 |
ຈຸດປະສົງໃນການຈັດກອງປະຊຸມຄັ້ງນີ້ ເພື່ອເຊື້ອເຊີນເອົານັກພາສາສາດລາວ, ນັກປະພັນ, ນັກຂ່າວສື່ມວນຊົນ ແລະ ນັກພັດທະນາປັນຍາປະດິດທັງພາຍໃນ ແລະ ຕ່າງປະເທດມາປຶກສາແລກປ່ຽນບົດຮຽນ, ວິທີການໃນການຊອກຫາແຫຼ່ງຂໍ້ມູນລາວ ເພື່ອເປັນແຫຼ່ງໃນການພັດທະນາຖານຂໍ້ມູນລາວທີ່ມີຄຸນນະພາບເພື່ອສົ່ງເສີມປັນຍາປະດິດລາວ. ປັດຈຸບັນເອໄອໄດ້ເປັນທີ່ນິຍົມໃຊ້ໃນລາວເປັນຕົ້ນ ChatGPT, DeepSeek, Claude, Gemini ແລະ Copilot ຊຶ່ງເອໄອເຫຼົ່ານີ້ສາມາດອ່ານ, ແປພາສາ, ສະຫຼຸບ, ວິ ເຄາະຂໍ້ຄວາມ ແລະ ບັນຫາ ແຕ່ເອໄອເຫຼົ່ານີ້ໄດ້ໄປເອົາຂໍ້ມູນຈາກແຫຼ່ງຕ່າງໆ ບາງຄັ້ງການຂຽນບໍ່ຖືກຕາມຫຼັກໄວຍາກອນລາວ, ບາງຄັ້ງກໍຂຽນປະສົມລະຫວ່າງພາສາລາວ ແລະ ໄທ, ເນື້ອໃນ ແລະ ສະຖິຕິຂໍ້ມູນຈໍານວນບໍ່ໜ້ອຍແມ່ນບໍ່ເປັນທາງການ. ນັກຂ່າວລາວຈໍານວນຫຼາຍໄດ້ນໍາໃຊ້ເອໄອມາເປັນເຄື່ອງມືຊ່ວຍວຽກປະຈໍາວັນເພື່ອໃຫ້ໄວ, ປະຢັດເວລາ ແລະ ມີປະສິດທິພາບກວ່າເກົ່າໃນການຕັດຕໍ່ວີດີໂອຂ່າວ, ສະຫຼຸບຂ່າວ-ບົດ ແລະ ຜະລິດຕະພັນສື່ອື່ນໆ, ແຕ່ເພື່ອຫຼີກເວັ້ນຄວາມຜິດພາດພວກເຂົາເຈົ້າຕ້ອງໄດ້ນໍາໃຊ້ບັນດາປັນຍາປະ ດິດເຫຼົ່ານັ້ນຢ່າງລະມັດລະວັງ. ສະມາຄົມນັກຂ່າວແຫ່ງສປປ ລາວ ໄດ້ຮ່ວມເປັນສ່ວນໜຶ່ງປະສານງານ ລະຫວ່າງຊ່ຽວຊານຜູ້ພັດທະນາ-ນໍາໃຊ້ພາສາລາວຢ່າງຖືກຕ້ອງ ແລະ ຊ່ຽວຊານຜູ້ພັດທະນາປັນຍາປະດິດມາແລກປ່ຽນບົດຮຽນກັນ ແລະ ເຊື່ອວ່າຂາດດ້ານໃດດ້ານໜຶ່ງກໍອາດຈະເຮັດໃຫ້ລະບົບເອໄອຂອງລາວບໍ່ສົມບູນ ແລະ ເຊື່ອວ່າຄວາມອາດສາມາດບົ່ມຊ້ອນຢູ່ພາຍໃນແມ່ນມີຫຼາຍ ເພື່ອມາພັດທະນາຖານຂໍ້ມູນດັ່ງກ່າວ.
 |
ທ່ານ ສາຄອນ ພົມມະລາດ ໄດ້ກ່າວວ່າ: ການນໍາໃຊ້ພາຫະນະເຄື່ອງມືທີ່ທັນສະໄໝເທົ່າໃດຍິ່ງຕ້ອງໄດ້ລະມັດລະວັງ ແລະ ຕ້ອງໄດ້ສຶກສາຢ່າງລະອຽດຮອບຄອບເປັນລະບົບຄົບຊຸດ ເພື່ອສ້າງປະໂຫຍດໃຫ້ແກ່ສັງຄົມ ແລະ ປະເທດຊາດ. ການຈັດກອງປະຊຸມປຶກສາສົນທະນາໃນຫົວຂໍ້ນີ້ຈະເປັນບາດກ້າວໜຶ່ງທີ່ສຳຄັນທີ່ຈະໄດ້ແຫຼ່ງພາສາລາວມາພັດທະນາຖານຂໍ້ມູນທີ່ມີຄຸນນະພາບ ເພື່ອສົ່ງເສີມການນໍາໃຊ້ພາສາລາວຢູ່ AI ໄດ້ຕາມຈຸດປະສົງ ແລະ ເປົ້າໝາຍທີ່ວາງໄວ້.
 |
ຂ່າວ-ພາບ: ບຸນຕອມ
ຄໍາເຫັນ