ໃນປີ 2025, ລາຍຮັບລວມຂອງ Vietjet ທັງໝົດແມ່ນ 82,093 ຕື້ດົງ (ປະມານ 67.9 ຕື້ກີບ), ເພີ່ມຂຶ້ນ 14%. ກຳໄລກ່ອນອາກອນລວມ: ບັນລຸ 2,630 ຕື້ດົງ (ປະມານ 2.18 ຕື້ກີບ), ເຕີບໂຕ 44.3%. ກຳໄລຫຼັງອາກອນລວມ: ບັນລຸ 2,123 ຕື້ດົງ (ປະມານ 1.76 ຕື້ກີບ), ເຕີບໂຕ 51.2%. ໝາກຜົນດັ່ງກ່າວແມ່ນຖືວ່າເກີນແຜນການທີ່ວາງໄວ້ປະຈຳປີເຖິງ 120%. ເລີ່ມພາຍໃນວັນທີ 31 ທັນວາ 2025, ຊັບສິນທັງໝົດຂອງ Vietjet ມີມູນຄ່າ 139,459 ຕື້ດົງ (ປະມານ 115.34 ຕື້ກີບ). ອັດຕາສ່ວນໜີ້ສິນສຸດທິຕໍ່ທຶນ (Net Debt-to-Equity): ຢູ່ທີ່ 2.25. ອັດຕາສ່ວນສະພາບຄ່ອງ (Liquidity Ratio): ຢູ່ທີ່ 1.53 (ຊຶ່ງຖືວ່າເປັນໜຶ່ງໃນບໍລິສັດທີ່ມີຄວາມແຂງແກ່ນທີ່ສຸດໃນອຸດສາຫະກຳການບິນ)
ນອກຈາກນີ້, Vietjet ຍັງໄດ້ປະສົບຜົນສຳເລັດໃນການອອກຈຳໜ່າຍຮຸ້ນ 50 ລ້ານຮຸ້ນ, ເຮັດໃຫ້ທຶນຈົດທະບຽນເພີ່ມຂຶ້ນ 5 ຕື້ດົງ (ປະມານ 4.14 ຕື້ກີບ) ເພື່ອຮອງຮັບການເຕີບໂຕໃນໄລຍະຍາວ.
ໃນໄຕມາດທີ 4 ຂອງປີ 2025, Vietjet ໄດ້ບໍລິການຂົນສົ່ງຜູ້ໂດຍສານຫຼາຍກວ່າ 6.7 ລ້ານຄົນ ຜ່ານຖ້ຽວບິນທັງໝົດ 36,100 ຖ້ຽວ. ຕະຫຼອດສົກປີ 2025, ສາຍການບິນໄດ້ຂົນສົ່ງຜູ້ໂດຍສານລວມທັງໝົດ 28.2 ລ້ານຄົນ ດ້ວຍຈຳນວນຖ້ຽວບິນ 153,000 ຖ້ຽວ ຊຶ່ງສະແດງໃຫ້ເຫັນເຖິງການເຕີບໂຕ 9% ແລະ 11.2% ຕາມລຳດັບ ເມື່ອທຽບໃສ່ປີຜ່ານມາ. ນອກຈາກນີ້, ປະລິມານການຂົນສົ່ງສິນຄ້າທັງໝົດຍັງບັນລຸເຖິງ 113,923 ໂຕນ. Vietjet ຍັງຄົງຮັກສາຕຳແໜ່ງຜູ້ນຳທີ່ມີສ່ວນແບ່ງຕະຫຼາດສູງສຸດໃນຫວຽດນາມ ໂດຍວັດແທກຈາກຈຳນວນຜູ້ໂດຍສານ ທັງໃນຕະຫຼາດພາຍໃນປະເທດ ແລະ ຕ່າງປະເທດ.
