ທ່ານ ຂັນຕີ ສີລະວົງສາ ຮອງເຈົ້າແຂວງເຊກອງ ລາຍງານໃຫ້ຮູ້ ໃນກອງປະຊຸມສະໄໝສາມັນເທື່ອທີ 9 ຂອງສະພາປະຊາຊົນແຂວງເຊກອງ ຊຸດທີ II ເມື່ອບໍ່ດົນນີ້ ວ່າ: ການຈັດຕັ້ງປະຕິບັດແຜນພັດທະນາເສດຖະກິດ, ແຜນງົບປະມານແຫ່ງລັດ ຂອງແຂວງຕິດພັນກັບສອງວາລະແຫ່ງຊາດ ໃນ 6 ເດືອນຕົ້ນປີ 2025 ເຖິງວ່າຈະພົບບັນຫາຄວາມຫຍຸ້ງຍາກທາງດ້ານເສດຖະກິດ-ການເງິນ, ແຕ່ຫຼາຍຂົງເຂດວຽກງານ ແມ່ນໄດ້ດໍາເນີນໄປຕາມແຜນການທີ່ກໍານົດໄວ້, ສະພາບໂດຍລວມຂອງເສດຖະກິດຢູ່ໃນທ່າຂະຫຍາຍຕົວຢ່າງຕໍ່ເນື່ອງ ຕາມທິດໝັ້ນທ່ຽງ ແລະ ຍືນຍົງ; ມີນັກທຸລະກິດເຂົ້າເຖິງແຫຼ່ງທຶນນະໂຍບາຍສິນເຊື່ອ ເພື່ອກະຕຸ້ນເສດຖະກິດ ແລະ ນະໂຍບາຍສິນເຊື່ອ ເພື່ອກະຈາຍແຫຼ່ງທຶນສູ່ທ້ອງຖິ່ນ ຈໍານວນ 24 ຫົວໜ່ວຍ ປະຕິບັດໄດ້ 58.7 ຕື້ກີບ ທຽບໃສ່ແຜນເທົ່າກັບ 73.37%; ເກັບລາຍຮັບເຂົ້າງົບປະມານໄດ້ 230.77 ຕື້ກີບ ທຽບໃສ່ແຜນເທົ່າກັບ 37.40% ແລະ ປະຕິບັດລາຍຈ່າຍ 237.05 ຕື້ກີບ ທຽບໃສ່ແຜນເທົ່າກັບ 48.51%; ການນໍາເຂົ້າສິນຄ້າຈາກຕ່າງປະເທດມີມູນຄ່າ 4.17 ລ້ານໂດລາ ທຽບໃສ່ແຜນເທົ່າກັບ 55.6% ແລະ ການສົ່ງອອກສິນຄ້າປະຕິບັດໄດ້ 121.17 ລ້ານໂດລາ ທຽບໃສ່ແຜນເທົ່າກັບ 63.19%, ຄາດຄະເນໝົດປີຈະປະຕິບັດໄດ້ເກີນແຜນ 26.37% ຈຶ່ງເຮັດໃຫ້ເກີນດຸ່ນການຄ້າຢູ່ 117 ລ້ານໂດລາ.
ທ່ານ ຂັນຕີ ສີລະວົງສາ ໃຫ້ຮູ້ຕື່ມວ່າ: ສໍາລັບການພັດທະນາຂົງເຂດວັດທະນະທໍາ-ສັງຄົມ ໂດຍສະເພາະແມ່ນວຽກງານສຶກສາ ໄດ້ເອົາໃຈໃສ່ຈັດຕັ້ງປະຕິບັດຕາມ 3 ລັກສະນະ 5 ຫຼັກມູນ ຂອງການສຶກສາໄປສູ່ຄຸນນະພາບໃໝ່ ຕິດພັນກັບການແກ້ໄຂ ການປະລະການຮຽນ, ການຂາດຮຽນຂອງນ້ອງນັກຮຽນຢ່າງເປັນເຈົ້າການ, ສົກຮຽນ 2024-2025 ການສອບເສັງຈົບຊັ້ນປະຖົມ (ປໍ5) ປະຕິບັດໄດ້ 98.87%; ຊັ້ນມັດທະຍົມຕອນຕົ້ນ (ມໍ4) ປະຕິບັດໄດ້ 100% ແລະ ມັດທະຍົມຕອນປາຍ (ມໍ7) ປະຕິບັດໄດ້ 100%. ສ່ວນວຽກງານສາທາລະນະສຸກ ໄດ້ເອົາໃຈໃສ່ພັດທະນາພື້ນຖານໂຄງລ່າງ, ຍົກສູງຄຸນນະພາບການປິ່ນປົວພະຍາດ, ຄວບຄຸມ ແລະ ສະກັດກັ້ນການລະບາດຂອງພະຍາດຕາມລະດູການ ແລະ ຍົກສູງຄຸນນະພາບການປິ່ນປົວພະຍາດ ຕາມຄໍາຂວັນ 5 ດີ 1 ພໍໃຈ.
(ຂ່າວ: ສັນຍາ)
ຄໍາເຫັນ