ຮອງລັດຖະມົນຕີກະຊວງການຕ່າງປະເທດ ແຫ່ງ ສ ເກົາຫຼີ, ໃນໂອກາດເດີນທາງມາຢ້ຽມຢາມເຮັດວຽກຢູ່ ສປປ ລາວ.
ໃນໂອກາດນີ້, ທ່ານ ສະເຫຼີມໄຊ ກົມມະສິດ ໄດ້ສະແດງຄວາມຍິນດີຕ້ອນຮັບການຢ້ຽມຢາມ ສປປ ລາວ ຄັ້ງນີ້ ຂອງ ທ່ານ ຈອງ ບຽວ ວອນ, ພ້ອມທັງໄດ້ຕີລາຄາສູງການພົວພັນມິດຕະພາບ ແລະ ການຮ່ວມມືທີ່ມີໝາກຜົນ ລະຫວ່າງ ສປປ ລາວ ແລະ ສ ເກົາຫຼີ ຕະຫຼອດເກືອບ 3 ທົດສະວັດທີ່ຜ່ານມາ ທີ່ໄດ້ຮັບການພັດທະນາຢ່າງຕໍ່ເນື່ອງ, ການນໍາຂັ້ນສູງຂອງສອງປະເທດ ກໍໄດ້ມີການແລກປ່ຽນການຢ້ຽມຢາມກັນຢ່າງເປັນປົກກະຕິ, ລວມເຖິງການແລກປ່ຽນລະຫວ່າງປະຊາຊົນກັບປະຊາຊົນ ຊຶ່ງເປັນການປະກອບສ່ວນຢ່າງຕັ້ງໜ້າເຂົ້າໃນການສືບຕໍ່ເພີ່ມທະວີຮັດແໜ້ນການພົວພັນ ແລະ ການຮ່ວມມືຂອງສອງປະເທດ, ກໍຄືການສືບຕໍ່ສະໜັບສະໜູນ ແລະ ແລກປ່ຽນທັດສະນະ ຊຶ່ງກັນ ແລະ ກັນ ໃນເວທີພາກພື້ນ ແລະ ສາກົນ, ພິເສດສອງປະເທດຈະຮ່ວມກັນສະເຫຼີມສະຫຼອງຄົບຮອບ 30 ປີ ແຫ່ງການສ້າງຕັ້ງສາຍພົວພັນການທູດ ໃນປີ 2025 ທີ່ຈະມາເຖິງນີ້. ການຮ່ວມມືໃນດ້ານຕ່າງໆຂອງສອງປະເທດ ສືບຕໍ່ໄດ້ຮັບການເອົາໃຈໃສ່ ແລະ ໄດ້ຮັບການພັດທະນາຢ່າງຕໍ່ເນື່ອງ. ອັນພົ້ນເດັ່ນແມ່ນການຮ່ວມມືດ້ານການລົງທຶນ, ປັດຈຸບັນ ຈັດຢູ່ໃນອັນດັບ 5 ຂອງການລົງທຶນຂອງຕ່າງປະເທດ ຢູ່ ລາວ,ການຈັດສົ່ງແຮງງານລາວ ໄປເຮັດວຽກຢູ່ ສ ເກົາຫຼີ ແລະ ການທ່ອງທ່ຽວມີທ່າອ່ຽງເພີ່ມຂຶ້ນ.
ພ້ອມກັນນີ້, ທ່ານ ສະເຫຼີມໄຊ ກົມມະສິດ ໄດ້ສະແດງຄວາມຂອບໃຈ ຕໍ່ການຊ່ວຍເຫຼຶອ ແລະ ສະໜັບສະໜູນອັນລໍ້າຄ່າຂອງລັດຖະບານ ແລະ ປະຊາຊົນ ສເກົາຫຼີ ໃຫ້ແກ່ ສປປ ລາວ ໃນໄລຍະຜ່ານມາ, ໂດຍຜ່ານໂຄງການຊ່ວຍເຫຼືອທາງການເພື່ອການພັດທະນາ (ODA) ແລະ ໂຄງການກູ້ຢືມຈາກກອງທຶນຮ່ວມມືດ້ານການພັດທະນາເສດຖະກິດ (EDCF) ເພື່ອປະກອບສ່ວນເຂົ້າໃນການຈັດຕັ້ງແຜນພັດທະນາເສດຖະກິດ-ສັງຄົມ ຢູ່ ສປປ ລາວ. ພິເສດ, ແມ່ນການສະໜັບສະໜູນການເປັນປະທານອາຊຽນ ຂອງ ສປປ ລາວ ໃນປີ 2024 ນີ້.
ໃນຂະນະດຽວກັນ, ທ່ານຈອງ ບຽວ ວອນ ກໍໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນໃນຄັ້ງນີ້,ພ້ອມທັງເຫັນດີເປັນເອກະພາບຕໍ່ການຕີລາຄາການພົວພັນຮ່ວມມືລະຫວ່າງສອງປະເທດ ຂອງ ທ່ານ ສະເຫຼີມໄຊ ກົມມະສິດແລະ ໄດ້ແຈ້ງໃຫ້ຊາບເຖິງຈຸດປະສົງຫຼັກຂອງການຢ້ຽມຢາມ ສປປ ລາວ ໃນຄັ້ງນີ້ ແມ່ນເພື່ອເຂົ້າເປັນປະທານຮ່ວມໃນກອງປະຊຸມເວທີພົບປະພາກທຸລະກິດແມ່ນໍ້າຂອງ-ສເກົາຫຼີ ຄັ້ງທີ 12 ໃນວັນທີ 20 ສິງຫາ 2021 ຜ່ານມາ ທີ່ໄດ້ຮັບຜົນສໍາເລັດຢ່າງຈົບງາມ ແລະ ຈະສືບຕໍ່ເຂົ້າຮ່ວມກອງປະຊຸມເຈົ້າໜ້າທີ່ອາວຸໂສອາຊຽນ ທີ່ ແຂວງຫຼວງພະບາງ. ພ້ອມນີ້, ກໍໄດ້ສະແດງຄວາມຂອບໃຈຕໍ່ ສປປ ລາວ ທີ່ໄດ້ໃຫ້ການຮ່ວມມື ແລະ ການສະໜັບສະໜູນແກ່ ສ ເກົາຫຼີ ທັງໃນຂອບສອງຝ່າຍ ແລະ ຫຼາຍຝ່າຍ ຕະຫຼອດມາແລະ ຍັງໄດ້ຢືນຢັນຄືນຄໍາໝາຍໝັ້ນຂອງ ສ ເກົາຫຼີ ໃນການສືບຕໍ່ໃຫ້ການຮ່ວມມື, ຊ່ວຍເຫຼືອ ແລະ ສະໜັບສະໜູນແກ່ ສປປ ລາວ ໂດຍສະເພາະໃນການເປັນປະທານອາຊຽນ ໃນປີ 2024 ໃຫ້ປະສົບຜົນສໍາເລັດອັນຈົບງາມ.
ຂ່າວ-ພາບ: ກະຊວງການຕ່າງປະເທດ
ຄໍາເຫັນ