ປູຕິນປະທານາທິບໍດີ ແຫ່ງ ສະຫະພັນ ຣັດເຊຍ ເພື່ອດໍາລົງຕໍາແໜ່ງເປັນເອກອັກຄະຖະທູດວິສາມັນ ຜູ້ມີອຳນາດເຕັມ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ປະຈຳ ປະເທດ ສະຫະພັນ ຣັດເຊຍ.
ທ່ານ ສີພັນດອນ ອ້ອຍບົວບຸດດີ ໄດ້ຮ່ວມກັບບັນດາທ່ານທູດຕ່າງປະເທດ ລວມທັງໝົດ 28 ທ່ານ ທີ່ເຂົ້າຮ່ວມໃນພິທີຍື່ນສານຕາຕັ້ງ ໃນຄັ້ງນີ້. ພາຍຫຼັງ ດໍາເນີນການຍື່ນສານຕາຕັ້ງແລ້ວ ທ່ານ ວາລາດີເມຍ ປູຕິນ ໄດ້ໃຫ້ກຽດມີຄໍາເຫັນຕໍ່ບັນດາທ່ານເອກອັກຄະລັດຖະທູດ, ໄດ້ສະແດງຄວາມຊົມເຊີຍຕໍ່ບັນດາທ່ານເອກອັກຄະລັດຖະທູດ ທີ່ໄດ້ຮັບການແຕ່ງຕັ້ງເປັນເອກອັກຄະລັດຖະທູດ ມາປະຈໍາ ຢູ່ ສະຫະພັນ ຣັດເຊຍ ເພື່ອມາປະຕິບັດໜ້າທີ່ການທູດອັນສົມກຽດ ຊຶ່ງເປັນພາລະກິດທີ່ສໍາຄັນ ແລະ ມີຄວາມຮັບຜິດຊອບ ໃນການເສີມຂະຫຍາຍ ຮັດແໜ້ນສາຍພົວພັນມິດຕະພາບ ແລະ ການຮ່ວມມື ກັບ ສຣັດເຊຍ ໃນດ້ານການເມືອງ, ເສດຖະກິດ, ດ້ານມະນຸດສະທຳ ແລະ ໃນຂົງເຂດວຽກງານດ້ານອື່ນໆ. ທ່ານ ວາລາດີເມຍ ປູຕິນ ໄດ້ຍົກໃຫ້ເຫັນນະໂຍບາຍຂອງຣັດເຊຍ ທີ່ຍາມໃດກໍເປີດກວ້າງການພົວພັນຮ່ວມມືກັບທຸກປະເທດ ບົນພື້ນຖານຕ່າງຝ່າຍຕ່າງມີຜົນປະໂຫຍດຮ່ວມກັນ ໂດຍບໍ່ໄດ້ຈໍາແນກ ແລະ ບົນຫຼັກການສະເໝີພາບ, ບໍ່ແຊກແຊງເຂົ້າວຽກງານພາຍໃນຂອງກັນແລະກັນ ແລະ ຢຶດໝັ້ນກົດໝາຍສາກົນຢ່າງເຂັ້ມງວດ. ຣັດເຊຍ ຢືນຢັນ ໃນການສ້າງລະບົບການພົວພັນທາງດ້ານເສດຖະກິດໂລກທີ່ມີຄວາມຍຸຕິທຳ,ປາສະຈາກການແຂ່ງຂັນທີ່ບໍ່ເປັນທຳການລົງໂທດຕາມລໍາພັງຝ່າຍດຽວ ແລະ ຂໍ້ຈຳກັດທີ່ມີທ່າແຮງຈູງໃຈທາງການເມືອງ.ຣັດເຊຍ ເຂົ້າຮ່ວມຢ່າງຕັ້ງໜ້າໃນເວທີສາກົນ ແລະ ດຳເນີນນະໂຍບາຍການຕ່າງປະເທດທີ່ມີລັກສະນະສ້າງສັນ ໂດຍຄໍານຶງເຖິງຜົນປະໂຫຍດຂອງຊາດ ແລະ ທ່າອ່ຽງຈຸດປະສົງການພັດທະນາຂອງໂລກ. ພ້ອມດຽວກັນນີ້ ທ່ານ ກໍໄດ້ຍົກໃຫ້ເຫັນການຮ່ວມມືໃນຂອບ BRICS ໂດຍປະກອບມີຄູ່ຮ່ວມທີ່ມາຈາກບັນດາປະເທດໃນຂົ້ວໂລກໃຕ້ ແລະ ຕາເວັນອອກ ໃນຮູບແບບ “BRICS