ໃນປີ 2025, ສາຍການບິນໄດ້ເປີດໃຫ້ບໍລິການເສັ້ນທາງການບິນທັງໝົດ 254 ເສັ້ນທາງ, ແບ່ງເປັນ: ເສັ້ນທາງພາຍໃນປະເທດ 52 ເສັ້ນທາງ, ເສັ້ນທາງລະຫວ່າງປະເທດ 202 ເສັ້ນທາງ, ເສັ້ນທາງ ໃໝ່ ເປີດເພີ່ມອີກ 22 ເສັ້ນທາງ ທີ່ເຊື່ອມຕໍ່ຫວຽດນາມໄປສູ່ຈຸດໝາຍປາຍທາງທີ່ສຳຄັນ ເຊັ່ນ: ອາຊີກາງ ແລະ ສປ ຈີນ. ພິເສດ: ປັດຈຸບັນ Vietjet ກຳລັງເປີດໃຫ້ບໍລິການຖ້ຽວບິນລາຍວັນ (Daily flights) ທີ່ເຊື່ອມຕໍ່ລະຫວ່າງ ນະຄອນຫຼວງວຽງຈັນ - ນະຄອນຫຼວງຮ່າໂນ້ຍ ແລະ ນະຄອນໂຮ່ຈິມິນ. ນີ້ຖືເປັນໂອກາດອັນດີສຳລັບນັກທ່ອງທ່ຽວຈາກ ສປປ ລາວ ທີ່ວາງແຜນຈະໄປທ່ຽວຫວຽດນາມ ຫຼື ຕ້ອງການເດີນທາງຕໍ່ໄປຍັງຈຸດໝາຍປາຍທາງອື່ນໆທົ່ວໂລກ. ໄຕມາດທີ 4 ຂອງປີ 2025 ຖືເປັນຂີດໝາຍທີ່ສໍາຄັນໃນຍຸດທະສາດການລົງທຶນໄລຍະຍາວຂອງ Vietjet ດ້ວຍການຮັບມອບເຮືອບິນໃໝ່ 22 ລໍາ ຊຶ່ງຖືວ່າເປັນການຂະຫຍາຍຝູງບິນທີ່ໃຫຍ່ທີ່ສຸດນັບຕັ້ງແຕ່ໄດ້ສ້າງຕັ້ງສາຍການບິນມາ. ນອກນີ້, Vietjet ໄດ້ເຊັນສັນຍາກັບບໍລິສັດ Airbus ເພື່ອຊື້ເຮືອບິນລຸ້ນ A321neo ຈຳນວນ 100 ລໍາ, ພ້ອມກັບສັນຍາແຍກຕ່າງຫາກກັບບໍລິສັດ Rolls-Royce ເພື່ອຊື້ເຄື່ອງຈັກລຸ້ນ Trent 7000 ຈໍານວນ 92 ເຄື່ອງ ພ້ອມບໍລິການບຳລຸງຮັກສາແບບຄົບວົງຈອນ ຊຶ່ງມີມູນຄ່າລວມເຖິງ 3.8 ຕື້ໂດລາ.
ໃນເດືອນທັນວາ 2025, Vietjet Thailand ໄດ້ຮັບມອບເຮືອບິນ Boeing ລຳທຳອິດ ຊຶ່ງເປັນການຂະຫຍາຍຂະໜາດຝູງບິນຂອງກຸ່ມບໍລິສັດ ເພື່ອຮອງຮັບການເຕີບໂຕໃນປີ 2026. ຄຽງຄູ່ກັບການເຕີບໂຕຂອງຝູງບິນ, Vietjet ຍັງສືບຕໍ່ລົງທຶນໃນການພັດທະນາບຸກຄະລາກອນທີ່ມີຄຸນນະພາບສູງ ຜ່ານການຮ່ວມມືຝຶກອົບຮົມນັກບິນຕາມມາດຕະຖານສາກົນ: ໃນປີ 2025, ສະຖາບັນການບິນ Vietjet (VJAA) ໄດ້ຝຶກອົບຮົມນັກສຶກສາຫຼາຍກວ່າ 162,000 ຄົນ ຜ່ານ 15,198 ຫຼັກສູດ. ເນັ້ນການສ້າງນັກບິນ,ພະນັກງານເຕັກນິກ, ພະນັກງານພາກພື້ນດິນ ແລະ ຊ່ຽວຊານດ້ານການບິນອື່ນໆ ເພື່ອຕອບສະໜອງຄວາມຕ້ອງການຂອງອຸດສາຫະກຳທີ່ເພີ່ມຂຶ້ນ.
