 |
ໃຫ້ກຽດຖະແຫຼງຂ່າວໂດຍພະອາຈານໃຫຍ່ ອະທິປະໄຕ ໄມຕີຈິດ ຮອງປະທານສູນກາງ ອພສ ກ່າວວ່າ: ງານບຸນດັ່ງກ່າວໄດ້ຈັດຂຶ້ນໃນວັນທີ 26 ມັງກອນດ້ວຍພິທີແຫ່ພະໄຕປີດົກລາວ ຈາກສວນເຈົ້າຟ້າງຸ່ມ ສູ່ເດີ່ນພະທາດຫຼວງ ໂດຍມີຂະບວນລົດທີ່ປະດັບປະດາຢ່າງຈົບງາມ ລວມມີຂະບວນພະພຸດທະຮູບ ແລະ ພະໄຕປີດົກ 90 ຫົວ ຊຶ່ງສະທ້ອນໃຫ້ເຫັນເຖິງຄວາມສາມັກຄີຂອງປວງຊົນລາວບັນດາເຜົ່າ ທີ່ຮ່ວມກັນນຸ່ງຊຸດປະຈໍາເຜົ່າເດີນຂະບວນຢ່າງສະຫງ່າງາມ ເພື່ອນ້ອມຮັບເອົາພະທຳຄຳສອນອັນບໍລິສຸດຂອງພະສຳມາສຳພຸດທະເຈົ້າ ມາເປັນຄັງປັນຍາ ແລະ ຫຼັກໄຊໃນການດຳເນີນຊີວິດ.
ນັບແຕ່ວັນທີ 27-29 ມັງກອນ, ພຸດທະສາສະນິກະຊົນ ໄດ້ຮ່ວມກັນສູດສາທະຍາຍພະໄຕປີດົກລາວຕະຫຼອດທັງວັນ. ຈຸດເດັ່ນແມ່ນການປາຖະກະຖາທຳໃນຕອນຄ່ຳວັນທີ 29 ມັງກອນ ໂດຍພະອາຈານ ມະຫາອຸດອນ ອະນຸດຕະໂຣ ຫົວໜ້າຜູ້ຈັດທຳພະໄຕປີດົກລາວ ຊຶ່ງໄດ້ເນັ້ນໜັກເຖິງຄຸນຄ່າຂອງພະໄຕປີດົກໃນຖານະຮາກຖານທາງຈະລິຍະທຳ ແລະ ວັດທະນະທຳທີ່ຫຼໍ່ຫຼອມຈິດໃຈຄົນລາວໃຫ້ມີຄວາມເມດຕາ ແລະ ສາມັກຄີ. ສ່ວນໃນວັນທີ 30 ມັງກອນ ມີພິທີຫົດສົງເຖຣາພິເສກຖວາຍນາມມະຍົດແດ່ພະສົງ 13 ອົງ ຊຶ່ງເປັນຄະນະຈັດທຳພະໄຕປີດົກລາວ ເພື່ອເປັນການຍົກຍ້ອງສັນເສີນຜົນງານອັນໃຫຍ່ຫຼວງໃນການຮຽບຮຽງຄຳສອນ. ພ້ອມນັ້ນ, ຍັງໄດ້ມີພິທີຍົກຍອດຊໍ່ຟ້າອາຄານສຳນັກງານ ອພສ ຫຼັງໃໝ່ ເພື່ອຄວາມເປັນສິຣິມຸງຄຸນ.
ສ່ວນວັນທີ 31 ມັງກອນ ມີພິທີຫົດສົງມະຫາເຖຣາພິເສກ ສະຖາປະນາພະອາຈານໃຫຍ່ ມະຫາເວດ ມະເສໄນ ດຳລົງຕຳແໜ່ງເປັນປະທານສູນກາງ ອພສ ອົງທີ 7. ພະອາຈານໃຫຍ່ໄດ້ຮັບຄຳຊົມເຊີຍຢ່າງສູງສົ່ງ ໃນຖານະຜູ້ນຳພາທີ່ມີສີລາຈາຣິວັດອັນງົດງາມ ແລະ ເປັນກຳລັງຫຼັກໃນການສ້າງສາພັດທະນາວົງການສົງລາວ. ນອກຈາກນີ້, ຍັງໄດ້ເປີດອາຄານສຳນັກງານປະທານສົງສູນກາງ ອພສ ຫຼັງໃໝ່ຢ່າງເປັນທາງການ.
ຜົນສຳເລັດດັ່ງກ່າວ, ເປັນການຢືນຢັນເຖິງຄວາມເຂັ້ມແຂງຂອງພຸດທະສາສະໜາໃນລາວ ເປັນທີ່ເພິ່ງທາງຈິດໃຈ ແລະ ເປັນຄັງປັນຍາຄູ່ກັບຊາດລາວຕະຫຼອດໄປ.
ຂ່າວ: ບຸນອູ້ມ; ພາບ: ບຸນຕອມ
ຄໍາເຫັນ