ໃນໂອກາດນີ້, ທ່ານຮອງນາຍົກລັດຖະມົນຕີ ໄດ້ສະແດງຄວາມຍິນດີຕ້ອນຮັບ, ຊົມເຊີຍ ແລະ ຕີລາຄາສູງຕໍ່ການເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ຂອງທ່ານປະທານກຳມາທິການກິດຈະການລັດຖະສະພາ ແຫ່ງຣາຊະອານາຈັກໄທພ້ອມດ້ວຍຄະນະໃນຄັ້ງນີ້ ຊຶ່ງເປັນການປະກອບສ່ວນສືບຕໍ່ຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມື ຖານບ້ານໃກ້ເຮືອນຄຽງທີ່ດີທີ່ມີມາແຕ່ດົນນານ ລະຫວ່າງສອງປະເທດ ລາວ-ໄທ ເວົ້າລວມ, ເວົ້າສະເພາະ ລະຫວ່າງ ສະພາແຫ່ງຊາດ ແຫ່ງ ສປປ ລາວ ແລະ ລັດຖະສະພາ ແຫ່ງຣາຊະອານາຈັກໄທໃຫ້ນັບມື້ຈະເລີນງອກງາມ ແລະ ເກີດດອກອອກຜົນຍິ່ງໆຂຶ້ນ; ໄດ້ສະເໜີທ່ານ ປະທານກຳມາທິການກິດຈະການລັດຖະສະພາ ແຫ່ງຣາຊະອານາຈັກໄທສືບຕໍ່ຊຸກຍູ້ພາກສ່ວນກ່ຽວຂ້ອງປະສານງານ ແລະ ແລກປ່ຽນຂໍ້ມູນຂ່າວສານຮ່ວມກັນຢ່າງໃກ້ຊິດ ເພື່ອສ້າງພື້ນຖານອັນດີໃຫ້ແກ່ການພົວພັນຮ່ວມມືດ້ານເສດຖະກິດ, ການຄ້າ-ການລົງທຶນ, ການທ່ອງທ່ຽວ ແລະ ຄວາມສະຫງົບ-ຄວາມເປັນລະບຽບຮຽບຮ້ອຍ ກໍຄືການຮ່ວມມືເພື່ອການພັດທະນາ, ພ້ອມທັງ ສະເໜີຊຸກຍູ້ພາກທຸລະກິດຂອງໄທ ມາລົງທຶນຢູ່ລາວ ໃຫ້ຫຼາຍຂຶ້ນກວ່າເກົ່າເພື່ອປະກອບສ່ວນເຂົ້າພັດທະນາເສດຖະກິດ-ສັງຄົມ ຂອງສອງປະເທດໃຫ້ຂະຫຍາຍຕົວ ແລະ ນໍາເອົາຜົນປະໂຫຍດມາສູ່ປະຊາຊົນສອງຊາດ ລາວ-ໄທ ຫຼາຍຂຶ້ນເປັນກ້າວໆ; ໄດ້ຍົກໃຫ້ເຫັນຄວາມໝາຍສໍາຄັນໃນໂອກາດຄົບຮອບ 75 ປີ ແຫ່ງການສ້າງຕັ້ງສາຍພົວພັນການທູດ ລາວ-ໄທ ໃນປີ 2025, ລວມທັງ ຜົນສຳເລັດອັນພົ້ນເດັ່ນ ຂອງການພົວພັນຮ່ວມມື ລາວ-ໄທ ຕະຫຼອດໄລຍະ 75 ປີທີ່ຜ່ານມາ.
ໂອກາດນີ້, ທ່ານປະທານກຳມາທິການກິດຈະການລັດຖະສະພາ ແຫ່ງຣາຊະອານາຈັກໄທກໍໄດ້ສະແດງຄວາມຂອບໃຈ ຕໍ່ການຕ້ອນຮັບອັນອົບອຸ່ນຂອງທ່ານຮອງນາຍົກລັດຖະມົນຕີ ແລະ ພາກສ່ວນກ່ຽວຂ້ອງ ຂອງ ສປປ ລາວ ໃນຄັ້ງນີ້, ພ້ອມທັງ ແຈ້ງໃຫ້ຊາບກ່ຽວກັບຈຸດປະສົງ ແລະ ແຜນການເຄື່ອນໄຫວຢ້ຽມຢາມ ເຮັດວຽກຮ່ວມກັບພາກສ່ວນກ່ຽວຂ້ອງ ຂອງ ສປປ ລາວ.
(ຂ່າວ-ພາບ: ກົມປະຊາສຳພັນ ຫສນຍ)
ຄໍາເຫັນ