ໂດຍ: ພັດ ລໍວັນໄຊ
ການສ້າງເສດຖະກິດຄອບຄົວ ແມ່ນມີຫຼາຍທາງເລືອກ ມັນຂຶ້ນກັບທ່າແຮງ ແລະ ເງື່ອນໄຂຂອງແຕ່ລະຄອບຄົວບໍ່ຄືກັນ ໂດຍສະເພາະກຸ່ມຄົນທີ່ເຮັດວຽກກິນເງິນເດືອນ ຫຼື ມະນຸດເງິນເດືອນ ຈະມີເວລາໜ້ອຍທີ່ສຸດ ທີ່ຈະໄປເຮັດວຽກແນວອື່ນເພີ່ມ ແຕ່ວ່າຖ້າຫາກກ້າຕັດສິນໃຈລົງມືເຮັດ ແລະ ມີຫົວຄິດປະດິດສ້າງ, ຄວາມດຸໝັ່ນຂະຫຍັນພຽນ, ຮູ້ຈັກບໍລິຫານເວລາໃນແຕ່ລະວັນໃຫ້ເໝາະສົມ ກໍສາມາດເຮັດກິດຈະການໃດ ໜຶ່ງຂຶ້ນມາ ເພື່ອສ້າງລາຍຮັບເຂົ້າມາສູ່ຄອບຄົວ ແລະ ປະສົບຜົນສຳເລັດໄດ້ ຄືດັ່ງຄອບຄົວ ຂອງທ່ານ ນາງ ແສງພະຈັນ ແກ້ວມະນີວົງ ທີ່ໃຊ້ເວລາວ່າງເຮັດແຈ່ວຂາຍ ຈົນມີລາຍຮັບທະລຸ 100 ລ້ານກີບຕໍ່ປີ.
ທ່ານ ນາງ ແສງພະຈັນ ແກ້ວມະນີວົງ ໄດ້ໃຫ້ສຳພາດຕໍ່ຜູ້ຂຽນວ່າ: ປັດຈຸບັນອາຍຸ 38 ປີ, ຢູ່ບ້ານສະພານໄຊ ນະຄອນປາກເຊ ແຂວງຈຳປາສັກ, ອາຊີບປັດຈຸບັນແມ່ນເປັນພະນັກງານຄູສອນ, ສ່ວນຜູ້ເປັນຜົວກໍແມ່ນຄູສອນເຊັ່ນດຽວກັນ, ມີລູກນຳກັນ 1 ຄົນ ຊຶ່ງລູກກຳລັງຢູ່ໃນໄວຮຽນ ຊຶ່ງມີການໃຊ້ຈ່າຍຫຼາຍ, ຊີວິດການເປັນຢູ່ ຂອງຄອບຄົວໃນເມື່ອກ່ອນແມ່ນພົບຄວາມຫຍຸ້ງຍາກຫຼາຍ ເນື່ອງຈາກວ່າອາໄສແຕ່ເງິນເດືອນເປັນລາຍຮັບຕົ້ນຕໍ ພໍແຕ່ກຸ້ມຢູ່ກຸ້ມກິນ, ລາຍຮັບບໍ່ສົມດູນກັບລາຍຈ່າຍ ຕ້ອງໄດ້ໃຊ້ຈ່າຍຢ່າງປະຢັດ, ແຕ່ບໍ່ມີເງິນເກັບແຮໄວ້ໃນເວລາເຈັບເປັນ ແລະ ຊີວິດການເປັນຂອງຄອບຄົວກໍບໍ່ມີການພັດທະນາເທົ່າທີ່ຄວນ. ໃນປີ 2013 ຈຶ່ງໄດ້ປຶກສາຫາລືກັບຄອບຄົວ ເພື່ອຍົກລະດັບຊີວິດການເປັນຢູ່ ຂອງຄອບຄົວໃຫ້ດີຂຶ້ນ ເພື່ອໃຫ້ຫຼຸດພົ້ນອອກຈາກຄວາມທຸກຍາກ ຕາມແນວທາງນະໂຍບາຍ ຂອງພັກ-ລັດ ໄດ້ວາງອອກ ຈຶ່ງເລີ່ມເຮັດແຈ່ວຂາຍເພື່ອຢາກສ້າງລາຍຮັບເຂົ້າສູ່ຄອບຄົວ ສະນັ້ນ, ຈຶ່ງໄດ້ຕົກລົງເຮັດແຈ່ວຂາຍ, ໃນເບື້ອງຕົ້ນ ເຮັດຂາຍໃຫ້ພະນັກງານຄູ-ອາຈານໃນໂຮງຮຽນ, ໝູ່ເພື່ອນ, ພີ່ນ້ອງໄດ້ຊື້ໄປກິນ, ຫຼັງຈາກນັ້ນຜູ້ທີ່ຊື້ໄປບໍລິໂພກແລ້ວຍັງສັ່ງຊື້ຊ້ຳ ແລະ ເລີ່ມມີສຽງຕອບຮັບຈາກລູກຄ້າຫຼາຍຂຶ້ນ, ມາຮອດປີ 2019 ຈຶ່ງໄດ້ເຮັດແຈ່ວແບບຈິງຈັງ ຕ້ອງຕື່ນແຕ່ເດິກ, ລຸກແຕ່ເຊົ້າ, ໃຊ້ເວລາວ່າງນອກໂມງລັດຖະການ ເປັນຕົ້ນແມ່ນ ວັນເສົາ, ວັນອາທິດ ເພື່ອຜະລິດແຈ່ວໃຫ້ມີຫຼາຍປະເພດຄື: ແຈ່ວປາກະເຕົາ, ແຈ່ວປາແດກເຄື່ອງ, ແຈ່ວບອງຊີ້ນໝູ, ແຈ່ວໜຽວ, ແຈ່ວຜັກນາງຄຸ, ແຈ່ວບອງໜັງເຄັມ, ແຈ່ວບອງໜັງງົວ ແລະ ແຈ່ວແມງດາ. ວັດຖຸດິບທີ່ມາປະກອບເຮັດແຈ່ວແມ່ນເກັບຕາມສວນທີ່ເຮົາປູກເອງເຊັ່ນ: ຫົວສີໄຄ, ໃບຂີ້ຫູດ, ຂ່າ ແລະ ອື່ນໆ ນອກຈາກນັ້ນຍັງຊື້ຕາມທ້ອງຕະຫຼາດມາເພີ່ມຕື່ມ, ການຈຳໜ່າຍແມ່ນຂາຍໃຫ້ຄົນຮູ້ຈັກ, ຂາຍຜ່ານອອນລາຍ, ສົ່ງໄປຂາຍຢູ່ປະເທດເພື່ອນບ້ານ ແລະ ອື່ນໆ, ລາຄາເລີ່ມຕົ້ນ 65.000 ກີບຕໍ່ໜຶ່ງກັບ, 1 ກິໂລ 120.000 ກີບ, ຈາກການຂາຍແຈ່ວ ເຮັດໃຫ້ຄອບຄົວ ມີລາຍຮັບ 100 ກວ່າລ້ານກີບຕໍ່ປີ.
ທ່ານ ນາງ ແສງພະຈັນ ແກ້ວມະນີວົງ ຍັງໃຫ້ຮູ້ຕື່ມອີກວ່າ: ພາຍຫຼັງການສ້າງເສດຖະກິດຄອບຄົວ ດ້ວຍການຜະລິດແຈ່ວເປັນສິນຄ້າ ໄດ້ເຮັດໃຫ້ຊີວິດການເປັນ ຂອງຄອບຄົວມີການຫັນປ່ຽນ ແລະ ຄອບຄົວມີການພັດທະນາດີຂຶ້ນຈາກເຄີຍອົດຊື້, ອົດຈ່າຍ ກໍກາຍມາເປັນຄອບຄົວທີ່ສົມບູນແບບ, ປັດຈຸບັນມີເຮືອນຢູ່ຖາວອນ 2 ຫຼັງ, ລົດໃຫຍ່ 1 ຄັນ, ລົດຈັກ 1 ຄັນ ແລະ ຍັງມີທຶນການສຶກສາໃຫ້ລູກ. ແຜນໃນຕໍ່ໜ້າຈະສືບຕໍ່ຜະລິດແຈ່ວໃຫ້ຫຼາຍຂຶ້ນກວ່າເກົ່າ ເພື່ອຕອບສະໜອງຕາມຄວາມຮຽກຮ້ອງຕ້ອງການຂອງລູກຄ້າ ແລະ ຍັງຈະຂະຫຍາຍປະເພດແຈ່ວຂຶ້ນຕື່ມ, ຈະຮັກສາລົດຊາດຂອງແຈ່ວໃຫ້ເປັນເອກະລັກ (ເຮືອນແຈ່ວແຊບ ບ້ານສະພານໄຊ ນະຄອນປາກເຊ ແຂວງຈຳປາສັກ) ໃຫ້ຍືນຍົງຄົງຕົວໄປເລື້ອຍໆ.
ທ່ານ ບຸນປອນ ໄຊສົງຄາມ ນາຍບ້ານ ບ້ານສະພານໄຊ ນະຄອນປາກເຊ ແຂວງປາກຈຳປາສັກ ໄດ້ຢັ້ງຢືນວ່າ: ຄອບຄົວ ຂອງທ່ານ ນາງ ແສງພະຈັນ ແກ້ວມະນີວົງ ແມ່ນຄອບຄົວໜຶ່ງທີ່ມີຄວາມດຸໝັ່ນ, ອົດທົນ, ເຮັດແທ້ທຳຈິງ ນອກຈາກເປັນພະນັກງານຄູສອນແລ້ວຍັງສາມາດສ້າງລາຍຮັບ ຈາກການໃຊ້ເວລາວ່າງ ເຮັດແຈ່ວຂາຍ ເພື່ອພັດທະນາຕົນເອງ ແລະ ຄອບຄົວ ຈົນກາຍເປັນຄອບຄົວແບບຢ່າງ ໃນການສ້າງເສດຖະກິດ ໃຫ້ຫຼຸດພົ້ນອອກຈາກຄວາມທຸກຍາກ ຕາມແນວທາງ ຂອງພັກ-ລັດ ໄດ້ວາງອອກ.
ຄໍາເຫັນ