ຈັດໃຫ້ມີກອງປະຊຸມເວທີເສວະນາໃນຫົວຂໍ້ສຳຄັນຕ່າງໆ, ມີງານໂຮມຊຸມນຸມໃຫຍ່ຂຶ້ນເພື່ອໃຫ້ສື່ມວນຊົນທັງພາກລັດ ແລະ ເອກະຊົນໄດ້ມາເຕົ້າໂຮມກັນ ພົບໜ້າພໍ້ຕາກັນແລກປ່ຽນບົດຮຽນ. ພ້ອມນັ້ນ, ຍັງມີກິດຈະກຳການແຂ່ງຂັນກິລາມິດຕະພາບລະຫວ່າງສື່ມວນຊົນດ້ວຍກັນຢ່າງເບີກບານມ່ວນຊື່ນ ແລະ ມີຄວາມໝາຍ-ຄວາມສຳຄັນ.
ເນື່ອງໃນໂອກາດວັນສື່ມວນຊົນ ແລະ ການພິມຈໍາໜ່າຍລາວ ຄົບຮອບ 74 ປີ(13 ສິງ 1950-13 ສິງຫາ2024) ໃກ້ຈະມາເຖິງນີ້, ທ່ານ ສຸວັນ ວິໄລແສງຜູ້ອໍານວຍການໃຫຍ່ວິທະຍຸກະຈາຍສຽງແຫ່ງຊາດລາວ (ວສລ)ໄດ້ສະແດງທັດສະນະຕໍ່ວັນດັ່ງກ່າວ ເມື່ອບໍ່ດົນຜ່ານມາ ທີ່ ວສລ ວ່າ: ຕະຫຼອດໄລຍະ 7 ທົດສະວັດກວ່າຜ່ານມານີ້, ສື່ມວນຊົນລາວທັງສື່ສິ່ງພິມ ແລະ ສື່ເອເລັກໂຕຣນິກໄດ້ຮັບການພັດທະນາເຕີບໃຫຍ່ທາງດ້ານປະລິມານ ແລະ ຄຸນນະພາບ, ທຸກສໍານັກສື່ມວນຊົນໄດ້ມີການນໍາໃຊ້ທັງສື່ເກົ່າ ແລະ ສື່ໃໝ່ຄວບຄູ່ກັນໄປ ເຮັດໃຫ້ການເຜີຍແຜ່ຂໍ້ມູນຂ່າວສານຕ່າງໆລວມທັງສາລະຄວາມຮູ້ ແລະ ຄວາມບັນເທີງມີຄວາມວ່ອງໄວກວ້າງຂວາງ ແລະ ນັບມື້ເຂົ້າເຖິງທຸກກຸ່ມຄົນໄດ້ຢ່າງທົ່ວເຖິງໂດຍມີອິນເຕີເນັດເປັນຕົວຂັບເຄື່ອນສໍາຄັນທີ່ສຸດ.
ຢ່າງໃດກໍຕາມ, ອີງໃສ່ຄວາມຮຽກຮ້ອງຕ້ອງການຂອງສັງຄົມໃນການບໍລິໂພກຂໍ້ມູນຂ່າວສານໃນໄລຍະໃໝ່ ກໍຄືໄລຍະທີ່ສື່ໃໝ່ ຫຼື ສື່ອອນລາຍມີບົດບາດສູງໃນຊີວິດປະຈໍາວັນຂອງຄົນເຮົາໃນປັດຈຸບັນນີ້. ສື່ມວນຊົນຕ້ອງພ້ອມກັນສືບຕໍ່ເຮັດໜ້າທີ່ເປັນກະບອກສຽງທີ່ສໍາຄັນໃຫ້ແກ່ພັກ-ລັດ ແລະ ປະຊາຊົນລາວບັນດາເຜົ່າ ເພື່ອໂຄສະນາແນວທາງນະໂຍບາຍຂອງພັກ, ແຜນພັດທະນາເສດຖະກິດ-ສັງຄົມ, ລະບຽບກົດໝາຍຂອງລັດວາງອອກໃຫ້ດີຂຶ້ນກວ່າເກົ່າ, ພ້ອມທັງເປັນເວທີໃຫ້ຂໍ້ມູນຂ່າວສານ, ສາລະໜ້າຮູ້ ແລະ ສາລະບັນເທີງສ້າງຄວາມສາມັກຄີປອງດອງ, ກະຕຸກຊຸກຍູ້ໃຫ້ທຸກຊັ້ນຄົນໃນສັງຄົມປະຕິບັດລະບຽບກົດໝາຍ ປະກອບສ່ວນເປັນກໍາລັງແຮງສ້າງສາພັດທະນາປະເທດຊາດ. ພ້ອມກັນນີ້, ທັງເນື້ອໃນ ແລະ ຮູບແບບການໂຄສະນາຂອງສື່ມວນຊົນຕ້ອງໄດ້ປັບປຸງໃຫ້ມີຄວາມຫຼາກຫຼາຍ ແລະ ດຶງດູດໃຈຜູ້ຟັງ, ຜູ້ຊົມ ແລະ ຜູ້ອ່ານຫຼາຍຂຶ້ນກວ່າເກົ່າ, ໄປພ້ອມໆກັບການປັບປຸງ ແລະ ພັດທະນາລະບົບເຕັກໂນໂລຊີແບບໃໝ່, ຫັນເປັນທັນສະໄໝ ແລະ ຍົກລະດັບບຸກຄະລາກອນສື່ໃຫ້ມີຄຸນນະພາບສູງຂຶ້ນທັງສາມາດວິເຄາະ-ວິໄຈ, ຕອບໂຕ້ ແລະ ວິຈານບັນຫາຕ່າງໆໃຫ້ສັງຄົມໄດ້ຮັບຮູ້ຕາມ 4 ລັກສະນະຂອງສື່ມວນຊົນລາວຄື: ລັກສະນະຕົວຈິງ, ລັກສະນະສຶກສາອົບຮົມ, ລັກສະນະແນະນໍາ ແລະ ລັກສະນະຕໍ່ສູ້ສິ່ງສໍາຄັນທີ່ສຸດ, ເພື່ອເຮັດໃຫ້ການປະຕິບັດໜ້າທີ່ຂອງຕົນໃຫ້ດີກວ່າເກົ່າສື່ມວນຊົນທຸກຄົນຕ້ອງກຳໃຫ້ໄດ້ທຸກມະຕິ, ຄຳສັ່ງ ແລະ ບັນດາແຈ້ງການຂອງພັກ-ລັດຖະບານໃນແຕ່ລະໄລຍະ ເພື່ອໄປສ່ອງແສງ ຫຼື ຜັນຂະຫຍາຍຕໍ່ໃຫ້ປະຊາຊົນໄດ້ຮັບຮູ້ ແລະ ເຂົ້າໃຈ, ຕ້ອງສະແດງສັດຈະທຳໃນຄວາມເປັນຈິງ, ບໍ່ໃສ່ຮ້າຍປ້າຍສີ, ບໍ່ບິດເບືອນ, ບໍ່ສ້າງຄວາມແຕກແຍກຢູ່ໃນສັງຄົມ, ຕ້ອງເຮັດໃຫ້ສັງຄົມມີຄວາມສາມັກຄີຮັກແພງຊຶ່ງກັນ ແລະ ກັນ ເພື່ອເຮັດແນວໃດໃນການສ້າງຄວາມເຂົ້າອົກເຂົ້າໃຈກັນລະຫວ່າງພັກ-ລັດ ກັບປະຊາຊົນ ແລະ ປະຊາຊົນກັບປະຊາຊົນນັບມື້ດີຂຶ້ນກວ່າເກົ່າ.
ເນື່ອງໃນໂອກາດວັນສື່ມວນຊົນ ແລະ ການພິມຈໍາໜ່າຍລາວ ຄົບຮອບ 74 ປີ, ທ່ານ ສຸວັນ ວິໄລແສງ ໄດ້ອວຍພອນໄຊອັນປະເສີດໃຫ້ພະນັກງານ-ລັດຖະກອນ ກໍຄືສື່ມວນຊົນທັງພາກລັດ ແລະ ເອກະຊົນ ຈົ່ງມີສຸຂະພາບແຂງແຮງ, ເຂັ້ມແຂງ, ຈົ່ງພັດທະນາຕົນເອງໃຫ້ດີຂຶ້ນໄປເລື້ອຍໆໃຫ້ທັນຍຸກທັນສະໄໝ ແລະ ຍາດໄດ້ຜົນງານອັນຍິ່ງໃຫຍ່ຂຶ້ນກວ່າເກົ່າ.
ຄໍາເຫັນ