ທ່ານ ກຽງໄກ ອຸ່ນມະນີ ໄດ້ກ່າວຈຸດປະສົງການຝຶກອົບຮົມຄັ້ງນີ້ວ່າ: ເພື່ອສ້າງຄວາມຮັບຮູ້ ແລະ ຄວາມເຂົ້າໃຈຢ່າງເລິກເຊິ່ງໃຫ້ແກ່ນັກສຶກສາ ກ່ຽວກັບແນວຄິດການເປັນພົນລະເມືອງໂລກ, ຍົກລະດັບທັກສະ, ຄ່ານິຍົມ ແລະ ທັດສະນະຄະຕິທີ່ຈຳເປັນໃນການດຳລົງຊີວິດ ຢູ່ໃນສັງຄົມທີ່ມີຄວາມຫຼາກຫຼາຍ ພາຍໃຕ້ກະແສໂລກາພິວັດ ແລະ ເພື່ອເສີມສ້າງຄວາມຮູ້ດ້ານການພັດທະນາແບບຍືນຍົງ, ການເຄົາລົບສິດທິມະນຸດ, ຄວາມສະເໝີພາບ ແລະ ການສົ່ງເສີມວັດທະນະທຳແຫ່ງສັນຕິພາບ, ທັງມີເປົ້າໝາຍສົ່ງເສີມຜູ້ຮຽນໃນການມີສ່ວນຮ່ວມ ແລະ ມີບົດບາດທີ່ຫ້າວຫັນ ທັງລະດັບທ້ອງຖິ່ນ ແລະ ລະດັບໂລກ ເພື່ອຜະເຊີນ ແລະ ແກ້ໄຂສິ່ງທ້າທາຍຂອງໂລກ ແລະ ໃນທີ່ສຸດກໍກາຍເປັນຜູ້ປະກອບສ່ວນທີ່ຕັ້ງໜ້າເພື່ອໂລກທີ່ຍຸຕິທຳ, ສະຫງົບສຸກ, ຍອມຮັບ, ກວມລວມເອົາທຸກຄົນ, ປອດໄພ ແລະ ຍືນຍົງ. ນອກນັ້ນຍັງເປັນສ່ວນໜຶ່ງຂອງຊຸມຊົນໂລກ ແລະ ເປັນສ່ວນໜຶ່ງຂອງມະນຸດຮ່ວມກັນ ໂດຍເນັ້ນໃສ່ການເພິ່ງພາອາໄສເຊິ່ງກັນ ແລະ ກັນ ທາງດ້ານການເມືອງ, ເສດຖະກິດ, ວັດທະນະທຳ ແລະ ສັງຄົມ ໃນລະດັບທ້ອງຖິ່ນ, ລະດັບຊາດ ແລະ ລະດັບສາກົນ.
ຈາກນັ້ນ, ບັນດາສຳມະນາກອນ ກໍໄດ້ຮຽນຮູ້ດ້ານທັກສະພື້ນຖານກ່ຽວກັບການສຶກສາພົນລະເມືອງໂລກ ຫຼື ສພລ ໃນຫຼາຍເນື້ອໃນບົດຮຽນ ທີ່ມີຄວາມກ່ຽວພັນກັນ, ທັງໄດ້ນຳເອົາບາງບົດຮຽນທີ່ສຳຄັນມາແລກປ່ຽນເຊັ່ນ: ຄວາມຮູ້ພື້ນຖານກ່ຽວກັບການສຶກສາພົນລະເມືອງໂລກ, ວິທີການສຶກສາພົນລະເມືອງໂລກ ແລະ ການປະເມີນ, ການສຶກສາເພື່ອພັດທະນາແບບຍືນຍົງ, ການເຊື່ອມສານບົດບາດຍິງ-ຊາຍ, ບັນຫາຂອງໂລກ ແລະ ການເຊື່ອມໂຍງ. ໂດຍເນັ້ນໃສ່ກຸ່ມນັກສຶກສາສາຍຕໍ່ເນື່ອງ ວິທະຍາໄລຄູສາລະວັນ, ຊຶ່ງສ່ວນໃຫຍ່ແມ່ນຄູ-ອາຈານ ທີ່ກຳລັງສຶກສາເພື່ອຍົກລະດັບຄວາມຮູ້ ເພື່ອໃຫ້ເຂົາເຈົ້າສາມາດນຳເອົາຄວາມຮູ້ ແລະ ປະສົບການທີ່ໄດ້ຮັບ ໄປຖ່າຍທອດ, ໝູນໃຊ້ ແລະ ຈັດຕັ້ງປະຕິບັດເຂົ້າໃນການຮຽນ-ການສອນຕົວຈິງ ຢູ່ຕາມໂຮງຮຽນທ້ອງຖິ່ນຂອງຕົນໃນອະນາຄົດ, ສ້າງຄວາມພ້ອມໃຫ້ແກ່ເດັກນ້ອຍ ແລະ ເຍົາວະຊົນຮຸ່ນໃໝ່ ໃຫ້ມີແນວຄິດທີ່ກວ້າງໄກໃນລະດັບສາກົນ ໃນອະນາຄົດ.
ໂອກາດດັ່ງກ່າວ, ບັນດາສຳມະນາກອນ ຍັງໄດ້ມີການຄົ້ນຄິດຫຼາຍຫົວຂໍ້ທີ່ສຳຄັນ ທີ່ມີການເຊື່ອມໂຍງພາຍໃນປະເທດ, ພາກພື້ນ ແລະ ສາກົນ ກໍຄືໃນທົ່ວໂລກ ພ້ອມທັງຈະໄດ້ລົງປະຕິບັດຕົວຈິງ ໃນການສອບຖາມຂໍ້ມູນຕ່າງໆຕື່ມອີກ. ການຝຶກອົບຮົມຄັ້ງນີ້ ໄດ້ດຳເນີນໄປເປັນເວລາ 3 ວັນ ນັບແຕ່ວັນທີ 13 ຫາ ວັນທີ 15 ກໍລະກົດ 2026 ຈິ່ງຈະສຳເລັດ. ຂ່າວ-ພາບ: ວິໄລວອນ ສິດທິໄຊ
ຄໍາເຫັນ