄົາລົບລະບຽບກົດໝາຍໃນສັງຄົມ ໂດຍເລີ່ມຈາກຄອບຄົວ ຖ້າປະຕິບັດໄດ້ເປັນການດີທີ່ສຸດ.

ຂ່າວ-ພາບ: ຍຸພິນທອງ+ບຸນອູ້ມ