ພ້ອມຄະນະ ທີ່ເດີນທາງມາເຂົ້າຮ່ວມກອງປະຊຸມລັດຖະມົນຕີປ້ອງກັນປະເທດ ອາຊຽນ ຄັ້ງທີ 18 ແລະ ອາຊຽນບວກ ຄັ້ງທີ 11 ທີ່ ສປປ ລາວ ເປັນເຈົ້າພາບໃນວັນທີ 20 ພະຈິກນີ້ທີ່ສຳນັກງານນາຍົກລັດຖະມົນຕີ.
ໃນໂອກາດນີ້, ທ່ານນາຍົກລັດຖະມົນຕີ ແຫ່ງ ສປປ ລາວໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ການເດີນທາງມາຮ່ວມກອງປະຊຸມ ຢູ່ ສປປ ລາວ ໃນຄັ້ງນີ້ຊຶ່ງເປັນການປະກອບສ່ວນອັນສໍາຄັນ ເຂົ້າໃນການເສີມສ້າງສາຍພົວພັນມິດຕະພາບ ຖານບ້ານໃກ້ເຮືອນຄຽງ ກໍຄືການຮ່ວມມືຂອງສອງລັດຖະບານ ແລະ ປະຊາຊົນສອງຊາດ ເວົ້າລວມ, ເວົ້າສະເພາະ ການຮ່ວມມືຂອງສອງກອງທັບລາວ-ໄທ ໃຫ້ຈະເລີນງອກງາມຍິ່ງໆຂຶ້ນ; ຈາກນັ້ນ ໄດ້ສະເໜີໃຫ້ສືບຕໍ່ສົ່ງເສີມ ແລະ ຊຸກຍູ້ການພົວພັນ ລະຫວ່າງສອງກອງທັບ ເພື່ອປະກອບສ່ວນເສີມສ້າງສາຍພົວພັນມິດຕະພາບຖານບ້ານໃກ້ເຮືອນຄຽງທີ່ດີ ດ້ວຍການແລກປ່ຽນຄະນະຜູ້ແທນຂັ້ນຕ່າງໆ ໃຫ້ເປັນປົກກະຕິ ເພື່ອແລກປ່ຽນບົດຮຽນ ແລະ ປະສົບການວຽກງານຕົວຈິງ; ສະເໜີສອງກອງທັບ ສືບຕໍ່ສົມທົບກັນເອົາໃຈໃສ່ໃນການສະກັດກັ້ນການກໍ່ຄວາມບໍ່ສະຫງົບຢູ່ຕາມບໍລິເວນຊາຍແດນຂອງສອງປະເທດ ໂດຍສະເພາະສະກັດກັ້ນການລັກລອບເຂົ້າເມືອງຜິດກົດໝາຍ, ອາຊະຍາກຳຂ້າມຊາດ, ການຄ້າມະນຸດ, ການຄ້າຂາຍເຖື່ອນ, ການຂົນສົ່ງ ແລະ ຄ້າຂາຍສິ່ງເສບຕິດ ໂດຍປະສານກັນຜ່ານທາງການທູດ ແລະ ທຸກກົນໄກທີ່ມີຢູ່ໃນປັດຈຸບັນ, ລວມທັງ ການຄຸ້ມຄອງແຮງງານລາວ ທີ່ໄປອອກແຮງງານ ຢູ່ຣາຊະອານາຈັກໄທ ໃຫ້ຖືກຕ້ອງຕາມລະບຽບກົດໝາຍ ທີ່ກຳນົດໄວ້, ຕະຫຼອດຮອດ ການຮ່ວມມືທາງດ້ານການເຊື່ອມໂຍງ- ເຊື່ອມຈອດ ທາງດ້ານພະລັງງານ ໄປສູ່ບັນດາປະເທດໃກ້ຄຽງ; ໄດ້ສະແດງຄວາມຊົມເຊີຍຕໍ່ທ່ານຮອງນາຍົກລັດຖະມົນຕີລັດຖະມົນຕີກະຊວງປ້ອງກັນປະເທດ ແຫ່ງຣາຊະອານາຈັກໄທ ທີ່ໄດ້ຮັບຄວາມໄວ້ວາງໃຈ ໃຫ້ດຳລົງຕຳແໜ່ງເປັນຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດ.
ໂອກາດດຽວກັນ, ທ່ານຮອງນາຍົກລັດຖະມົນຕີລັດຖະມົນຕີກະຊວງປ້ອງກັນປະເທດ ແຫ່ງຣາຊະອານາຈັກໄທ ກໍໄດ້ສະແດງຄວາມຂອບໃຈຕໍ່ທ່ານນາຍົກລັດຖະມົນຕີ ແຫ່ງ ສປປ ລາວ ທີ່ໄດ້ໃຫ້ການຕ້ອນຮັບອັນອົບອຸ່ນ, ພ້ອມທັງສະແດງຄວາມຊົມເຊີຍ ຕໍ່ຜົນສຳເລັດອັນພົ້ນເດັ່ນ ຂອງສປປ ລາວ ໂດຍສະເພາະການເປັນເຈົ້າພາບຈັດກອງປະຊຸມສຸດຍອດອາຊຽນ ແລະ ກອງປະຊຸມປິ່ນອ້ອມອື່ນໆ; ໄດ້ສະແດງການສະໜັບສະໜູນ ແລະ ການພົວພັນຮ່ວມມື ຂອງສອງປະເທດ ໂດຍສະເພາະການແກ້ໄຂບັນຫາໝອກຄວັນ, ບັນຫາຢາເສບຕິດ, ບັນຫາອາຊະຍາກຳ ແລະ ອື່ນໆ ເພື່ອສ້າງສະພາບແວດລ້ອມທີ່ດີ ໃຫ້ແກ່ການພົວພັນຮ່ວມມື ກໍຄືການສ້າງສາພັດທະນາສອງປະເທດ ໃຫ້ມີຄວາມສະຫງົບ, ເສດຖະກິດໄດ້ຮັບການຂະຫຍາຍຕົວຢ່າງຕໍ່ເນື່ອງ ແລະ ດີຂຶ້ນເປັນກ້າວໆ.
(ຂ່າວ-ພາບ: ແສງຈັນ, ບຸນຕອມ)
ຄໍາເຫັນ