plus”. ການເປັນເຈົ້າພາບ ແລະ ເປັນປະທານກອງປະຊຸມສຸດຍອດກຸ່ມ BRICS ຢູ່ ເມືອງກາຊານ ສະຫະພັນ ຣັດເຊຍ ໄດ້ກາຍເປັນຄວາມສຸດຍອດໃນກຸ່ມ ແລະ ເປັນເຫດການສໍາຄັນຂອງໂລກ. ຄວາມຫຼາກຫຼາຍ ທາງດ້ານອາລິຍະທໍາ, ການປະສົມປະສານທີ່ເປັນເອກະລັກຂອງປະເພນີປະຈໍາຂອງແຕ່ລະຊາດ ແລະ ຮູບແບບການພັດທະນາ, ຊຶ່ງບໍ່ຕ້ອງສົງໄສເລີຍວ່າຄວາມເຂັ້ມແຂງ, ສັກກະຍາພາບມະຫາສານທີ່ໜ້າດຶງດູດໃຈ ແລະ ທ່າແຮງອັນໃຫຍ່ຫຼວງຂອງກຸ່ມ BRICS ແມ່ນແນ່ນອນ, ບົດບາດຂອງປະຊາຄົມ BRICS ໃນວຽກງານສາກົນ ແລະ ອຳນາດໜ້າທີ່ຂອງຕົນ ສືບຕໍ່ແຂງແກ່ນເພີ່ມທະວີຂຶ້ນ. ວິໄສທັດຍຸດທະສາດຂອງບັນດາຜູ້ເຂົ້າຮ່ວມ BRICS ສຳລັບໂລກຫຼາຍຂົ້ວໃນອະນາຄົດທີ່ຕອບສະໜອງຄວາມມຸ່ງມາດປາຖະໜາຂອງບັນດາປະເທດ“ປະຊາຄົມໂລກ” ໄດ້ຖືກບັນທຶກໄວ້ໃນຖະແຫຼງການ Kazan ທີ່ໄດ້ຮັບຮອງເອົາໃນກອງປະຊຸມ. ຜົນໄດ້ຮັບທີ່ສໍາຄັນຂອງກອງປະຊຸມ BRICS ຢູ່ ກາຊານ ແມ່ນການຈັດຕັ້ງປະເພດໃໝ່"ປະເທດຄູ່ຮ່ວມ". ບັນຊີລາຍຊື່ຂອງປະເທດຜູ້ສະໝັກທີ່ມີສັກກະຍະພາບ ໄດ້ຮັບການຕົກລົງເຊັ່ນກັນ ແລະ ຈະສົ່ງຄໍາເຊີນທີ່ເໝາະສົມ, ເມື່ອໄດ້ຮັບຄໍາຕອບໃນທາງບວກ ປະເທດເຫຼົ່ານັ້ນຈະໄດ້ຮັບສະຖານະເປັນຫຸ້ນສ່ວນຂອງກຸ່ມ BRICS.
ນອກນັ້ນ, ທ່ານ ວາລາດີເມຍ ປູຕິນ ໄດ້ຊີ້ແຈງເຖິງທັດສະນະ ແລະ ນະໂຍບາຍ ຂອງຣັດເຊຍ ກ່ຽວກັບ ບັນຫາ ອູແກຣນ ແລະ ປາແລັດສະຕິນ-ອິດສະລາແອນ ຢ່າງກົງໄປກົງມາ ແລະ ຈະແຈ້ງຊັດເຈນ ຊຶ່ງທ່ານກ່າວວ່າ: ມີແນວໂນ້ມທີ່ໜ້າຕົກໃຈ ຕໍ່ຄວາມຂັດແຍ່ງເກົ່າ ແລະ ມີຂໍ້ຂັດແຍ່ງໃໝ່ ເກີດຂຶ້ນ. ຣັດເຊຍ ໄດ້ມີຄວາມພຽບພ້ອມສໍາລັບການເຈລະຈາ ກັບ ອູແກຣນມາແຕ່ເລີ່ມຕົ້ນທີ່ມີຄວາມຂັດແຍ່ງເກີດຂຶ້ນ ແລະ ຣັດເຊຍໄດ້ມີການດໍາເນີນການເຈລະຈາມາແຕ່ຕົ້ນ ແລະ ຂໍ້ຕົກລົງກໍເປັນທີ່ຍອມຮັບຮ່ວມກັນກັບອູແກຣນແລະ ໄດ້ຮັບການພັດທະນາໂດຍຝ່າຍອູແກຣນເປັນຜູ້ລິເລີ່ມ, ແຕ່ຝ່າຍອູແກຣນໄດ້ປະຕິເສດຂໍ້ຕົກລົງດັ່ງກ່າວ-ປະຕິບັດຕາມຄຳແນະນຳຈາກພາຍນອກ.