Vietjet ສືບຕໍ່ສ້າງຄວາມຫຼາກຫຼາຍ ແລະ ຍົກລະດັບປະສົບການຂອງລູກຄ້າ ຜ່ານການຂະຫຍາຍຜະລິດຕະພັນ ແລະ ບໍລິການຕ່າງໆ ເຊັ່ນ: ປີ້ຍົນຊັ້ນທຸລະກິດ (Business class), ໂປຣແກຣມສະສົມຄະແນນ SkyJoy, ການຂາຍສິນຄ້າເທິງເຮືອບິນ, ລະບົບການຈອງ ແລະ ຊຳລະເງິນຜ່ານຫຼາຍຊ່ອງທາງແລະ Amy ຊຶ່ງເປັນຜູ້ຊ່ວຍສະເໝືອນຈິງທີ່ນຳໃຊ້ເຕັກໂນໂລຊີ AI. ນອກຈາກນີ້, ສາຍການບິນຍັງໄດ້ນຳສະເໜີກິດຈະກຳເທິງເຮືອບິນທີ່ຕິດພັນກັບວັດທະນະທຳໃນໄລຍະເທສະການສຳຄັນຂອງພາກພື້ນເຊັ່ນ: ເທສະການຊູຊອກ (ສ ເກົາຫຼີ), ເທສະການໂຮລີ ແລະ ດິວາລີ (ອິນເດຍ) ແລະ ອື່ນໆ. ໃນດ້ານການດຳເນີນງານ, Vietjet ໄດ້ມີການປັບປຸງຄັ້ງໃຫຍ່ ເຊັ່ນ: ການຂະຫຍາຍສິ່ງອຳນວຍຄວາມສະດວກໃນການເຊັກອິນ, ການຄຸ້ມຄອງບໍລິການພາກພື້ນດິນດ້ວຍຕົນເອງຢູ່ສະໜາມບິນເຕິນເຊີນເຍິດ (ສະໜາມບິນທີ່ຄຶກຄັກທີ່ສຸດໃນຫວຽດນາມ) ແລະ ເລັ່ງນຳໃຊ້ເຕັກໂນໂລຊີການບິນທີ່ທັນສະໄໝ ເຊັ່ນ: ລະບົບຕິດຕາມຖ້ຽວບິນແບບຮຽລທາມ (Real-time), ລະບົບຈັດການຂໍ້ມູນ ແລະ ການຢືນຢັນຕົວຕົນດ້ວຍລະບົບອັດສະລິຍະ (Biometric) ເພື່ອເພີ່ມປະສິດທິພາບ ແລະ ຄຸນນະພາບການບໍລິການ. ໃນປີ 2025, Vietjet ໄດ້ຮັບລາງວັນລະດັບສາກົນຢ່າງຫຼວງຫຼາຍ, ລວມມີສາຍການບິນທີ່ມີຄວາມປອດໄພທີ່ສຸດໃນໂລກ ແລະ ສາຍການບິນລາຄາປະຢັດທີ່ດີທີ່ສຸດ ຈາກ AirlineRatings, ລາງວັນຄວາມຍືນຍົງ (Sustainability Award 2025), ສາຍການບິນຊັ້ນນຳຂອງອາຊີດ້ານປະສົບການລູກຄ້າ ຈາກ World Travel Awards.ຕິດອັນດັບແບຣນສາຍການບິນທີ່ມີມູນຄ່າສູງສຸດໃນອາຊຽນ ປີ 2025 ໂດຍ Brand Finance, 50 ບໍລິສັດຈົດທະບຽນທີ່ດີທີ່ສຸດໃນຫວຽດນາມ ປີ 2025 ໂດຍ Forbes, ສະຖານທີ່ເຮັດວຽກທີ່ດີທີ່ສຸດໃນອາຊີ ປີ 2025 ໂດຍ HR Asia, ລາງວັນລະດັບຄຳ (Gold Award) ຈາກ ESG Transport Sustainability Awards 2025 ທີ່ໄຕ້ຫວັນ. ດ້ວຍຜົນປະກອບການທາງດ້ານການເງິນທີ່ແຂງແກ່ນ, ຝູງເຮືອບິນທີ່ຂະຫຍາຍຕົວຢ່າງໄວວາ, ການຮ່ວມມືສາກົນທີ່ແໜ້ນແຟ້ນ ແລະ ຂີດຄວາມສາມາດໃນການດຳເນີນງານທີ່ເຂັ້ມແຂງ, Vietjet ກ້າວເຂົ້າສູ່ປີ 2026 ດ້ວຍຄວາມພ້ອມຢ່າງເຕັມສ່ວນເພື່ອສືບຕໍ່ສ້າງການເຕີບໂຕທີ່ຍືນຍົງ ແລະ ຂະຫຍາຍຕົວໄປສູ່ລະດັບໂລກ.
ຂ່າວ: ຕຸໄລເພັດ
ຄໍາເຫັນ