ຣັດເຊຍ ກໍາລັງພະຍາຍາມຢ່າງແຂງແຮງ ແລະ ຕັ້ງໜ້າເພື່ອປ້ອງກັນບໍ່ໃຫ້ຄວາມຂັດແຍ່ງ ລະຫວ່າງ ປາແລັດສະຕິນ-ອິດສະລາແອນ ທະວີຄວາມຮຸນແຮງເພີ່ມຂຶ້ນ ໃນປັດຈຸບັນ ເພື່ອບໍ່ໃຫ້ກາຍເປັນສົງຄາມໃຫຍ່ໃນຕາເວັນອອກກາງ. ເຊື່ອໝັ້ນວ່າ ທຸກຝ່າຍຈະກັບຄືນໄປສູ່ເສັ້ນທາງແຫ່ງຄວາມປອງດອງກັນ ແລະ ບັນລຸຂໍ້ຕົກລົງທີ່ຢັ້ງຢືນແລະໄລຍະຍາວ ແລະ ບົນພື້ນຖານ ການຮັບຮູ້ທາງກົດໝາຍລະຫວ່າງປະເທດທີ່ເປັນທີ່ຍອມຮັບເທົ່ານັ້ນ ແລະ ເງື່ອນໄຂສໍາຄັນໃນການຟື້ນຟູສັນຕິພາບຢູ່ພາກພື້ນ ນັ້ນຄືການດໍາເນີນການຕາມ "ສູດສອງລັດ" ຊຶ່ງໄດ້ຮັບການຮັບຮອງເອົາໂດຍມະຕິຂອງສະພາຄວາມໝັ້ນຄົງ ແລະ ກອງປະຊຸມສະມັດຊາໃຫຍ່ສະຫະປະຊາຊາດ.
ຣັດເຊຍ ມີຄວາມມຸ່ງໝັ້ນພົວພັນຮ່ວມມືກັບປະເທດທີ່ເປັນມິດ, ການຮ່ວມມືກັບປະເທດເຫຼົ່ານັ້ນແມ່ນຫຼາກຫຼາຍຮູບແບບ, ມີຜົນປະໂຫຍດຮ່ວມກັນ, ເປັນຄູ່ຮ່ວມມືຢ່າງແທ້ຈິງແລະໄດ້ຮັບການກໍ່ສ້າງບົນພື້ນຖານ ການເຄົາລົບຜົນປະໂຫຍດ ແລະ ອະທິປະໄຕ ຂອງກັນແລະກັນ. ຣັດເຊຍ ຈະສືບຕໍ່ຊຸກຍູ້ການພົວພັນຮ່ວມມືສອງຝ່າຍ ໃນດ້ານການເມືອງ, ເສດຖະກິດ, ມະນຸດສະທຳ, ໃນຂົງເຂດວັດທະນະທຳ, ກິລາ ແລະ ການສຶກສາ ຢ່າງເປັນປົກກະຕິ ກັບປະເທດຄູ່ຮ່ວມ ແລະ ປະເທດເພື່ອນມິດຍຸດທະສາດເຫຼົ່ານັ້ນ.
ໃນພິທີການຍື່ນສານຕາຕັ້ງ ຕໍ່ປະທານາທິບໍດີ ວາລາດີເມຍ ປູຕິນ ຂອງບັນດາທ່ານທູດຕ່າງປະເທດ ປະຈໍາ ສຣັດເຊຍ ໃນຄັ້ງນີ້ ໄດ້ເລີ່ມແຕ່ເວລາ 13 - 14 ໂມງ ຂອງວັນທີ 5 ພະຈິກ 2024 ຊຶ່ງດໍາເນີນໄປດ້ວຍບັນຍາກາດອັນດີ,ມີຄວາມເຂັ້ມງວດສູງທາງດ້ານຄວາມປອດໄພ-ພິທີການ ແລະ ການໃຫ້ກຽດຕໍ່ບັນດາທ່ານທູດ.
(ຂ່າວ-ພາບ: ກຕທ)
ຄໍາເຫັນ